නාය ගිය මීතොටමුල්ල කුණු කන්ද පෙදෙසේ නාගරික උද්‍යානයක් ඉදිකිරීමට මීතොටමුල්ල පුනර්ජීවන ව්‍යාපෘතිය යටතේ සැලසුම් කළත් එම සැලසුම පරිදි උද්‍යානයක් ඉදිකර නොමැති බව ජාතික විගණන කාර්යාලය කළ භෞතික පරීක්ෂාවෙන් තහවුරුව ඇත.
2017 වසරේ නාය යාමට ලක් වූ කසළ කන්ද ස්ථායීකරණය කිරීමට බ්ලැන්කට් ලේයරයක් යෙදීම හා හරිතාගාර වායු විමෝචන ඒකක ස්ථාපනය කිරීමේ කොන්ත්‍රාත්තුව රුපියල් මිලියන 269.5කට පෞද්ගලික ආයතනයකට දී ඇත්තේ 2020 ජූනි මස 9 වෙනි දිනය.
කෙසේ නමුත් මෙම ව්‍යාපෘතියට රුපියල් මිලියන 441.74ක් අධිකාරිය විසින් දරා ඇතත් සැලසුම් කළ පරිදි උද්‍යානයක් ඉදිකර නොතිබූ අතර ස්ථායීකරණය කරන ලද කසළ පිහිටි ස්ථානය වර්තමානය වන විට වල් බිහි වූ, අත්හැර දැමූ ස්ථානයක් බවට පත්ව ඇතැයි ජාතික විගණන කාර්යාලය නිකුත් කළ වාර්තාවේ සඳහන් වෙයි.
තවද මෙම ස්ථානයේ ස්ථාපිත කිරීමට සැලසුම් කරන ලද අපජලය බැහැර කිරීමේ පද්ධතියේ වැඩ නිමව ඇත්තේ 30%ක් බවත්, වායු විමෝචන පද්ධතියෙන් වැඩ නිමව ඇත්තේ 25%ක් පමණක් බවත් එහි සඳහන් වේ.
ව්‍යාපෘතිය ක්‍රියාත්මක කිරීමට හඳුනාගත් ඉඩමෙන් අක්කර දොළහක ප්‍රමාණයක් ඉඩම් අත්පත් කර ගැනීමේ පනතේ 44 වැනි වගන්තිය ප්‍රකාරව නාගරික සංවර්ධන අධිකාරියට අත්පත් කර ගැනීමේ කටයුතු අවසන් නොවීම හේතුවෙන් යෝජකයකු තෝරා ගැනීම සඳහා වන ක්‍රියාවලිය අවසන් කිරීමට නොහැකිව ඇති බව මේ සම්බන්ධයෙන් විගණනයට අදහස් දක්වමින් කළමනාකාරීත්වය පවසා ඇත.
ඉඩම් අත්පත් කර ගැනීමේ කටයුතු කඩිනම් කර මෙම භූමිය ඵලදායි ආර්ථික සහ පරිසර කටයුත්තකට යොදා ගතයුතු බව විගණනය නිර්දේශ කර ඇත.
