එක්සත් ජාතික පක්ෂයේ ප්‍රබල ක්‍රියාකාරීන් සහ මන්ත්‍රීවරු පක්ෂය හැර යද්දී අඛණ්ඩව එක්සත් ජාතික පක්ෂය සමඟ කටයුතු කළ කළුතර දිස්ත්‍රික්කයේ එක්සත් ජාතික පක්ෂයේ ජ්‍යෙෂ්ඨ නායකයකු සහ හිටපු පාර්ලිමේන්තු මන්ත්‍රීවරයකු වන ලක්ෂ්මන් විජේමාන්න මහතා සමඟ එක්සත් ජාතික පක්ෂයේ වර්තමාන වාතාවරණය සහ කාලීන දේශපාලනය පිළිබඳව සිදු කළ සාකච්ඡාවකි මේ.
වාසි අවාසි නොබලා අපි එක්සත් ජාතික පක්ෂය රැකගත්තා
විපක්ෂයේ ප්‍රධානම කණ්ඩායම සමගි ජන බලවේගයයි
මට දේශපාලනයෙන් හම්බ කිරීමේ චේතනාවක් නැහැ
පසුගිය සතියේදී එක්සත් ජාතික පක්ෂ නායකයා සහ ඔබ අතර ඇති වුණු උණුසුම් කතාබහ පිළිබඳ කතා කළ හැකිද ?
ඇත්තෙන්ම එදා සිදු වූයේ ඉතාමත් කනගාටුදායක දෙයක්. මම එක්සත් ජාතික පක්ෂය අවුරුදු ගණනාවක් නියෝජනය කළ පක්ෂය කිසිමදාක අතහැර නොගිය කෙනෙක්. පක්ෂයට බැරි වූ වෙලාවේදී වාසියට, වාසි පැත්තට මන්ත්‍රීවරු ගියා. ඒත්, මම ප්‍රතිපත්තිගරුක එක්සත් ජාතික පාක්ෂිකයකු විදිහට පක්ෂය අත්හැරියේ නැහැ. පසුගිය ජනාධිපතිවරණයේදී කළුතර දිස්ත්‍රික්කය තුළ මා සහ මගේ කණ්ඩායම ඉතාමත් කැපවීමෙන් කටයුතු කළා. ඒ නිසා රනිල් වික්‍රමසිංහ මහතාට දිස්ත්‍රික්කයෙන් සැලකිය යුතු ඡන්ද ප්‍රමාණයක් ලබා ගැනීමට පුළුවන්කම ලැබුණා. ඒ අපි කණ්ඩායමක් විදිහට සිදු කළ කාර්යභාරය නිසයි.
එහෙත්, පක්ෂ නායකයාට පක්ෂය හෝ පාක්ෂිකයා කිසිසේත්ම වැදගත් නැහැ. ඔහු ඉතාමත් හිතුවක්කාර විදිහට කළුතර දිස්ත්‍රික්කයේ එක්සත් ජාතික පක්ෂ නායකයා විදිහට රාජිත සේනාරත්න මහතාව පත්කර ගනු ලබනවා. ඇත්තෙන්ම රාජිත කියන්නේ ස්ථිර දේශපාලන ප්‍රතිපත්තියක වැඩ කරන කෙනෙක් නොවෙයි. ඔහු ඉතාමත් අවස්ථාවාදී දේශපාලනඥයකු විදිහටයි හඳුන්වන්න පුළුවන්. එවැනි අවස්ථාවාදියකු අපේ පක්ෂයේ නායකත්වයට පත් කළේ ඇයි කියලා මම රනිල් වික්‍රමසිංහ මහතාගෙන් විමසුවා. ඒ විමසීම කරද්දී ඔහු මාව අතින් අල්ලා බලහත්කාරයෙන් පසෙකට කළා. ඇත්තෙන්ම රනිල් වික්‍රමසිංහ මහතා තුළ තිබෙනවා යැයි කියන ප්‍රජාතන්ත්‍රවාදය මෙයද කියන එක ප්‍රශ්නයක්. පක්ෂය වෙනුවෙන් වැඩ කළ අප වැනි අයට මෙහෙම කිරීමත් අතින් අල්ලා විසි කරනවා නම් එවැනි අයත් සමඟ තවදුරටත් ඉන්න එක අපරාධයක්. ඒ නිසා තමයි මම තීරණය කළේ එක්සත් ජාතික පක්ෂය සමඟ තව විනාඩියක්වත් නොඉඳ ඉවත් වන්න.
රනිල් වික්‍රමසිංහ මහතා පිළිබඳ කතා කරන බොහෝ අය කියන්නේ ඔහු හොඳ ප්‍රජාතන්ත්‍රවාදියෙක්, රාජ්‍ය තාන්ත්‍රිකයෙක් කියලා එහෙම තිබියදී ඔහු එදා යම් කලහකාරී බවකින් හැසිරුණේ ඇයි?
