දේශබන්දු තෙන්නකෝන් යනු ශ්‍රී ලංකා පොලීසියේ 36 වැනි පොලිස්පතිවරයාය.
දේශබන්දු තෙන්නකෝන් සමඟ ශ්‍රී ලංකා පොලිස් ඉතිහාසය තුළ පොලිස්පතිවරු දෙදෙනෙක් හිරේ විලංගුවේ වැටී ඇත්තේය.
පාස්කු ඉරිදා ත්‍රස්ත ප්‍රහාරය වළක්වා ගන්නට නොහැකි වීමේ චෝදනාවට 34 වැනි පොලිස්පති ලෙස සේවයේ නිරතව සිටි පූජිත් ජයසුන්දර මහතා හිරේ විලංගුවේ වැටුණේ ශ්‍රී ලංකා පොලීසියේ හිරේ (රිමාන්ඩ් බන්ධනාගාරගත වූ) ගිය පළමු පොලිස්පති ලෙස ඉතිහාසයට එක් වෙමිනි.
දේශබන්දු තෙන්නකෝන් බන්ධනාගාරගත වන්නේ, පූජිත් ජයසුන්දර මෙන් තොරතුරු ලැබී තිබියදීත් ත්‍රස්ත ප්‍රහාරයක් වළක්වා ගැනීමට නිසි ක්‍රියාමාර්ග නොගැනීම වැනි සිදුවීමක් මුල්කරගෙන නොවේ. වැලිගම පිහිටි W 15 හෝටලයට වෙඩි තැබීම සම්බන්ධයෙන් වූ අපරාධමය විමර්ශනයකට අදාළවය. එල්ල වී ඇති චෝදනාව සුළුපටු නැත. අපරාධ පරීක්ෂණ දෙපාර්තමේන්තුව සඳහන් කරන ආකාරයට අනුව වෙඩි තැබීමට සම්බන්ධ කොළඹ අපරාධ කොට්ඨාසයේ නිලධාරීන් ව්‍යාජ අංක තහඩු යෙදූ වාහනයක නැඟී වැලිගමට යන්නේ දේශබන්දු තෙන්නකෝන්ගේ ආශීර්වාදය ඇතිවය.
කොළඹ අපරාධ කොට්ඨාසය පසුගිය කාලයේ ක්‍රියාත්මක වූයේ අපරාධ මර්දනය කිරීමටද නැති නම් අපරාධ වර්ධනය කිරීමටද යන්න ගැන පොලීසිය තුළ ඇත්තේ ලොකු කතාබහකි. කොළඹ අපරාධ කොට්ඨාසයේ නිලධාරීන් පසුගිය කාලයේ හැසුරුණේ ද අසහාය බලයකිනි. යුක්තියේ මුවාවෙන් කොළඹ අපරාධ කොට්ඨාසයේ ඇතැම් උදවිය සිදු කළ නීති විරෝධී ක්‍රියා සම්බන්ධයෙන් වත්මන් ආණ්ඩුව බලයට පත්ව පොලීසියේ නියමුවා ලෙස පත්කළ වැඩ බලන පොලිස්පති නීතිඥ ප්‍රියන්ත වීරසූරිය මහතාගේ උපදෙසින් කරනු ලබන විමර්ශන බොහෝය. W 15 හෝටලයට කළ වෙඩි තැබීමද ඇත්තේ ඒ ගොන්න අතරය.
