බිරිය හා තුන් නිවුන් දරුවන් ඇතුළු හයකට බරපතළ තුවාල
වෑන් රිය සිමෙන්ති ලොරියක ගැටිලා
මධ්‍යම අධිවේගී මාර්ගයේ මීරිගමදී පෙරේදා (18) මධ්‍යම රාත්‍රියේ සිදු වූ රිය අනතුරකින් කැලණිය විශ්වවිද්‍යාලයේ මනෝවිද්‍යා ඒකක ප්‍රධානී ජ්‍යෙෂ්ඨ කථිකාචාර්ය ආචාර්ය එන්.ඩී. ගුණේන්ද්‍ර ගයන්ත (45) මහතා මියගොස් ඔහුගේ බිරිය හා තුන් නිවුන් දරුවන් ඇතුළු හය දෙනෙකු බරපතළ තුවාල ලබා ඇත. මාකොළ දකුණ ප්‍රදේශයේ පදිංචිකරුවකු වන කැලණිය විශ්වවිද්‍යාලයේ දර්ශන අධ්‍යයන අංශයේ මනෝවිද්‍යා ඒකක ප්‍රධානී, ජ්‍යෙෂ්ඨ කථිකාචාර්ය ආචාර්ය එන්.ඩී. ගුණේන්ද්‍ර ගයන්ත මහතා සිය පවුලේ සාමාජිකයන් පිරිසක් සමඟ කුලී වෑන් රියකින් යාපනයේ ගොස් ආපසු නි‍ෙවස බලා එමින් සිටියදී මේ අනතුරට මුහුණ පා ඇතැයි පොලිස් පරීක්ෂණයේදී අනාවරණය වී තිබේ.
මීරිගම සිට කිලෝමීටර් පහක් පමණ කුරුණෑගල දෙසට වන්න මාර්ගයේ බෝයවලානට නුදුරු ප්‍රදේශයේ දී මේ අනතුර සිදුව ඇත.
මීරිගම දෙසට ගමන් කරමින් තිබූ සිමෙන්ති ප්‍රවාහනය කරන ලොරියක් හා වෑන් රිය ගැටීමෙන් මේ අනතුර සිදුවී ඇතැයි මූලික පොලිස් පරීක්ෂණවලදී හෙළි වී තිබේ.
පිටුපසින් ගමන් කළ වෑන් රථය ඉදිරියෙන් ගමන් කළ ලොරියේ ගැටී ඇතැයි පොලීසිය කියයි.
අනතුර සිදුවීමෙන් පසු කුරුණෑගල සිට මීරිගම දෙසට ගමන් කරමින් සිටි එංගලන්තයේ වෙසෙන ශ්‍රී ලාංකිකයන් පිරිසක් මැදිහත් වී තුවාලකරුවන් මීරිගම මූලික රෝහල වෙත ඇතුළත් කිරීමට පියවර ගෙන තිබේ. තුවාලකරුවන් අතර ආචාර්යවරයාගේ බිරිය දරුවන් තිදෙනා නැන්දණිය සහ වාහනයේ රියැදුරා ද වෙති.
තුවාලකරුවන් බරපතළ තත්ත්වයේ පසුවන බැවින් ඔවුන්ගෙන් සිවු දෙනෙක් රාත්‍රියේම කොළඹ ජාතික රෝහල වෙත මාරු කර යැවීමට පියවර ගත් බව මීරිගම රෝහල් ප්‍රකාශකයෙක් සඳහන් කළේය. එක් තුවාලකරුවකු වතුපිටිවල රෝහලට මාරුකර ඇත.
අනතුරට ලක් වූ ලොරිය හා වෑන් රථය ඊයේ (19) අලුයම් කාලය වන විට මීරිගම පොලීසිය වෙත ගෙන ඒමට පියවර ගැනිණි. මියගිය අයගේ දේහය පිළිබඳ මරණ පරීක්ෂණය ඊයේ (19) මීරිගම හදිසි මරණ පරීක්ෂක ප්‍රභාත් රණතුංග මහතා ඉදිරියේ මීරිගම පොලීසියේ සැරයන් (68427) කරුණාරත්න සහ රෝහල් පොලීසියේ සැරයන් (8612) මහින්ද මහත්වරුන්ගේ මෙහෙයවීම යටතේ පැවැත්විණි.
අනතුර සම්බන්ධයෙන් නාකුළුගමුව අන්තර් හුවමාරු මධ්‍යම අධිවේගී මාර්ග පොලීසිය මඟින්ද පරීක්‍ෂණ පවත්වයි.
අනතුරට පත් වෑන් රථය
සිමෙන්ති ලොරිය
යාපනයේදී ගත් පවුලේ ඡායාරූපයක්