පුද්ගලයකු වයස්ගත වීමත් සමඟ ඔහොම දේවල් වෙනවා. මානසිකව ඇතිවූ ව්‍යාකූලතා ඇති වෙනවා. අද රනිල් වික්‍රමසිංහ මහතාට වෙලා තිබෙන්නේ එවැනි දෙයක්. ඇත්තෙන්ම ඔහු දැන් දේශපාලනය කිරීම වෙනුවට කළ යුතුව තිබෙන්නේ විවේක ගැනීමයි. විවේක නොගෙන තවදුරටත් ඔහු මේ විදිහට හැසිරීම තුළ සිදුවන එකම දේ බවට පත්වන්නේ ඔහුත් ඔහු නියෝජනය කරනු ලබන එක්සත් ජාතික පක්ෂයත් තවදුරටත් පිරීහීම පමණයි.
රනිල් වික්‍රමසිංහ මහතා අද පක්ෂයේ පැරැණි අයට පල නොකියා පලා බෙදීමක් සිදු කරන්නේ. එවැනි තැනක අප වැනි දේශපාලනයෙන් සතයක්වත් හම්බ නොකළ අය අය තවදුරටත් සිටිය යුතු නෑ. ඒ නිසා තමයි මා එක්සත් ජාතික පක්ෂයෙන් ඉවත් වීමට තීරණය කළේ. රාජිත සේනාරත්න වැනි අවස්ථාවාදී පිරිස් දේශපාලන ප්‍රතිපත්තියකින් තොරව වැඩ කළාට අප සැමදාම වාසි අවාසි නොබලා එක්සත් ජාතික පක්ෂය රැකගත් පිරිසක්.
ඔබට පමණක් නොවෙයි, තවත් තරුණ නියෝජිතයන් කිහිප දෙනකුටත් වික්‍රමසිංහ මහතා ප්‍රශ්න නොකර වාඩි වෙන්න කියලා තර්ජනය කළා?
ඔව්. අපේ පක්ෂය කවදත් ප්‍රජාතන්ත්‍රවාදය ඉහළින්ම පිළිගත් දේශපාලන පක්ෂයක්. සේනානායකවරුන්ගේ සිට මෑතක් වන තුරු පක්ෂය තුළ අභ්‍යන්තර ප්‍රජාතන්ත්‍රවාදය ඉහළින් තිබුණා. අද වන විට පක්ෂ නායකයා ප්‍රසිද්ධියේ ප්‍රදර්ශනය කළා ඔහු ප්‍රජාතන්ත්‍රවාදය විශ්වාස කරන්නේ නැහැ, ඒකාධිපතිවාදය විශ්වාස කරන්නේ කියලා. එදා වික්‍රමසිංහ මහතා බැණ වැදුණේ පක්ෂය බිංදුවටම වැටුණ වෙලාවේ පක්ෂය රැක ගෙන කළුතර දිස්ත්‍රික්කය තුළ ඉහළ සංවිධානාත්මක දක්ෂතාවක් පෙන්වූ තරුණයන් දෙදෙනකුටයි. ඇත්තෙන්ම මෙය නැඟී එන තරුණ නායකයන්ගේ මානසිකත්වය කඩා බිඳවට්ටන දෙයක් විදිහටයි මට පෙනෙන්නේ.
එක්සත් ජාතික පක්ෂයෙන් ඉවත්වූ ඔබගේ මීළඟ පියවර කුමක්ද?
මම රැක ගත් නායකයා මා සහාය දැක් වූ නායකයා මාව අතින් තල්ලු කර දමද්දී මම විරුද්ධව වැඩ කළ පක්ෂයේ නායකයා වන සජිත් ප්‍රේමදාස මහතා මාව සාදරයෙන් පිළිගත්තා. ඇත්තෙන්ම මම මින් ඉදිරියට සහාය පළ කරන්නේ සමගි ජන බලවේගයටයි. මම හිතනවා මම කාලයක් ගත වෙලා හරි නිසි දේශපාලන නවාතැනේ සිටගත්තා කියලා.
ඔබ එසේ කියන්නේ ඇයි?
2020දී අප නියෝජනය කළ එක්සත් ජාතික පක්ෂයෙන් විශාල පිරිසක් කැඩී ගිහින් සමගි ජන බලවේගය ආරම්භ කළා. එතැනදී අපේ පාක්ෂිකයෝ හිතවතුන් රැසක් පක්ෂය අත්හැර ගියා. මා ගත් දේශපාලන තීන්දුව සමඟ ඒ හැර ගිය අය ගොඩක් මට කතා කරනවා. පසුගිය දින කිහිපයට මට දුරකතන ඇමතුම් පමණක් හාරදහසකට වැඩි ප්‍රමාණයක් ලැබුණා. එයින් තහවුරු වෙන දේ තමයි මා ගත් තීරණයත් එක්ක ජනතාව ඉන්නවා. ඔවුන් මගේ තීරණය පිළිගන්නවා කියන කරුණයි.
අවුරුදු හය හතක් මට දේශපාලන හෙණහුරා ලබා තිබුණේ. ඒ දේශපාලන හෙණහුරාගෙන් මට ගැලවීමක් ලැබුණේ සමගි ජන බලවේගය සමඟ එකතු වීමත් සමඟයි.