දේශබන්දු වටා පසුගිය ආණ්ඩුව සමයේදී පැවති දේශපාලන බලය ඇතුළු බලපුළුවන්කාරකම් හේතුවෙන් යටගැසී තිබුණු W 15 හෝටලයේ වෙඩි තැබීමේ විමර්ශන භාර වන්නේ අපරාධ පරීක්ෂණ දෙපාර්තමේන්තුවටය. බැලූ බැල්මටම අපරාධ පරීක්ෂණ දෙපාර්තමේන්තුවේ විමර්ශන නිලධාරීන්ට නම් W 15 හෝටලයේ වෙඩි තැබීමේ කතාව පැහැදිලි විය. W 15 හෝටලයට පසුගිය වසරේ දෙසැම්බර් 31 වැනිදා වෙඩි තබන්නේ කොළඹ අපරාධ කොට්ඨාසයේ නිලධාරීන් අනීතික ගමනක් කොළඹ සිට ගොස් බවද අපරාධ පරීක්ෂණ දෙපාර්තමේන්තුවේ නිලධාරීන් අනාවරණය කර ගත්තේය. ඒ හැම කරුණක්ම මාතර මහේස්ත්‍රාත් අධිකරණයට ඉදිරිපත් කිරීමෙන් අනතුරුව අපරාධ පරීක්ෂණ දෙපාර්තමේන්තුවට මාතර මහේස්ත්‍රාත් අධිකරණයෙන් නියෝගයක් ලැබෙන්නේ දේශබන්දු තෙන්නකෝන් ඇතුළු එම වෙඩි තැබීමට සම්බන්ධ කොළඹ අපරාධ කොට්ඨාසයේ නිලධාරීන් 07 දෙනෙක් සහ වැලිගම පොලීසියේ වැඩ බලන ස්ථානාධිපති ලෙස සේවයේ නිරතව සිටි ප්‍රධාන පොලිස් පරීක්ෂක උපුල් කුමාර අත්අඩංගුවට ගන්නා ලෙසය. මෙම නියෝගය නිකුත් වන්නේ පසුගිය පෙබරවාරි 28 වැනිදාය. ඒ වන විටත් කොළඹ අපරාධ කොට්ඨාසයේ පොලිස් පරීක්ෂකවරයෙක් සිටියේ රටින් පැන ගොසිනි. කොළඹ අපරාධ කොට්ඨාසයේ එවකට සිටි පොලිස් ස්ථානාධිපතිවරයා ඇතුළු නිලධාරීන් 06 දෙනෙක් අත්අඩංගුවෙන් බේරීමට අභියාචනාධිකරණයටද ගොස් තිබුණි. මේ තත්ත්වය මත වැලිගම වැඩ බලන ස්ථානාධිපති ප්‍රධාන පොලිස් පරීක්ෂක උපුල් කුමාර මහතා පසුගිය 04 වැනිදා සිය නීතිඥවරු මඟින් මාතර මහේස්ත්‍රාත් අධිකරණයට භාර වූයේ අත්අඩංගුවට ගන්නා තුරු නොසිටය.
වැලිගම වැඩ බලන ස්ථානාධිපතිවරයාට එසේ ඇප ලැබෙන විට බොහෝ අය සිතුවේ දේශබන්දු තෙන්නකෝන් ද අධිකරණයට භාර වනු ඇතැයි කියාය. එහෙත් ඔහු භාර වෙනවා වෙනුවට පොලීසියට කට්ටි පනිමින් සැඟවන්නට වූයේ පාතාලයේ අපරාධකරුවකු ලෙසිනි. පොලිස්පති ධුරයේ කටයුතු අධිකරණ නියෝගයකින් අත්හිටුවා තිබුණද ඔහුට පොලිස් විශේෂ කාර්ය බළකායේ ආරක්ෂාවක් යොදවා තිබුණි. පොලිස්පති නිල නිවසද ඔහුට භාවිත කිරීමට ඉඩ ලැබී තිබුණි. එහෙත් ඔහු වත්මන් ආණ්ඩුව බලයට පත්වීමෙන් අනතුරුව පොලිස්පති නිල නිවෙසේ රැඳී සිටියේ නැත. හෝකන්දර පිහිටි නිවෙසේ කාලය ගත කරනු ලැබීය.
