ශ්‍රී ලංකා මහ බැංකුව නුවරඑළිය දිස්ත්‍රික්කයේ සංවිධාන කරනු ලබන ඩිජිටල් ගෙවීම් ප්‍රවර්ධන වැඩසටහන මෙම මස 22 සහ 23 යන දෙදින ශ්‍රී ලංකා මහ බැංකු අධිපති ආචාර්‌ය නන්දලාල් වීරසිංහ මහතාගේ සහභාගීත්වයෙන් නුවරඑළියේදී පවත්වනු ලැබේ.
මෙම වැඩසටහන ග්‍රෙගරි වැව රථ ගාලේදී පැවැත්වෙන අතර ඒ සඳහා බැංකු, මූල්‍ය සමාගම් සහ විදුලි සංදේශ සමාගම් වැනි විද්‍යුත් මුදල් සේවා සපයන්නන් ඇතුළු ජංගම ගෙවීම් යෙදුම් සේවා සපයන්නන් (Mobile Payment Apps Service Providers ) මෙන්ම ක්ෂුද්‍ර, කුඩා හා මධ්‍ය පරිමාණ ව්‍යවසායකයන්ද (MSMEs) සහභාගී වනු ඇත.
මහජනතාවට ඔවුන්ගේ දෛනික අවශ්‍යතා සඳහා මුදල් භාවිතය වෙනුවට ආරක්ෂිතව, පහසුවෙන් සහ අඩු වියදමකින් යුතුව ඩිජිටල් ගෙවීම් සිදු කිරීමට හැකියාව ඇති ජංගම ගෙවීම් යෙදුම් සඳහා ලියාපදිංචි වීමට පහසුකම් මෙහිදී සැලසේ.
මෙම වැඩසටහනට සහභාගී වන වෙළෙඳුන්ගෙන් LANKAQR ගෙවීම් ක්‍රමය භාවිත කර මිලදී ගන්නා භාණ්ඩ සහ සේවා සඳහා සුවිශේෂී වට්ටම් ලබාදෙනු ඇත.
නව ඩිජිටල් ගෙවීම් ක්‍රමවේදයන් පිළිබඳ සිය දැනුම්වත්භාවය වැඩි කර ගැනීමට සහ ජංගම දුරකතන භාවිත කර ඩිජිටල් ගෙවීම් සිදු කරන ආකාරය පිළිබඳ ගෙවීම් යෙදුම් සේවා සපයන්නන්ගෙන් සෘජුවම සහාය ලබා ගැනීමට මෙම ස්ථානයේදී හැකියාව ලැබෙනු ඇත. ශ්‍රී ලංකා මහ බැංකුව මෙම වැඩසටහනට සහභාගි වන ලෙස මහජනතාවට ආරාධනා කර සිටී.
