අමෙරිකානු සහ රුසියානු ජනාධීපතිවරු අතර ඊයේ පැවැති යුක්රේනයේ අනාගතය ගැන තීරණාත්මක දුරකතන සාකච්ඡාව මිනිත්තු 90ක කාලයක් ඇදී ගිය බවත්, පූර්ණ සටන් විරාමයක් සඳහා රුසියානු ජනාධිපති ව්ලිදිමීර් පුටින් අකමැත්ත පළ කර ඇති බවත් විදෙස් මාධ්‍ය වාර්තා කරයි. ඩොනල්ඩ් ට්‍රම්ප් සිය දෙවැනි ධුර කාලය ආරම්භ කිරීමෙන් පසු රුසියානු ජනාධිපතිවරයා සමඟ සාකච්ඡා කළ පළමු අවස්ථාව මෙය වන අතර, ඔවුන්ගේ සාකච්ඡාව ඉතා සුහදශීලීව පැවැති බව විදෙස් මාධ්‍ය වැඩිදුරටත් වාර්තා කරයි. එම සාකච්ඡාව අතරතුර ඩොනල්ඩ් ට්‍රම්ප් ඉදිරිපත් කළ සටන් විරාම යෝජනාවට පුටින් එකඟතාව පළ නොකළද, දින 30ක කාලසීමාවක් සඳහා යුක්රේනයේ බලශක්ති නිෂ්පාදනාගාර වෙත ප්‍රහාර එල්ල කිරිමෙන් වැළකී සිටීමට එකඟතාව පළ කර ඇතැයි වාර්තා වේ. යුක්රේනය සමඟ සටන් විරාමයකට යෑමට පෙර අමෙරිකාවෙන් සහ යුරෝපයෙන් යුක්රේනයට ලබාදෙන හමුදා ආධාර මෙන්ම බුද්ධි තොරතුරු හුවමාරු කිරීම් ද නැවැත්විය යුතු බවට පුටින් කොන්දේසියක් ඉදිරිපත් කර ඇතැයි ද විදෙස් මාධ්‍ය වාර්තා කරයි.
