මාස 9ක් අභ්‍යවකාශ නැවතුම් මධ්‍යස්ථානයේ කොටු වී සිටි අමෙරිකානු ගගනගාමීන් දෙදෙනකු වන සුනිතා විලියම්ස් සහ බච් විල්මෝර් ඊයේ නිරුපද්‍රිතව නැවත පෘථිවියට සේන්දු වූ බව විදෙස් මාධ්‍ය වාර්තා කරයි. ඔවුන් රැගෙන පැමිණි ස්පේස් එක්ස් ඩ්‍රැගන් කැප්සියුලරය අධි වේගවත් පැය 17ක ගමනකින් පසු පෘථිවි වායුගෝලයට ඇතුළු වූ බවත්, අනතුරුව පැරෂූට් හතරක ආධාරයෙන් වේගය සීමා කරමින් අමෙරිකාවේ ෆ්ලොරිඩා ප්‍රාන්තයේ මුහුදු තීරයට ගොඩ බැස්වූ බවත් විදෙස් මාධ්‍ය වැඩිදුරටත් වාර්තා කරයි. අනතුරුව මෙහෙයුම් නෞකාවක් විසින් ගොඩ ගනු ලැබූ එම කැප්සියුලරයෙන් ගගනගාමීන් දෙදෙනා පොළොවට පා තැබූ බව විදෙස් මාධ්‍ය සඳහන් කරයි.
ඔවුන් රැගෙන ඒම සඳහා ස්පේස් එක්ස් යානයෙන් අභ්‍යවකාශ මධ්‍යස්ථානයට ගිය රුසියානු සහ අමෙරිකානු ගගනගාමීන් දෙදෙනකු සමඟ නැවත පෘථිවියට පැමිණි සුනිතා සහ බච් නාසා ආයතනයේ නිලධාරීන් ඇතුළු පිරිස උණුසුම් අයුරින් පිළිගත් බවත්, නැවත සිය පවුලේ සාමාජිකයන් සමඟ එක්වීමට පෙර පූර්ණ වෛද්‍ය පරීක්ෂණයකට පෙනී සිටි බවත් වාර්තා වේ.
දින අටක කාලසීමාවක් සඳහා පසුගිය වසරේ ජූනි මස 5 වැනිදා අභ්‍යවකාශ නැවතුම් මධ්‍යස්ථානයට ගිය එම ගගනගාමීන් දෙදෙනාට ඔවුන් ගමන් ගත් ස්ටාර්ලයිනර් යානයේ හීලියම් ද්‍රාවණ කාන්දුවීමක් සහ තවත් කාර්මික දෝෂ රැසක් හට ගැනීම හේතුවෙන් නියමිත කාලයේදී යළි පැමිණීමට නොහැකිවූ අතර, එම දීර්ඝ කාල පරිච්ඡේදයේදී අමෙරිකාව ඇතුළු ලොව පුරා වෙනස්කම් රාශියක් සිදුවී තිබිණි. සුනිතා සහ බච් අභ්‍යවකාශය නැවතුම් මධ්‍යස්ථානය කරා පියාසර කළ පසුගිය වසරේ අමෙරිකානු ජනාධිපතිවරයා ලෙස ජෝ බයිඩ්න් ධුරයේ සිටි අතර, ඊයේ ඔවුන් නැවත පෘථිවියට පැමිණියේ ඩොනල්ඩ් ට්‍රම්ප්ගේ ධුර කාලයේදීය. පසුගිය වසරේ නත්තලත්, මෙවර නව වසරේ උදාවත් පෘථිවියෙන් පිටගත කළ ගගනගාමීන් දෙදෙනා වෛද්‍ය පරීක්ෂණයෙන් පසුව මාධ්‍ය හමුවකට ද එක් වූ බව වාර්තා වේ.