මාතර මහේස්ත්‍රාත් අධිකරණයේ නියෝගය ලැබීමත් සමඟ අපරාධ පරීක්ෂණ දෙපාර්තමේන්තුව ඔහුව අත්අඩංගුවට ගැනීමට සූදානම් වන විට දේශබන්දු අතුරුදන් වන්නේ සිය ආරක්ෂකයන්ටද යන එන මං නැති කරමිනි. ඔහු අවසන් වරට ආරක්ෂකයන් දකින්නේ ත්‍රිරෝද රථයකින් කොලඹ 07 ප්‍රදේශයේ යම් ස්ථානයකට ගමන් කිරීමකදීය. එතැන් පටන් ඔහු අතුරුදන් වන්නේ පොලීසියට අපරාධකරුවෙක් සොයන්නාක් මෙන් දේශබන්දු පොලිස්පතිවරයාව සොයන්නට මඟ සලසමිනි. ඒ අතර හෝකන්දර නිවෙසද දොරගුළු දමා වැසී යන්නේ දේශබන්දු මහතාගේ බිරිය හා දරුවාද අතුරුදන් වෙමිනි.
දේශබන්දු තෙන්නකෝන් සමාජයේ දැඩි කතාබහකට ලක්වන මාතෘකාවක් බවට පත්වන්නේ ඒ සමඟිනි. පොලීසිය භාර හිටපු ඇමැතිවරයාට මෙන්ම ආණ්ඩුවටද ජනතාවගෙන් චෝදනා එල්ල වන්නට වූයේ දේශබන්දු තෙන්නකෝන් සඟවාගෙන සිටින්නේ ඔවුන් බව පවසමිනි. මේ නිසා ආණ්ඩුව දැඩි අපහසුතාවකට පවා පත්වුවත් දේශබන්දුව ආණ්ඩුව හුරතල් නොකරන බව දැන සිටියේ වැඩබලන පොලිස්පති ඇතුළු ඉහළ පොලිස් නිලධාරීන් කිහිප දෙනෙක් පමණි. ඒ දේශබන්දු තෙන්නකෝන් සොයා අපරාධ පරීක්ෂණ දෙපාර්තමේන්තුව, පොලිස් විශේෂ කාර්ය බළකාය මෙන්ම බුද්ධි අංශ වෙතද වැඩබලන පොලිස්පති ඇතුළු ඉහළ පොලිස් නිලධාරීන්ගෙන් දැඩි පීඩනයක් ද ඒ වන විටත් එල්ලකර තිබුණි. ඒ සමාජයෙන් පොලීසියට මෙන්ම ආණ්ඩුවට පීඩනයක් ඒල්ල වෙමින් තිබුණු පසුබිමක් මතය.
මේ අතර දේශබන්දු තෙන්නකෝන් මහතා අභියාචනාධිකරණය හමුවේ රීඩ් පෙත්සමක් ගොනු කරනු ලබන්නේ පොලිස් අත්අඩංගුවෙන් මිදී සිටීමටය. ඒම රීඩ් පෙත්සම පසුගිය 17 වැනිදා විසි කරන විට මාතර මහේස්ත්‍රාත් අධිකරණය දේශබන්දු මහතා දුටු තැන අත්අඩංගුවට ගන්නා ලෙස නියෝගයක්ද නිකුත් කර තිබුණි.
පූජිත් ජයසුන්දර මහතා මෙන් නොව, දේශබන්දු තෙන්නකෝන් පොලිස්පතිවරයා පොලීසියට කට්ටි පනින්නට වූයේ අපරාධකරුවෙකුට එහා යමිනි. මේ නිසාම ඔහුව සොයා අපරාධ පරීක්ෂණ දෙපාර්තමේන්තුවේ නිලධාරීන්ට හිටපු මැති ඇමැතිවරුන්ගේ නිවාස මෙන්ම දේශබන්දුගේ හිතවතුන් බව කියන ව්‍යාපාරිකයන්ගේ පවා නිවාස පරීක්ෂා කිරීමට සිදුව තිබුණි. පොලිස්පතිවරයෙක් අත්අඩංගුවට ගැනීමට පොලීසියට මෙතරම් ලොකු වෙහෙසක් දරන්නට ඉතිහාසයේ සිදුවී නම්, ඒ දේශබන්දු තෙන්නකෝන් අත්අඩංගුවට ගැනීම සඳහා බව පොලීසිය පැත්තෙන් කියැවෙන්නකි.
