යාපනය දිස්ත්‍රික් පාර්ලිමේන්තු මන්ත්‍රී අර්චුනා රාමනාදන් මහතා පසුගිය කාලයේදී විවිධ කණ්ඩායම් ඉලක්ක කරමින් අවමන්සහගත හා අශෝභන ලෙස ප්‍රකාශ සිදු කර සමාජය තුළ කැළඹීමක් ඇති කිරීම සැලකිල්ලට ගනිමින් ඔහු පාර්ලිමේන්තුව තුළ සිදු කරන කතා දින අටක කාලයක් ශ්‍රව්‍ය, දෘශ්‍ය හා සමාජ මාධ්‍යවල සජීවීව විකාශය කිරීම අත්හිටුවීමට කථානායක වෛද්‍ය ජගත් වික්‍රමරත්න මහතා ඊයේ (19) නියෝග කළේය.
මේ අනුව පාර්ලිමේන්තු මන්ත්‍රී අර්චුනා රාමනාදන් මහතා පාර්ලිමේන්තුව තුළ සිදු කරන කතා අද (20), හෙට (21), අප්‍රේල් 08, 09, 10 සහ මැයි 06, 07, 08 දිනවල ශ්‍රව්‍ය, දෘශ්‍ය හා සමාජ මාධ්‍යවල විකාශය කිරීම අත්හිටුවීමට තීරණය කර ඇත.
පාර්ලිමේන්තු මන්ත්‍රීවරයා විසින් සිදු කර ඇති අවමන්සහගත ප්‍රකාශ හැන්සාඩ් වාර්තාවෙන් ඉවත් කිරීමට පියවර ගන්නා බව ද කථානායකවරයා ප්‍රකාශ කළේය. ඒ අනුව අද (20) සිට මැයි 08 වැනිදා දක්වා පාර්ලිමේන්තු රැස්වීම් පැවැත්වෙන දින 08 තුළ අර්චුනා මන්ත්‍රීවරයාගේ ප්‍රකාශ වාර්තා කිරීම අත්හිටුවීම ක්‍රියාත්මක වේ.
එම කාලය තුළ මන්ත්‍රීවරයාගේ හැසිරීම අනුව, මෙම තාවකාලික අත්හිටුවීම ඉවත් කිරීම සිදු කරනවා ද? නැද්ද? යන්න සලකා බලන බව ද කථානායකවරයා වැඩිදුරටත් පැවසීය.
කථානායක වෛද්‍ය ජගත් වික්‍රමරත්න මහතා මේ බව සඳහන් කළේ පාර්ලිමේන්තුවේ දිනට නියමිත කටයුතු ආරම්භයේදී විශේෂ ප්‍රකාශයක් සිදු කරමිනි.
වැඩිදුරටත් අදහස් දැක්වූ කථානායකවරයා මෙසේ ද පැවසීය.
“පාර්ලිමේන්තු මන්ත්‍රී (වෛද්‍ය) රාමනාදන් අර්චුනා මහතා විසින් පාර්ලිමේන්තු සභාගර්භය තුළදී හා ඉන් පිටතදී විශේෂයෙන්ම සමාජ මාධ්‍ය භාවිත කරමින් පුද්ගලයන්, පුද්ගල කණ්ඩායම් හා විවිධ සංවිධානවලට එරෙහිව ඉතා පහත් පෙළේ වචන භාවිත කරමින් සිදු කරනු ලැබ ඇති හා සිදු කරමින් පවතින විවිධ මතභේදාත්මක සහ අවමන්සහගත ප්‍රකාශ හේතුවෙන් පෞද්ගලිකව විවිධ පුද්ගලයන්ට සහ විවිධ සමාජ හා ජන කණ්ඩායම්වලට ඇති වී තිබෙන අසහනකාරී තත්ත්වයන් පිළිබඳ මා වෙත විවිධාකාරයෙන් කරන ලද පැමිණිලි කිරීම් පිළිබඳ කථානායකවරයා ලෙස පැහැදිලි කරනවා.
ඒ අනුව, (වෛද්‍ය) රාමනාදන් අර්චුනා මන්ත්‍රීවරයා විසින් පෞද්ගලිකව කාන්තාවන් ඇතුළු විවිධ පුද්ගලයන්, විවිධ සමාජ කණ්ඩායම් සහ ආගමික කණ්ඩායම් ඉලක්ක කරමින් එල්ල කරන ලද විවිධ අවමන්සහගත අශෝභන හා දැඩි මතභේදාත්මක ප්‍රකාශ සම්බන්ධව විවිධ පුද්ගලයින්, විවිධ සමාජ සංවිධාන, එසේම මෙම උත්තරීතර සභාව නියෝජනය කරන ආණ්ඩුව හා විරුද්ධ පාර්ශ්වයේ මහජන නියෝජිතයන් ඇතුළු විවිධ පාර්ශ්වයන් මා වෙත පෞද්ගලිකව පැමිණිලි කොට එකී ප්‍රකාශ සම්බන්ධයෙන් ඔවුන්ගේ දැඩි අප්‍රසාදය, කනස්සල්ල හා කනගාටුව පළ කර තිබෙන අතර, එවැනි ක්‍රියා සම්බන්ධව මෙම උත්තරීතර සභාවේ ප්‍රධානියා වශයෙන් නිසි පියවර ගන්නා ලෙස තමා වෙත මේ වන විටත් ඉල්ලීම් රාශියක් ඉදිරිපත් කර ඇති බව ද දැනුම් දෙමි.
