ශ්‍රී ලන්කන් ගුවන්යානයක් තුළ කලහකාරි ලෙස හැසිරුණේ යැයි චෝදනා ලද පාකිස්තානු ජාතික තරුණ සංචාරක මිතුරන් තිදෙනකු දැඩිසේ අවවාද කර මුදා හැරීමට කොළඹ ප්‍රධාන මහේස්ත්‍රාත් තනුජා ලක්මාලී මහත්මිය නියෝග කළාය.
පාකිස්තානු ජාතික තරුණයන් වන මොහොමඩ් සාමන්, අසාම් කාහීල් සහ තබීර් සහීස් යන තරුණයන් මෙසේ මුදා හැරීමට නියෝග කළාය.
සංචාරකයින් ලෙස මෙරටට පැමිණ ආපසු බැංකොක් බලා යමින් සිටියදී තිදෙනා අතර හටගත් ආසන ගැටලුව හේතුවෙන් කලහාකාරි ලෙස ඔවුන් හැසිරී ඇත. එහිදී ගුවන් ගමන් බාධාවට සමාව අයදීම සහ චෝදනාවන්ට වරද පිළිගැනීම යන කරුණු සලකා බැලීමෙන් පසුව මහේස්ත්‍රාත්වරිය මෙසේ ඔවුන් තිදෙනා මුදා හැරීමට නියෝග කළාය.
පෙරේදා (18) අලුයම අත්අඩංගුවට ගත් සැකකරුවන් තිදෙනා අධිකරණයට ඉදිරිපත් කරමින් ගුවන්තොටුපොළ පොලීසියේ නිලධාරීන් සඳහන් කර සිටියේ සැකකරුවන් ගුවන් ගමන ආරම්භ කරනවාත් සමඟ ආසනවල එහාට මෙහාට පනිමින් ආසන පටි නොපැලඳ කලහකාරි ලෙස හැසිරී ඇති බවය.
සැකකරුවන් පාලනය කර ගැනීමට නොහැකි වූ ගුවන් බලධාරීන් යානය ගුවන්ගත නොකර ආපසු හරවා පැමිණ සැකකරුවන් පොලීසියට භාර දුන් බව විමර්ශන නිලධාරීන් අධිකරණයට කරුණු දැක්වීය.
ඉදිරිපත් වූ කරුණු සලකා බැලූ ප්‍රධාන මහේස්ත්‍රාත්වරිය සැකකරුවන් සම්බන්ධයෙන් එම අවස්ථාවේදීම චෝදනා පත්‍රයක් ඉදිරිපත් කරන ලෙසට ගුවන්තොටුපොළ පොලීසියට දන්වා සිටියාය.
ගුවන්තොටුපොළ පොලිසිය මඟින් සිවිල් ගුවන් සේවා ආඥා පනත යටතේ ගුවන් ගමනකට බාධා කිරීම සම්බන්ධයෙන් චෝදනා ඉදිරිපත් කළ අතර එම චෝදනාවන්ට වරද පිළිගත් විත්තිකරුවන් දැඩි සේ අවවාද කර මුදා හැරීමට මහේස්ත්‍රාත්වරිය නියෝග කළාය.
