වගා බිම් ආරක්ෂා කරගැනීම සඳහා ගොවීන්ට නිකුත් කරන අලි වෙඩි මසුන් මැරීමට යොදා ගන්නා බවට ලද පැමිණිලි සලකා බැලීමෙන් පසු අලි වෙඩි වෙනත් පුද්ගලයන් අතට පත්වීම වැළැක්වීම සඳහා කඩිනම් පියවර ගන්නා ලෙස මහනුවර දිස්ත්‍රික් ලේකම් ඉන්දික උඩවත්ත මහතා මිනිපේ හා විල්ගමුව ප්‍රාදේශීය ලේකම්වරුන්ට උපදෙස් දුන්නේය.
මිනිපේ ප්‍රාදේශීය ලේකම් කාර්යාලයේදී පැවැති මිනිපේ කන්න රැස්වීමේදී මහනුවර දිස්ත්‍රික් ලේකම්වරයා මෙම දැනුම් දීම කළේය.
මිනිපේ මහා වාරි ව්‍යාපාරයේ වගා බිම් රැක ගැනීම සඳහා ගොවීන් වෙත වනජීවී සංරක්ෂණ දෙපාර්තමේන්තුව නිකුත් කරන අලි වෙඩි මහවැලි ගඟට දමා ඇතැම් පිරිස් මසුන් අල්ලන බවට පැමිණිලි ගණනාවක් ලැබී තිබෙන බව මෙහිදී ඉන්දික උඩවත්ත මහතා අනාවරණය කළේය.
වගාබිම් වන අලින්ගෙන් ආරක්ෂා කරගැනීම සඳහා වනජීවී සංරක්ෂණ දෙපාර්තමේන්තුව ගොවීන් වෙත වරකට අලි වෙඩි දෙක බැගින් නිකුත් කරන බවත් එය ජාතික හැඳුනුම්පත ඉදිරිපත් කරන ගොවීන්ට පමණක් ලබා දෙන බවත් වනජීවී සංරක්ෂණ දෙපාර්තමේන්තුවේ මහනුවර දිස්ත්‍රික් වනජීවී අඩවි ආරක්ෂක ඩබ්ලියු.ඒ. මහින්ද විජේසිංහ මහතා මෙහිදී පැවසුවේය.
මෙයට අමතරව වනජීවී නිලධාරීන් රාත්‍රී මුර සංචාරයන්හි නිරත වෙත්දී වගාබිම් ආරක්ෂා කරමින් සිටින ගොවීන්ට අලි වෙඩි නිකුත් කරන බවත් ඇතැම් පිරිස් මෙම අලි වෙඩි අවභාවිත කරමින් මසුන් මැරීම සඳහා යොදා ගන්නා බවත් ඒ මහතා අවධාරණය කළේය.
වනජීවී දෙපාර්තමේන්තුව ඉදිරිපත් කළ කරුණු සලකා බැලීමෙන් පසු ගොවීන්ගේ ස්ථිර පදිංචිය සලකා බලමින් අලි වෙඩි නිකුත් කිරීමේ කාර්යය සඳහා ප්‍රාදේශීය ලේකම් කාර්යාලවල මැදිහත්වීම ලබා දෙන මෙන් විල්ගමුව ප්‍රාදේශීය ලේකම් එච්.එම්. ඉලුකා සිරිවර්ධන සහ මිනිපේ ප්‍රාදේශීය ලේකම් ඒ.ඩී. තිලකරත්න මහත්මීන්ට දිස්ත්‍රික් ලේකම්වරයා උපදෙස් දුන්නේය.
ඉදිරි කන්නයේ වගා කටයුතු වෙනුවෙන් පැවැති මෙම රැස්වීම සඳහා මාතලේ දිස්ත්‍රික් ලේකම් තේජානි තිලකරත්න, මහනුවර අතිරේක දිස්ත්‍රික් ලේකම් නිලූකා බුලත්ගේ, වාරිමාර්ග දෙපාර්තමේන්තුවේ මහනුවර දිස්ත්‍රික් සහකාර අධ්‍යක්ෂ සුදත් ගමගේ, මිනිපේ නේවාසික කළමනාකාර එස්.එච්.එල්.දයාපාල, ඒකාබද්ධ ජාතික ගොවි සංවිධානයේ සභාපති සුනිල් ගමගේ යන මහත්ම මහත්මීන් ඇතුළු පිරිසක් සහභාගි වූහ.
