වෘත්තීය සමිතිවල ඉල්ලීමක් හෝ බලකිරීමක් නොමැතිව ඉතිහාසයේ රජයක් විසින් ලබාදුන් වැඩිම වැටුප් වැඩිකිරීම සිදුකර තිබියදී සෞඛ්‍ය වෘත්තිකයන්ගේ වැඩවර්ජන අනුමත කළ නොහැකි බව ජනාධිපති අනුර කුමාර දිසානායක මහතා පැවසීය.
ජනාධිපතිවරයා මේ බව කියා සිටියේ විශේෂඥ වෛද්‍යවරුන්ගේ සංගමයේ නිලධාරීන් සහ රාජ්‍ය සේවා එක්සත් හෙද සංගමය සමඟ ඊයේ (19) ජනාධිපති කාර්යාලයේ දී පැවති හමුවීමකදීය.
මෙවර අය-වැයෙන් සිදු කරන ලද මූලික වැටුප් වැඩි කිරීම, වැඩි කළ සමස්ත වැටුපට අනුරූපීව මේ වසරේ සිටම විශ්‍රාම වැටුප් තලය ඉහළ දැමීම, දීමනා ලබා දීම, ආදායම් බදු සීමාව ඉහළ නැංවීම පිළිබඳව රාජ්‍ය සේවයේ විශාල පිරිසකයේ පැසසුමට ලක්වන බවත් ඒ පිළිබඳ නව රජයේ උනන්දුව අගය කරන බවත් ඔවුහු ජනාධිපති අනුර කුමාර දිසානායක මහතාට සිය ප්‍රසාදය පළ කළහ.
විශේෂඥ වෛද්‍ය සේවය සඳහා සේවා ව්‍යවස්ථාවක් සැකසීම මෙන්ම, වෘත්තීය ගැටලු පිළිබඳව ද විශේෂඥ වෛද්‍යවරුන්ගේ සංගමයේ නිලධාරින් විසින් ජනාධිපති අනුර කුමාර දිසානායක මහතාගේ අවධානයට මෙහිදී යොමු කරන ලදි.
සෞඛ්‍ය සේවකයන්ගේ ආරක්ෂාව ඇතුළු කරුණු රැසක් සහිත යෝජනා මාලාවක්ද මෙහිදී විශේෂඥ වෛද්‍යවරුන්ගේ සංගමයේ නිලධාරින් විසින් ජනාධිපතිවරයා වෙත ඉදිරිපත් කරන ලදි.
ඉතිහාසයේ දී විවිධ රජයන් ණය ලබා ගැනීමේදී එම ණය ආපසු ගෙවීමේදී ආර්ථිකයට සිදුවන ගැඹුරු බලපෑම අවධානයට ලක් නොකර ණය ලබා ගෙන ඇති බවත්, තම රජය එවැනි අවිධිමත් ණය ලබා ගැනීම් හෝ අවිධිමත් ආර්ථික ක්‍රියාකාරකම් සිදු නොකරන බවත්, ආර්ථික තිරසාරත්වය කෙරෙහි සිය රජයේ ඉහළම අවධානය යොමුකර ඇති බවත් ජනාධිපතිවරයා විශේෂඥ වෛද්‍යවරුන්ගේ සංගමයේ නිලධාරින් සමඟ පැවැති සාකච්ඡාවේදී පැවසීය.
මෙවර අය-වැය දත්ත මත පදනම්ව විද්‍යාත්මකව හා සැලසුම් සහගතව ක්‍රියාත්මක වන අය වැයක් බවද ජනාධිපති අනුර කුමාර දිසානායක මහතා ඒහිදී ප්‍රකාශ කළේය.
රජයේ වියදම් සීමා තුළ සිටින ආර්ථිකයක වුවද රාජ්‍ය සේවය කාර්යක්ෂමව යොදා ගැනීම, කුසලතා සහිත පිරිස් ආකර්ෂණය කර ගැනීම හා රාජ්‍ය සේවය දිරිගැන්වීම පිණිස මෙවර අය-වැයෙන් රාජ්‍ය සේවක මූලික වැටුප් වැඩි කිරීම කෙරෙහි රජයේ අවධානය යොමු වූ බව රාජ්‍ය සේවා එක්සත් හෙද සංගමයේ නියෝජිතයන්ට ජනාධිපතිවරයා පෙන්වා දුන්නේය.
මෙවර අය-වැයෙන් ආකාර 6ක් යටතේ වැටුප් ඉහළ නංවා ඇති බව ප්‍රකාශ කළ ජනාධිපතිවරයා, මූලික වැටුප අවම වශයෙන් රු.15,000කින් වැඩි කිරීම, අතිකාල දීමනා වැඩි කිරීම, නිවාඩු දින දීමනා වැඩි කිරීම, වැටුප් වර්ධක 80%කින් වැඩි කිරීම, වැඩි කළ සමස්ත වැටුපට අනුරූපීව මේ වසරේ සිටම විශ්‍රාම වැටුප් තලය ඉහළ දැමීම සහ උපයන විට බදු ගෙවීම් සීමාව ඉහළ දැමීම සිදු කර ඇති බවද ජනාධිපති අනුර කුමාර දිසානායක මහතා පෙන්වා දුන්නේය. රාජ්‍ය සේවා එක්සත් හෙද සංගමයේ සභාපති මුරුත්තෙට්ටුවේ ආනන්ද ස්වාමීන් වහන්සේ, සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස, ජනාධිපති ලේකම් ආචාර්ය නන්දික සනත් කුමානායක මහත්වරු මේ සඳහා එක් වූහ.
