බටලන්ද කොමිසම් වාර්තාව අද ඉදිරියට ගෙනවිත් ඇත්තේ ජනතා විමුක්ති පෙරමුණේ වුවමනාවට නොව වෙනත් පාර්ශ්වයකගේ වුවමනාවට බව හිටපු අමාත්‍ය රාජිත සේනාරත්න මහතා පැවසීය.
කොළඹ මල් පාරේ පිහිටි හිටපු ජනාධිපති රනිල් වික්‍රමසිංහ මහතාගේ කාර්යාලයේදී පසුගියදා (18) පැවති මාධ්‍ය හමුවක් අමතමින් ඒ මහතා මේ බව සඳහන් කළේය.
එහිදී ඒ මහතා මෙසේද කීය.
“අද ජනතා විමුක්ති පෙරමුණ අලුත් ගමනක් යනවා. අනුර කුමාර ජනාධිපතිවරයා අද ආර්ථිකය ගැන විශාල අවබෝධයකින් ජාත්‍යන්තර අරමුදල සමඟ කටයුතු කරනවා. බටලන්ද කොමිසම වාර්තාව මඟින් රනිල් වික්‍රමසිංහට අත දික්කර ජනතා විමුක්ති පෙරමුණට ගහන්න සමහරු බලාපොරොත්තු වෙනවා.
වැදගත් වන්නේ ජනතා විමුක්ති පෙරමුණේ ඉතිහාසය නොවෙයි. හෙට දවසේ අපේ රට ගොඩනඟන්නේ කෙසේද යන්නයි. ඇඟිල්ල එක් පැත්තකට දික් වන විට අනිත් ඇඟිලි තමන් දෙසට දික් වෙනවා. බටලන්ද කොමිසමට රනිල් වික්‍රමසිංහ මහතා කැඳවූයේ සාක්කිකරුවකු ලෙස පමණයි. විත්තිකරුවකු ලෙස නොවෙයි. නිවාස ලබා දීමේ ක්‍රමවේදය වැරදි බව පමණයි එහි සඳහන් වෙන්නේ.
රනිල් වික්‍රමසිංහගේ සිවිල් අයිතිය නැති කරන්න කතා කරන්නේ බටලන්ද වාර්තාවේ එක කොළයක්වත් කියවපු නැති අයයි. ජනාධිපති කොමිසමකට කිසිවකුගේ සිවිල් අයිතිය නැති කරන්න බැහැ.
මේ වාර්තාව 2000 දී පාර්ලිමේන්තුවේ සැසි වාර්තාවක් ලෙස ඉදිරිපත් කළා. එවිට ජනතා විමුක්ති පෙරමුණ චන්ද්‍රිකා බණ්ඩාරනායකගේ ආණ්ඩුවේ සිටියා. එදා ඔවුන් මේ ගැන කතා කළේ නැහැ.
2002දීත් ජවිපෙ චන්ද්‍රිකාගේ ආණ්ඩුවට එක් වුණා. අනුර කුමාර දිසානායක කැබිනට් මණ්ඩලයේ සිටියා. එවිටත් බටලන්ද වාර්තාව ගැන ඔවුන් කතා කළේ නැහැ.
2005 දී මහින්ද රාජපක්ෂ බලයට ගේන්න එක් වුණා. ඒ වෙලාවෙදිත් කතා කළේ නැහැ. 2015 දී අපි එක්ක එකතු වුණා. රනිල් වික්‍රමසිංහගේ අගමැති ධුරය අහිමි කළ අවස්ථාවේ එය වැරදි බව පවසා ඔවුන් අධිකරණයටත් ගියා. මේ එක තැනකවත් ඔවුන් බටලන්ද ගැන කතා කළේ නැහැ. අද ඔවුන් බටලන්ද වාර්තාව ගැන කතා කරන්නේ කොහොමද?.
විජේවීරට වෙඩි තැබූ තෝරදෙණිය සමඟත් පසුව ජවිපෙ දේශපාලන වශයෙන් එක් වුණා නම් බටලන්ද වාර්තාව ගැන කවර කතාද?
මෙය ජනතා විමුක්ති පෙරමුණේ වුවමනාවට නොව වෙනත් පාර්ශ්වයක වුමනාවට ඉදිරියට පැමිණි බව මා කියන්නේ ඒ නිසයි. අද ඒවා පැත්තක තබා ඔවුන් ඉදිරි ගමනක යන වෙලාව. ඔවුන්ගේ ආර්ථික වැඩපිළිවෙළ සහ අපේ වැඩ පිළිවෙළේ වෙනසක් තිබෙනවා. ඒ සම්බන්ධයෙන් අපේ විවේචන තිබෙනවා. නමුත් ඔවුන් අද ප්‍රජාතන්ත්‍රවාදී මාර්ගයේ යනවා.
