හිටපු ඇමැති කෙහෙළිය රඹුක්වැල්ලගේ නිවෙසට පහරදීම නිසා සිදු වූ හානිය වෙනුවෙන් පසුගිය ආණ්ඩුව ගෙවන ලද රුපියල් ලක්ෂ 959ක වන්දි මුදල බැර කර ඇති පාර්ලිමේන්තු ශාඛාවේ ජංගම ගිණුම අත්හිටුවමින් දී ඇති අධිකරණ නියෝගය අහෝසි කරන ලෙස කළ ඉල්ලීම කොළඹ ප්‍රධාන මහාධිකරණ විනිසුරු ආදිත්‍යය පටබැඳී මහතා ඊයේ (19) නිෂ්ප්‍රභ කළේය.
අල්ලස් හෝ දූෂණ කොමිසම සිදු කරන විමර්ශනයකට අදාළව කොළඹ මහාධිකරණය හිටපු සෞඛ්‍ය ඇමැති කෙහෙළිය රඹුක්වැල්ලගේ සහ ඔහුගේ පවුලේ උදවියට අයත් දේපොළ, බැංකු ගිණුම් සහ රක්ෂණ ගිවිසුම් කිහිපයක් පසුගිය සැප්තැම්බර් මස සිට අත්හිටුවා තිබේ. වන්දි මුදලට අමතරව හිටපු ඇමැතිවරයාගේ මන්ත්‍රී විශ්‍රාම වැටුප ද බැරව ඇත්තේ අත්හිටුවා ඇති රාජ්‍ය බැංකුවකට අයත් පාර්ලිමේන්තු ශාඛාවේ ගිණුමටය. වගඋත්තරකරුගේ දියණියක වූ චමිත්‍රී ජයනිකා රඹුක්වැල්ල නමැති තැනැත්තිය නීතිඥයන් මාර්ගයෙන් මෝසමක් ගොනු කරමින් බැංකු ගිණුම් තහනම ඉවත් කරන ලෙස ඉල්ලීමක් කරන ලදී. එම ඉල්ලීමට අල්ලස් හෝ දූෂණ කොමිසම බලවත් ලෙස විරුද්ධත්වය ප්‍රකාශ කරමින් අත්හිටුවා ඇති ගිණුමට මෙම මුදල් ලැබීම්වලට අතිරේකව වෙනත් මුලාශ්‍රවලින් මුදල් ලැබී ඇති බවත් ඒ පිළිබඳ පරීක්ෂණ සිදුවන බවත් පෙන්වා දුන්නාය.
අදාළ මුදල් වෙනත් බැංකු ගිණුමකට බැර කළ හැකි දැයි උසාවිය විමසා සිටි අවස්ථාවේ බැංකු ගිණුමක් ආරම්භ කිරීමේදී මතුව ඇති ගැටලු සහගත තත්ත්වය පිළිබඳ වගඋත්තරකාර පාර්ශ්වයේ නීතිඥයන් අධිකරණයේ අවධානය යොමු කර සිටියේය.
ඉදිරිපත් වූ කරුණු සලකා බැලූ අධිකරණය නියෝගය නිකුත් කිරීම ඊයේ (19) දක්වා කල් තැබුවේය.
අල්ලස් කොමිසම විසින් සිදු කරන විමර්ශනයකට අදාළව කොළඹ මහාධිකරණය විසින් හිටපු ඇමැති කෙහෙළිය රඹුක්වැල්ලට අයත් රුපියල් ලක්ෂ 200කට අධික වටිනාකමක් සහිත ජංගම සහ ස්ථාවර බැංකු තැන්පතු ගිණුම් 2ක් මේ වන විට අත්හිටුවා තිබේ.
කොළඹ මහාධිකරණය වගඋත්තරකරුගේ බැංකු ගිණුම්වලට අමතරව ඔහුගේ පවුලේ උදවියට අයත් තවත් ස්ථාවර තැන්පතු ගිණුම් 16ක්, රක්ෂණ ඔප්පු 3ක් ද අත්හිටුවා ඇත. ඒවායේ වටිනාකම රුපියල් 97,125,000කට අධිකය. එම දේපොළවලට අමතරව කෙහෙළිය රඹුක්වැල්ලගේ පුත් රමිත රඹුක්වැල්ල විසින් මිලදී ගෙන ඇති කොල්ලුපිටිය ප්‍රදේශයේ සුපිරි මහල් නිවාස සංකීර්ණයක ඇති නිවාස දෙකක් පරිහරණය තහනම් කරමින් කොළඹ මහාධිකරණය තවත් නියෝගයක් නිකුත් කර තිබේ. එම නිවාසේ වටිනාකම කෝටි 14.5කි. 2023 අංක 9 දරන අල්ලස් හෝ දූෂණ විරෝධී පනතේ 53(1) වැනි වගන්තිය අනුව මුදල් විශුද්ධිකරණ නමැති වරද සිදු කිරීමේ චෝදනාව යටතේ හිටපු ඇමැති කෙහෙළිය බණ්ඩාර දිසානායක රඹුක්වැල්ල, ඔහුගේ බිරිය වන කුසුම් ප්‍රියදර්ශනී ඈපා වීහේන සහ දරුවන් වන චමිත්‍රී ජයනිකා රඹුක්වැල්ල, චනුලා රමාලී රඹුක්වැල්ල, අමාලී නයනිකා රඹුක්වැල්ල හා බෑණා වන ඉසුරු පුලස්ති බණ්ඩාර පොල්ගස්දෙණිය යන අයට අයත් දේපොළ ඒ අනුව අත්හිටුවා තිබේ.