දේශබන්දු තෙන්නකෝන් පොලීසියට කට්ටි පනිමින් සැඟව සිටින විට ඔහුගේ බිරිය හා දරුවා හෝකන්දර නිවසට එන්නේ අභියාචනාධිකරණයට රීට් පෙත්සම ඉදිරිපත් කිරීමෙන් අනතුරුවය. එහිදී දේශබන්දු තෙන්නකෝන් මහතා ඉන්නා තැනක් ගැන විමසමින් අපරාධ පරීක්ෂණ දෙපාර්තමේන්තුවේ නිලධාරීන් ඇගෙන් ප්‍රශ්න කළද වැදගත් යමක් අනාවරණය කර ගැනීමට හැකියාවක් නොවීය. මේ තත්ත්වය මත අපරාධ පරීක්ෂණ දෙපාර්තමේන්තුව තීරණය කරනු ලබන්නේ වරෙන්තුකරුවෙක් වන දේශබන්දු තෙන්නකෝන් තවදුරටත් පොලීසියට කට්ටි පනිමින් සිටින්නේ නම්, ඔහුගේ දේපොළ රාජසන්තක කිරීමට අවශ්‍ය පියවර ගැනීමටය. ඊට අවශ්‍ය මූලික පියවර ගැනීම සඳහා අපරාධ පරීක්ෂණ දෙපාර්තමේන්තුවේ විශේෂ පොලිස් කණ්ඩායමක් පෙරේදා (18) හෝකන්දර පිහිටි දේශබන්දු තෙන්නකෝන් මහතාගේ නි‍ෙවස පරීක්ෂා කරන්නේ පොලිස් විශේෂ කාර්ය බළකාය සහ පොලිස් නිල සුනඛයන්ද රැගෙනය. නිවසේ දේශබන්දු තෙන්නකෝන් මහතාගේ කාමරය අගුල්ලා තිබීම නිසා එය විවෘත කරනු ලබන්නේ යතුරු කපන්නකු රැගෙන සොසිනි.
එම කාමරය තුළ තිබී හමුවන්නේ විදේශීය මත්පැන් බෝතල් 1000කට වැඩි ප්‍රමාණයකි. මෙම මත්පැන් බෝතල් විවිධ වර්ගයේ ඒවාය. පෙට්ටි තුළ අසුරා තිබූ මෙම මත්පැන් බෝතල් තොගය ඔහු පොලිස්පති ධුරයේ සිටියදී එම නිවෙසට රැගෙන ආ ඒවාය. එම මත්පැන් බෝතල් පොලීසියේ උදවිය දේශබන්දු තෙන්නකෝන් මහතා සතුටු කිරීමට රැගෙන ආ අල්ලස් ද නැති නම් දේශපාලනඥයන් සතුටු කිරීමට ඔහු දේශපාලනඥයන්ට ලබාදීමට රැස්කළ තුඩු පඬුරුද යන්න පිළිබඳ නිශ්චිත තොරතුරක් නම් මෙතෙක් අනාවරණය වී නැත.
මෙම මත්පැන් බෝතල් තොගයට අමතරව නි‍ෙවසේ තිබී දේශබන්දු තෙන්නකෝන් මහතාට පොලිස් දෙපාර්තමේන්තුව නිකුත් කර ඇති බව කියැවෙන පිස්තෝලයද හමුවී ඇත. එම පිස්තෝලය තිබෙන්නේ රෙදිවල ඔතා රෙදි සෝදන යන්ත්‍රය තුළ සඟවාය. මේ හැරුණු කොට අපරාධ පරීක්ෂණ දෙපාර්තමේන්තු නිලධාරීන්ට දේශබන්දු පස්සේ පැන්නීමට ලැබුණු හොඳම උපකරණය බවට පත්වන්නේ ජංගම දුරකතන දෙකකි. එම ජංගම දුරකතන දෙකේ ඇතැම් දත්ත මකා දමා තිබුණද ඒවා මතුකර ගැනීම අපරාධ පරීක්ෂණ දෙපාර්තමේන්තුවේ නිලධාරීන්ට එතරම් ලොකු දෙයක් නොවන බැවින් දේශබන්දු සොයා කෙරෙන මෙහෙයුම අලුත් මුහුණුවරකින් දියත් කිරීමට සූදානම් වන්නේ එම ජංගම දුරකතන දෙක ඔස්සේය.
