පුවත්පතක් මුද්‍රණය කිරීම සඳහා නෙප්චූන් පේපර් පෞද්ගලික සමාගමෙන් කඩදාසි ලබා‍ෙගන රුපියල් ලක්ෂ එකසිය විස්සක් වංචා කර ඇතැයි කියන සිද්ධිය සම්බන්ධ නඩුවේ සැකකාර මෙන්ඩිස් සමාගමේ අධ්‍යක්ෂ අර්ජුන් ඇලෝෂියස්ට අදාළ චෝදනා පත්‍ර භාර දීම අප්‍රේල් 30 වැනි සිදු කරන ලෙසට කොළඹ අතිරේක මහේස්ත්‍රාත් හර්ෂණ කැකුණවෙළ මහතා ඊයේ (19)නියෝග කළේය. අදාළ නඩුව කැඳවූ අවස්ථාවේදී මහේස්ත්‍රාත්වරයා මෙම නියෝගය කළේය.
මෙන්ඩිස් සමාගමේ අධ්‍යක්ෂවර‍ෙයක් වන අර්ජුන් ඇලෝසියස් ඊයේ දින අධිකරණයේ පෙනී සිටි අතර සෙසු සැකකරු වන මෙන්ඩිස් සමාගමේ තවත් අධ්‍යක්ෂවරයෙක් වශයෙන් සිටි කඩතොඩ ගෙදර චමින්ද සනත් බණ්ඩාර ඊයේ දින අධිකරණයේ පෙනී නොසිටියේය. පුවත්පත් මුද්‍රණය කිරීම සඳහා කඩදාසි ගෙන්වා බෙදා හරින නිප්චූන් පේපර් පෞද්ගලික සමාගම විසින් මෙම නඩුව පවරා තිබුණි. පැමිණිල්ල වෙනුවෙන් නීතිඥ ධර්මතිලක ගමගේ මහතාගේ උපදෙස් පරිදි නීතිඥ රාහුල් ජයතිලක අධිකරණයේ කරුණු ඉදිරිපත් කරමින් සඳහන් කරනු ලැබුවේ
විත්තිකරුවන්ගේ බැංකු ගිණුමේ මුදල් නොමැති බව දැන දැනම 2019 වසරේ අවස්ථා හතරකදී චෙක්පත් හතරක් නිකුත් කරමින් රුපියල් මිලියන 12ක් වංචා කිරීම හා සාපරාධී සාවද්‍ය පරිහරණය කිරීම ඇතුළු චෝදනා යටතේ මෙම නඩුව පවරා ඇති බවය. විත්තිකාර ඇලෝසියස් මහතා වෙනුවෙන් පෙනී සිටි නීතිඥවරයා කරුණු දක්වමින් සඳහන් කරනු ලැබුවේ අදාළ මුදල් ගෙවීම සම්බන්ධයෙන් කරුණු සලකා බලමින් යන බවද නීතිඥවරයා පැවසීය.
