මේ කතාව ඇහෙන්නේ කැබිතිගොල්ලෑව ප්‍රදේශයේ දුෂ්කර ගමක වැව් ඉස්මත්තෙනි.Óවස්තුවේ මම ඔයාට ආදරෙයිÓ යන වචනය නිසා ඉලපත් පහර කෑමට සිදුවූ පුවතකි.
ගමේ සිටි රූමත් තරුණියක් වන ඇය කුඩා අවධියේ සිට හැදී වැඩුණේ ඇයගේ අත්තම්මාගේ නි‍ෙවසේය. මිනිපිරියගේ රූමත්කම නිසාම අත්තම්මා ඇය ගැන නිරන්තරයෙන් උකුසු ඇස යොමා ගෙන සිටියාය. ගමේ ගැහැනුන්ගේ සහ මිනිසුන්ගේ ඕපාදූප කටවලින් ඈ ගැන ගිනි ඇවිළෙන්න ඉඩ නොදීමට අත්තම්මා වගබලා ගත්තාය. එමෙන්ම මිනිපිරියට ද ඇය තරයේම තරවටු කරමින් අවවාද කරන්න පටන් ගත්තේ කුඩා අවධියේ සිටමය. දැන් ඇය නව යොවුන් රූමත් තරුණියක් නිසා අත්තම්මා ඇයගේ ගමන් බිමන් සහ හැසිරීම ගැන දැඩි ලෙස අවධානයෙන් පසු වූවාය.
මේ අතර නි‍ෙවසේ ඇති දැඩි කරන කිරි එළදෙනට සුරතල් වසු පැටියෙක් සිටි අතර, එම වසු පැටියාට මේ රූමත් තරුණිය බෙහෙවින්ම ආදරය කළාය.කාලය මෙලෙසින් ගෙවී යන අතරතුර ගමේ කොලුගැටව් අත්තම්මාගේ නි‍ෙවස වටා වේලාවක් අවේලාවක් නැතිව නිතර සැරිසරමින් මාන බැලුවේ මේ රුවැත්තිය දැලේ දා ගැනීමටය. ඇයට ගමේ තරුණයන්ගෙන් ප්‍රේම සබඳතාවකට කොතරම් ඇරැයුම් ආවත් ඇය ඒවා තරයේ ප්‍රතික්ෂේප කළාය. මේ හේතුව නිසා ගමේ බොහෝ තරුණයන් මෙන්ම ඔවුන්ගේ නෑදෑ හිතවතුන්ද මේ මිනිපිරිය සහ අත්තම්මා පිළිබඳ සිටියේ තරමක නොහොඳ නෝක්කාඩුවෙනි. නිරපරාදේ අනුන්ට පද හදමින් සිටින එක්තරා කාන්තාවක් ද ගමේ සිටි අතර ඇයගේ පුතාද මේ රූමත් මිනිපිරියට බැල්ම හෙළා සිටි අයෙකි.
දිනක් ගමේ වැවට යාබදව ඇති වන ලැහැබකින් කාන්තා කටහඬකින් ආදරණීය ලෙස ආමන්ත්‍රණය කරන හඬක් ඕපාදූප සොයන කාන්තාවට ඇසුණි.
Òවස්තුවේ, මම ඔයාට ගොඩාක් ආදරෙයි. ඉතින් මගේ රත්තරන්, මට ඔයා ළඟටම වෙලා ඉන්න බැහැනේ. මම ඉක්මනටම ගෙදර ගිහින් ආයෙත් ඔයා ළඟට එන්නම් හොඳේ.ආදරෙයි පැටියෝÓ යනුවෙන් ඇසුණු කාන්තා හඬ කාගේවත් නොව රූමත් මිනිපිරියගේම බව සැක හැර දැනගත් ඕපාදූප සොයන කාන්තාව විනාඩි කිහිපයක් ඇතුළත ඒ පුවත ගම පුරා ගිනි ඇවිළුවාය.
අත්තම්මාගේ රූමත් මිනිපිරිය වැව් ඉස්මත්තේ අකුලක් ඇතුළේ කවුරුන් හෝ සමඟ පෙම්බස් දොඩමින් සිටින වග අසුරු සැණෙකින් ගම පුරා පැතිරී ගියේය.
අත්තම්මාගේ කනටද ඇවිළිණු ගින්නේ රස්නය දැනුණි. අත්තම්මා කඩිනමින් වත්ත පහළ වන ලැහැබට දිවගෙන ගියාය. ඒ යන විටත් මිනිපිරිය පුළුන් බෝලයක් වැනි වසු පැටියාගේ හිස අතගාමින් Òවස්තුවේ මම ඔයාට ගොඩක් ආදරෙයි Ò යනුවෙන් මුමුනනවා අත්තම්මාට දැක ගැනීමට හැකි විය.
මාරාවේශයෙන් ආපසු මිනිපිරියත් සමඟ නි‍ෙවසට පැමිණි අත්තම්මා මිදුල අතුගාන ඉඳල අතට අරගෙන ඕපාදූප පතුරුවන කාන්තාව මුණගැසුණාය.
මිනිපිරියගේ ආදරණීය වදන්වල දිග පළල හොඳ හැටි කියා දුන් අත්තම්මා දෑත උඩට ඔසවා කේලාම් පතුරපු කාන්තාවගේ පිට හරහා ඉදල් පහර කීපයක් පත බෑවාය.
දැන් මේ මුළු ගමේම Ò වස්තුවේ මම ඔයාට ගොඩාක් ආදරෙයිÓ යන වචනය ජනප්‍රිය වී ඇත.
කැබිතිගොල්ලෑව
හේමන්ත රණසූරිය