මාතර මහේස්ත්‍රාත් අධිකරණයෙන් නියෝගය නිකුත් කළ දා සිට දින 20ක් පුරාවට පොලීසියට කට්ටි පනිමින් සිටි දේශබන්දු තෙන්නකෝන් මහතා මාතර මහේස්ත්‍රාත් අධිකරණය හමුවට පැමිණ භාර වෙන්නේද ඒත් සමඟිනි. ඊයේ (19) උදෑසන සුඛෝපභෝගී මෝටර් රථයකින් ඔහු මාතර මහේස්ත්‍රාත් අධිකරණය හමුවට ඒන්නේ පරිවාර රථ කිහිපයක ආරක්ෂාව සහිතවය. එම රථවල සිටින්නේ නීතිඥවරුන්ය. අධිකරණයේ සිටි මාධ්‍යවේදීන් ඇතුළු පිරිස් පවසන ආකාරයට අනුව දේශබන්දු තෙන්නකෝන් මහතා වෙනුවෙන් ඉදිරිපත්ව සිටි නීතිඥවරු ගණන 50කට වැඩිය.
නීතිඥවරු පිරිවරාගෙන අධිකරණ සංකීර්ණය තුළටම දේශබන්දු තෙන්නකෝන් මහතා පැමිණෙන්නේ ටයිකෝට් පැලඳගෙනය. සැකකරුවෙක් ලෙස ඒ වන විටත් නම්කර සිටි ඔහුව අධිකරණයේ සිර මැදිරියට දැමිය යුතු වුවත් ආරක්ෂක හේතූන් මත බව පවසමින් ඔහුව අධිකරණයේ කොනක බංකුව මත අසුන් ගන්වා තැබීමට ඇතැම් නීතිඥවරු කටයුතු කර තිබුණි. උදෑසන 8.30ට පමණ අධිකරණයට පැමිණිය ද දේශබන්දු තෙන්නකෝන් මහතාට වැලිගම ස්ථානාධිපතිවරයාට ලද ආකාරයේ නිදහසක් හිමි නොවීය. නීතියට අභියෝග කරමින් පොලීසියට කට්ටි පනිමින් සිටි දේශබන්දු තෙන්නකෝන් මහතාට සිදු වන්නේ නීතිපති දෙපාර්තමේන්තුවෙන් සහ අපරාධ පරීක්ෂණ දෙපාර්තමේන්තුවේ නිලධාරීන් පැමිණෙන තුරු පැය ගණනාවක් අධිකරණ සංකීර්ණයේ බංකුවක් මත රැඳී සිටීමටය. අවසානයේදී සිදු වන්නේ බන්ධනාගාරගත වූ ශ්‍රී ලංකා පොලීසියේ දෙවැනි පොලිස්පති ලෙස ඉතිහාසයට එක්වන්නටය.
අපරාධ පරීක්ෂණ දෙපාර්තමේන්තුව නම් පවසන්නේ දේශබන්දු තෙන්නකෝන් මහතා අධිකරණයට භාර වීමෙන් සියල්ල අවසන් නොවන බවය. මෙතෙක් කලක් ඔහුට සැඟවී සිටීමට පහසුකම් සැපයූ සහ උදව් කළ අය සොයා ඉදිරි විමර්ශන පැවැත්වෙනු ඇත. ඒ සඳහා අවශ්‍ය මූලික විමර්ශන කටයුතු පවා ඊයේ (19) දිනියේදීම අපරාධ පරීක්ෂණ දෙපාර්තමේන්තුව ආරම්භ කර තිබීමද විශේෂිතය.
