ගෝලීය වශයෙන් මෙන්ම දේශීය වශයෙන් ආර්ථික ක්ෂේත්‍රයට කාන්තා සහභාගිත්වය වැඩි කරගැනීමේ දැඩි අවශ්‍යතාවක් ඇති බව අගමැතිනි, ආචාර්ය හරිනි අමරසූරිය මෙ‍ෙණවිය පැවැසුවාය.
මුදල්, ක්‍රමසම්පාදන හා ආර්ථික සංවර්ධන අමාත්‍යාංශය, ආසියානු සංවර්ධන බැංකුව හා ඒකාබද්ධව සංවිධානය කරන ලද කාන්තා ව්‍යවසායක මූල්‍ය කේතය (WE Finance Code) එළිදැක්වීමේ උත්සවයට ඊයේ (19) එක්වෙමින් අගමැතිවරිය මේ බව සඳහන් කළාය.
ආර්ථිකයට දායක වන පුරුෂ පාර්ශ්වයේ ක්‍රියාකාරී ප්‍රතිශතය ගෝලීය වශයෙන් 72%ක්, දේශීය වශයෙන් ගත්තත් 71%ක් වන බවත් නමුත් ඊට සාපේක්ෂව කාන්තා සහභාගිත්වය ප්‍රතිශතය ලෙස පිළිවෙළින් 47% සහ 32%ක්, ශ්‍රමබළකා සහභාගිත්වයට ස්ත්‍රී පුරුෂ සමාජභාවයේ විෂමතාව දැඩි ලෙස බලපෑම් ඇතිකර තිබෙන බව මෙමඟින් පැහැදිලි වන බවත් අගමැතිවරිය කියා සිටියාය.
කාන්තාවන්ට ව්‍යවසායිකාවන් ලෙස නැඟී සිටින්න බාධාවක් වන මූල්‍ය ප්‍රවේශය, වෙළෙඳපොළ, ශ්‍රම පුහුණු සහ තාක්ෂණික වශයෙන් පවතින ව්‍යුහාත්මක අවහිරතා ඉවත් කිරීම ඉතාම වැදගත් බවද අගමැතිවරිය කීවාය.
අගමැතිවරිය වැඩිදුරටත් මෙසේද පැවැසුවාය.
“පොදු ප්‍රවාහනය තුළත්, සේවා ස්ථාන තුළත් පවතින අනාරක්ෂිත බව නිසා පමණක් නොව සමාජ-සංස්කෘතික සම්මතයන් මඟින් බිහිකරගත් ගෘහස්ථ වගකීම් සමූහයක් කාන්තාව මත පැටවීම හේතුවෙන් ශ්‍රී ලංකාවේ කාන්තාවන්ට අමතර අභියෝගවලට මුහුණ දීමට සිදු වී තිබෙනවා.
ගෝලීය වශයෙන් විධිමත් ක්ෂුද්‍ර, කුඩා සහ මධ්‍ය පරිමාණ ව්‍යාපාර (MSME) වෙනුවෙන් ඩොලර් ට්‍රිලියන 5.2ක් වගේම අවිධිමත් ක්ෂුද්‍ර, කුඩා සහ මධ්‍ය පරිමාණ ව්‍යාපාර සඳහා ඩොලර් ට්‍රිලියන 2.9ක ගෝලීය මූල්‍ය පරතරයක් ඇති බව ජාත්‍යන්තර මූල්‍ය සංස්ථාව සඳහන් කර තිබෙනවා.
ක්ෂුද්‍ර, කුඩා සහ මධ්‍ය පරිමාණ ව්‍යාපාර සම්බන්ධයෙන් ශ්‍රී ලංකාවේ මූල්‍ය පරතරය ඩොලර් බිලියන 17ක් පමණ වෙනවා. එය රටේ දළ දේශීය නිෂ්පාදනයෙන් 21%ක්, කාන්තාවන් විසින් මෙහෙයවනු ලබන ක්ෂුද්‍ර, කුඩා සහ මධ්‍ය පරිමාණ ව්‍යාපාර අසමාන්‍ය ලෙස බලපෑමට ලක්වීම මේ සඳහා ප්‍රධාන හේතුවක් වී තිබෙනවා.
කාන්තා ව්‍යවසායකයන් සඳහා වන මූල්‍ය පරතරය ඉවත් කිරීම මඟින් ගෝලීය ආර්ථික වටිනාකමට අමෙරිකානු ඩොලර් ට්‍රිලියන 5-6ක අමතර ආර්ථික වර්ධනයක් ලබා ගැනීමට හැකි වෙනවා.
