පළාත් පාලන ආයතන ඡන්ද විමසීම සඳහා දේශපාලන පක්ෂ 21ක් සහ ස්වාධීන කණ්ඩායම් 15ක් ඊයේ (19) වන විට නාමයෝජනා භාරදී තිබිණි. නාමයෝජනා භාර ගැනීම පසුගිය 17 ආරම්භ කෙරුණු අතර අද (20) මධ්‍යාහ්න 12.00න් අවසන් වෙයි.
පළාත් පාලන ආයතන 336ක් සඳහා නාමයෝජනා භාර ගන්නා බව මැතිවරණ කොමිෂන් සභාව සඳහන් කළේය.
අද මධ්‍යාහ්න 12.00 සිට පැය එකහමාරක කාලයක් විරෝධතා ගොනු කිරීමට කාලය දී ඇති බව මැතිවරණ කොමිෂන් සභාව සඳහන් කළේය.
අද නාමයෝජනා භාරදීම අවසන්වීමෙන් පසුව පළාත් පාලන ආයතන ඡන්ද විමසීම සඳහා මැතිවරණ දිනය ප්‍රකාශයට පත් කිරීමට නියමිතය. පළාත් පාලන ආයතන ඡන්ද විමසීම සඳහා ඇප තැන්පත් කිරීමේ කටයුතු ඊයේ (19) මධ්‍යාහ්න 12.00න් අවසන් විය. පළාත් පාලන ආයතන ඡන්ද විමසීම සඳහා ඇප තැන්පත් භාර ගැනීම සඳහා දිස්ත්‍රික් ලේකම් කාර්යාවලදී පහසුකම් සපයා තිබුණි.
නාමයෝජනා භාර ගැනීම් ආරම්භ වූ දින සිට සිට දිස්ත්‍රික් මැතිවරණ කාර්යාල ආශ්‍රිතව ආරක්ෂක වැඩපිළිවෙළක්ද පොලීසිය විසින් ක්‍රියාත්මක කර තිබුණි. එම ආරක්ෂක වැඩපිළිවෙළ අද දිනයේදීත් ක්‍රියාත්මක බව පොලිස් මූලස්ථානය සඳහන් කරයි.
