රජයේ ප්‍රමුඛ වැඩසටහනක් ලෙස ක්‍රියාත්මක ක්ලීන් ශ්‍රී ලංකා වැඩසටහනට මෙවර අය-වැයෙන් වෙන් කළ රුපියල් බිලියන 05ක ප්‍රතිපාදන එහි මූලික අරමුණු සාක්ෂාත් කරගැනීම වෙනුවෙන් ඵලදායීව යෙදවීම පිළිබඳ සාකච්ඡාවක් පැවැත්විණි.
මේ සාකච්ඡාව එම වැඩසටහනේ අතිරේක ලේකම් ඉංජිනේරු එස්. පී. සී. සූගීෂ්වර මහතාගේ ප්‍රධානත්වයෙන් පෙරේදා (18) කොළඹදී පැවැත්විණි.
ඊට අදාළව ඒ ඒ ආයතන මඟින් ක්‍රියාත්මක කිරීමට යෝජිත වැඩසටහන්වල සැලසුම්, එහිදී මතුව ඇති අභියෝග සහ මූල්‍යමය අවශ්‍යතා පිළිබඳව ද දීර්ඝ ලෙස සාකච්ඡා කෙරිණි.
ඒ අනුව අදාළ අමාත්‍යාංශ සහ දෙපාර්තමේන්තු වෙත ප්‍රමුඛතා හඳුනා ගනිමින් මූල්‍ය ප්‍රතිපාදන වෙන් කිරීම පිළිබඳ පුළුල් ලෙස විමසා බැලිණි.
රට තුළ ආචාර්ධර්ම, සාමාජයීය, පාරිසරික යන සියලු ක්ෂේත්‍රවල නව පරිවර්තනයක් අපේක්ෂා කරමින් ක්ලීන් ශ්‍රී ලංකා වැඩසටහන මේ වන විට දීප ව්‍යාප්තව ක්‍රියාවට නංවා තිබේ.
ප්‍රවාහන, මහාමාර්ග, වරාය හා සිවිල් ගුවන් සේවා අමාත්‍යාංශය, ශ්‍රී ලංකා ප්‍රවාහන මණ්ඩලය, විදේශ සබඳතා, විදේශ රැකියා සහ සංචාරක අමාත්‍යාංශය, ඩිජිටල් ආර්ථික අමාත්‍යාංශය, නාගරික සංවර්ධන ඉදිකිරීම් හා නිවාස අමාත්‍යාංශය, පළාත් සභා සහ පළාත් පාලන අමාත්‍යාංශය යන අමාත්‍යාංශ සහ මුදල් කොමිසම, බස්නාහිර පළාත් මහ නගර සභාව, බස්නාහිර පළාත් අපද්‍රව්‍ය කළමනාකරණ අධිකාරිය යන රේඛීය ආයතන නියෝජනය කරමින් ජ්‍යෙෂ්ඨ නිලධාරීන් ඇතුළු ක්ලීන් ශ්‍රී ලංකා වැඩසටහනේ නිලධාරීහු මේ සාකච්ඡාවට එක්ව සිටියහ.
