ශරීරයේ අත්‍යවශ්‍යම මුඛ සෞඛ්‍ය පිළිබඳ අවධානයක් ජනතාවට නැති බවත් රටේ ජනගහනයෙන් 50%ක්ම දත් මදින්නේ දිනකට එක් වරක් පමණක් බවත් ශ්‍රී ලංකා දන්ත වෛද්‍ය සංගමයේ ලෝක මුඛ සෞඛ්‍ය දින කමිටු සභාපති විශේෂඥ වෛද්‍ය නිලන්ත රත්නායක පැවැසීය.
රාත්‍රියේ දී දත් මදින්නේ සෑම දෙදෙනකුගෙන් එක් අයෙක් පමණක් යැයි ද විශේෂඥ වෛද්‍ය නිලන්ත රත්නායක සඳහන් කළේය. බෝනොවන රෝග ලෙස හඳුන්වන මුඛ රෝග අතරින් ලෝක ජනගහනයෙන් සියයට 34ක් පීඩාවට පත්වන්නේ දත් දිරායාමේ රෝගයෙන් බවත් ඒ අනුව ලෝකයේ බෝනොවන බහුලම රෝගය දත් දිරායාම බවත් වෛද්‍ය නිලන්ත රත්නායක මහතා අවධාරණය කළේය.
අදට යෙදෙන ලෝක මුඛ සෞඛ්‍ය දිනය වෙනුවෙන් සෞඛ්‍ය ප්‍රවර්ධන කාර්යාංශයේ ඊයේ (19) පැවැති ප්‍රවෘත්ති සාකච්ඡාවේදී ඔහු ඒ බව පැවැසීය.
දත් දිරායාම ගැටලුවක් සේම පාලනය කිරීමට අපහසු සහ අධ්‍යාපනයට රැකියාවට සහ එදිනෙදා ජීවිතයට විශාල බලපෑම් ඇති කරන සමාජ ගැටලුවක් වී ඇති බවත් දත් කුහර ඇතිවී දත් දිරායාමේ රෝග තත්ත්වයට වැඩි වශයෙන් ගොදුරු වන්නේ වයස අවුරුද 5ට අඩු දරුවන් බවත් එය 65%ක ප්‍රතිශතයක් බවත් ඔහු පෙන්වා දුන්නේය.
