පොඩි දුවට උණ හැදිලා ලොකු දුවත් එක්ක කඹගමුව ග්‍රාමීය රෝහලට බෙහෙත් ගන්න ආවා. වැඩ වර්ජනය හින්දා බෙහෙත් ගන්න බැරි වුණා. දුව නතර කර ගත්තේ නෑ. පස්සේ ගෙදර ගිහින් උණ අඩු වෙන්න කියා හිතාගෙන ගෙදර තිබුණු සිරප් එකක් බොන්න දුන්නා. ටික වෙලාවකට පස්සේ දරුවාගේ ඇඟ කඩා වැටෙන්න වගේ වුණා.Ó සෞඛ්‍ය වෘත්තිකයන් පෙරේදා (18) කළ වැඩ වර්ජනය හේතුවෙන් නිසි ප්‍රතිකාර නොලැබී මිය ගිය අවුරුද්දක් වයසැති බිලිඳියකගේ මරණය සම්බන්ධයෙන් ඊයේ (19) පැවති මරණ පරීක්ෂණයේදී බිලිඳියකගේ මව වන කේ.ජී. ප්‍රියංකා මහත්මිය එසේ පැවසුවාය.
මෙලෙස මිය ගොස් ඇත්තේ බුලත්කොහුපිටිය පොලිස් වසමේ කඹගමුව පදිංචිව සිටි අංගොඩ විදානලාගේ මොෂදි අශිංශනා බණ්ඩාර නමැති අවුරුද්දක් වයසැති බිලිඳියකි.
උණ වැලඳීම හේතුවෙන් පෙරේදා (18) බිලිඳිය කඹගමුව ග්‍රාමීය රෝහලට ප්‍රතිකාර ගැනීමට රැගෙන ගොස් ඇත. සෞඛ්‍ය සේවා වෘත්තිකයන් පිරිසක් විසින් කළ වැඩ වර්ජනය හේතුවෙන් බිලිඳාව රෝහලට ඇතුළත් කරගෙන නැත. නිසි ප්‍රතිකාරයක්ද බිලිඳාට නොලැබුණු පසුබිමක මව විසින් බිලිඳාව රැගෙන නි‍ෙවසට පැමිණ ඇත. එහිදී නි‍ෙවසේ තිබුණු සිරප් ඒකක් බිලිඳාට ලබාදී තිබේ. එහිදී බිලිදාගේ රෝගී තත්ත්වය උත්සන්න වීම හේතුවෙන් නැවතත් කඹගමුව ග්‍රාමීය රෝහලට රැගෙනවිත් ඇත. එවර බිලිඳාව රෝහලට ඇතුළත් කර වැඩිදුර ප්‍රතිකාර සඳහා කෑගල්ල මහ රෝහලට මාරු කර යවා ඇත. කෑගල්ල රෝහලේ හදිසි ප්‍රතිකාර ඒකකයේ මූලික ප්‍රතිකාර ලබා දෙමින් සිටිය දී බිලිඳා මියගොස් ඇත්තේ එදින සවසය.
බිලිඳියගේ මරණය සම්බන්ධයෙන් වූ හදිසි මරණ පරීක්ෂණය ඊයේ (19) කෑගල්ල හදිසි මරණ පරීක්ෂක රේණුකා සුබෝධනී කළුආරච්චි නිශ්ශංක මහත්මිය ඉදිරියේදී කෑගල්ල මහ රෝහලේ අධිකරණ වෛද්‍ය ඒකකයේ දී සිදු කෙරිණි.
එහිදී වැඩිදුරටත් මිය ගිය දැරියගේ මව වන කේ.ජී. ප්‍රියංකා මහත්මිය මෙසේද පැවසුවාය.
Òසැමියා අංගොඩ විදානලාගේ නුවන් කුමාර. සැමියාට ස්ථිර රැකියාවක් නෑ. බුලත්කොහුපිටිය කෑගල්ල මාර්ගයේ කඹගමුව නගරයට ආසන්නව ආප්ප පුච්චලා අලෙවි කරනවා. අපට ගැහැනු දරුවන්ම තුන් දෙනයි. ලොකු දුව අංගොඩ විදානලාගේ නිෂාරා දෙවින්දි බණ්ඩාර. ලොකු දුව ගැටියමුල්ල ජාතික පාසලේ හත්වන ශ්‍රේණියේ ඉගෙනුම ලබනවා. දෙවැනි දුව කන්‍යා භාතිෂි බණ්ඩාර. දෙවැනි දුව පළමු ශ්‍රේණියේ ඉගෙනුම ලබනවා. මිය ගිය තෙවැනි දුව 2024 මාර්තු 24 වැනිදා උපත ලැබුවා.
සතියකට පමණ ඉහතදී කැස්ස සෙම හැදිලා බුලත්කොහුපිටියේ පෞද්ගලික වෛද්‍යවරයකුට පෙන්වලා බෙහෙත් ගත්තා. පස්සේ දුවට අඩු වෙලා තිබුණා.
18 වැනිදා නැවත උණ හැදුණා. පස්සේ ලොකු දුවත් එක්ක කඹගමුව ග්‍රාමීය රෝහලට ආවා. එදා වර්ජන නිසා බෙහෙත් ගන්න බැරිව ගියා. පස්සේ මම ආපසු ගෙදර ගිහින් උණට තිබුණු සිරප් එකෙන් දුන්නා. පස්සේ දුවගේ ඇඟ කඩා වැටෙනවා දැක්කා. පස්සේ සවස 3.30ට පමණ යළි දුව කඹගමුව ග්‍රාමීය රෝහලට ගෙනාවා. එතැනදී බෙහෙතක් දීලා ගිලන් රථයෙන් වැඩිදුර ප්‍රතිකාර සඳහා කෑගල්ල මහ රෝහලට මාරු කර එව්වා. කෑගල්ල මහ රෝහලේ හදිසි ප්‍රතිකාර ඒකකයේ මූලික ප්‍රතිකාර ලබා දෙමින් සිටිය දී සවස 6.45ට පමණ දුව මිය ගිහින් තියෙනවා. නමුත් දුව මිය ගියා කියා රාත්‍රි 8.30ට පමණ තමයි මට කිව්වේ. පස්සේ මම ගෙදර ගියා.
19 වැනිදා පෙරවරුවේ දේහය හඳුනාගෙන මරණ පරීක්ෂණයට පෙනී සිටියා. මරණය සැකයක් නෑ. නමුත් කඹගමුව ග්‍රාමීය රෝහලේ දුව නතර කර ගත්තා නම් මිය යන එකක් නෑ කියා හිතනවා.Ó
මිය ගොස් සිටි බිලිඳියගේ පශ්චාත් මරණ පරීක්ෂණය ඊයේ (19) කෑගල්ල මහ රෝහලේ විශේෂඥ අධිකරණ වෛද්‍ය නිලධාරි වෛද්‍ය රුචිර නදීර මහතා විසින් සිදු කරන ලදි. ශරීර කොටස් වැඩිදුරටත් පරීක්ෂණවලට යොමු කර ඇති බැවින් වෛද්‍ය වාර්තාව පැමිණෙන තෙක් විවෘත තීන්දුවක් දෙන බව කෑගල්ල හදිසි මරණ පරීක්ෂක රේණුකා සුබෝධනී කළුආරච්චි නිශ්ශංක මහත්මිය තීන්දු කළාය.
බුලත්කොහුපිටිය පොලීසියේ පොලිස් කොස්තාපල් ආර්.ඩී.පී.එම්. රාජපක්ෂ (99993) නිලධාරියා විමර්ශන කටයුතු සිදු කළේය.
