යුරෝපා සංගමයේ, ශ්‍රී ලංකා තානාපතිනි කාමෙන් මොරිනෝ (Carmen Moreno) මහත්මිය පසුගියදා (17) ශ්‍රී ලංකා පාර්ලිමෙන්තුවේ කථානායක වෛද්‍ය ජගත් වික්‍රමරත්න මහතා හමු වූවාය.
යුරෝපා පාර්ලිමේන්තුව හා ශ්‍රී ලංකා පාර්ලිමේන්තුව අතර අන්තර් සහයෝගිතාවක් ඇති කරගනිමින් ඉදිරියේදී කටයුතු කිරීමට ඇති හැකියාවන් පිළීබදව මෙම හමුවේ දී මූලික වශයෙන් සාකච්ඡා කරන ලදී.
මීට අමතරව මෙම අවස්ථාවේ දී අදහස් දැක්වූ යුරෝපා සංගමයේ තනාපතිවරිය ශ්‍රී ලංකාවේ නව දේශපාලන පරිවර්තනය හා නව දේශපාලන සංස්කෘතිය පිළිබදව තම ශුභාසිංශන පිරිනැමුවාය.
රටේ වත්මන් දේශපාලන තත්ත්වය, සංචාරක කර්මාන්තය වැනි ක්ෂේත්‍ර පිළිබඳවත්, යුරෝපා සංගමයට අයත් රටවල සංචාරකයන් ශ්‍රී ලංකාවේ සංචාරය කිරීමට යොමු වීම පිළිබදවත් මෙහිදී වැඩිදුරටත් සාකච්ඡා කෙරිණි. පාර්ලිමේන්තු පරිශ්‍රයේ පැවති මෙම රැස්වීමට පාර්ලිමේන්තු මහලේකම් කුෂානි රෝහණදීර මහත්මිය ද සහභාගි වූවාය.
