ජාත්‍යන්තර වනාන්තර දිනය හෙට (21) දිනට යෙදී තිබේ. ආහාර සුරක්ෂිතතාව, පෝෂණය සහ ජීවනෝපාය කෙරෙහි වනාන්තර මඟින් දක්වන දායකත්වය අගයමින් ‘වනාන්තර සහ ආහාර’ තේමාවෙන් මෙවර ජාත්‍යන්තර වනාන්තර දිනය සමරනු ලබයි.
මේ නිමිත්තෙන් පැවැත්වෙන සමාරම්භක උත්සවය පරිසර ඇමැති, වෛද්‍ය ධම්මික පටබැඳි සහ පරිසර නියෝජ්‍ය ඇමැති ඇන්ටන් ජයකොඩි මහත්වරුන්ගේ ප්‍රධානත්වයෙන් හෙට (21) උදේ 9.30ට කොළඹ දිස්ත්‍රික්කයේ බරාව, වටරැක දී පැවැත්වීමට නියමිතය.
එහිදී බරාව, වටරැක, පුස්සල්ලෑ ඔය ආශ්‍රිතව පිහිටි රජයේ ඉඩමක හෙක්ටයාර් 0.4ක් වූ භූමියක ආහාර සපයන ශාක ඇතුළුව දේශීය ශාක වගා කිරීමට සැලසුම් කර ඇත. එම ශාකවල පලදාව වනාන්තර ආශ්‍රිත ප්‍රජාවට අනාගතයේදී පරිභෝජනය කිරීමට හැකි වන ලෙස මේ වැඩසටහන සැලසුම් කර තිබේ.
එමෙන්ම ජාත්‍යන්තර වනාන්තර දිනය නිමිත්තෙන් රට පුරා රුක්රෝපණ වැඩසටහන් සහ දැනුම්වත් කිරීමේ වැඩසටහන් රැසක් ද වන සංරක්ෂණ දෙපාර්තමේන්තුවෙන් සංවිධාන කර ඇත. ජාත්‍යන්තර වනාන්තර දිනයේ තේමාව සහ එක්සත් ජාතීන්ගේ දේශගුණික විපර්යාස පිළිබඳ ශ්‍රී ලංකාවේ ජාතික වශයෙන් නීර්ණය කළ දායකත්ව අරමුණු සාක්ෂාත් කරගැනීමට වන සංරක්ෂණ දෙපාර්තමේන්තුව විසින් සියලුම දිස්ත්‍රික්කවල රුක්රෝපණ වැඩසටහන් සහ දැනුම්වත් කිරීමේ වැඩසටහන් ක්‍රියාත්මක කිරීමට සැලසුම් කර ඇත.