ඔබ සමගි ජන බලවේගය තුළ දේශපාලනය කිරීමේදී තනතුරු භාර ගැනීමට හෝ යම් කිසි වගකීමක් භාර ගැනීමට සූදානම්ද?
නැහැ, මම සමගි ජන බලවේගය සමඟ එකතු වුණේ තනතුරු වෙනුවෙන් නොවෙයි. පසුගිය අවුරුදු කිහිපය තුළ සමගි ජන බලවේගය වෙනුවෙන් වැඩ කළ දේශපාලන කැපවීම් කළ පිරිස් සිටියදී මම මැදින් පැනලා තනතුරක් ලබා ගත්තොත් ඒක පැරණි අයට කළ අසාධාරණයක් වෙනවා. ඒ නිසා මම හිතන දේ තමයි මට රාජිත සේනාරත්න කළ දේ මම තවත් කෙනෙකුට නොකළ යුතුයි කියන අදහස. ඒ අදහසත් එක්කයි මම කටයුතු කරන්නේ.
මට දේශපාලනය තුළ හම්බ කිරීමේ චේතනාවක් නැහැ. ඒ නිසා මගේ ප්‍රධාන අරමුණ වෙලා තිබෙන්නේ සමගි ජන බලවේගය විශ්වාස කරනු ලබන පිරිස වෙත මගෙන් සිදු කරන්න පුළුවන් වගකීම කුමක්ද කියා සලකා බලා කටයුතු කිරීමයි.
එදා සමගි ජන බලවේගය පිළිබඳව විශාල දේශපාලන විවේචනයක සිටි ඔබ අද ඒ පක්ෂය පිළිබඳ ප්‍රසාදයෙන් කතා කරනවා. ඒ විදිහට අදහස් වෙනස් කිරීම සුදුසුද?
ඔව්. මම කිසිම දවසක කිසිදු විරුද්ධවාදී දේශපාලන ව්‍යාපාරයක් පෞද්ගලිකව විවේචනය කළේ නැහැ. මට කිසිදු දේශපාලනය පක්ෂයක් සමඟ පෞද්ගලික ප්‍රශ්න නැහැ. දේශපාලන පක්ෂ සමඟ දේශපාලන ප්‍රශ්න තිබුණට කමක් නැහැ කියන අදහසයි මම දරන්නේ.
සමගි ජන බලවේගය සහ මා නියෝජනය කළ එක්සත් ජාතික පක්ෂය අතර ලොකු ප්‍රතිපත්තිමය පරස්පරයක් නැහැ. ඔවුන් පක්ෂය අතැර ගියේ එජාප නායකයාගේ ඒකාධිපති ස්වභාවය නිසා බව අද වෙද්දී මට පැහැදිලි වෙලා තියෙන්නේ. ඇත්තෙන්ම මගේ දේශපාලන ප්‍රතිපත්තිය සහ සජබ දේශපාලන ප්‍රතිපත්ති අතර ලොකු වෙනසක් නැහැ. ඇත්තෙන්ම අපේ දේශපාලන අදහස් ගොඩක් දුරට සමානයි. ඒ නිසා මට අනාගත දේශපාලන කටයුතු වගේම ජනතා සේවය සමගි ජන බලවේගය තුළින් ඉටු කරන්න හැකියාව තිබෙනවා.
දැන් පළාත් පාලන මැතිවරණය සඳහා නාමයෝජනා කැඳවා තිබෙනවා. මේ පළාත් පාලන මැතිවරණයට කලකට පසු එජාපය අලියා ලකුණෙන් තරග කරනු ලබනවා. ඇත්තෙන්ම එජාපයට පළාත් පාලන ඡන්දයේදී කුමක් වෙයිද?
එක්සත් ජාතික පක්ෂයට කිසිදු ප්‍රාදේශීය සභාවක් හෝ මහ නගර සභාවක් දිනන්න බැහැ. එදා රටේ හයෙන් පහක දැවැන්ත ජනතා සහායක් ලැබූ එජාපය වගේ පක්ෂයක් අද වෙද්දි ලක්ෂ දෙක තුනක ඡන්ද ප්‍රමාණයක් ගන්නා පක්ෂයක් වෙලා ඉවරයි. ඇත්තෙන්ම මෙවර පළාත් පාලන මැතිවරණයේදී එජාපය පසුගිය මහමැතිවරණයටත් වඩා විශාල කඩාවැටීමකට ලක්වෙනවා. ඒක වළක්වන්න පුළුවන් දෙයක් නොවෙයි. නායකයාගේ විකල් හැසිරීම නිසා එජාපය දරුණු අගාධයකට ගොස් අවසානයි. පක්ෂය අගාධයට යැවීමේ වගකීම ඔහු විසින් භාරගත යුතුයි.
ඉදිරි පළාත් පාලන මැතිවරණයෙන් සමගි ජන බලවේගයට සැලකිය යුතු ජයග්‍රහණයක් ලබා ගැනීමට හැකියාව තිබේද?
සමගි ජන බලවේගය පසුගිය ජනාධිපතිවරණයේදී සියයට තිස් දෙකක් ගත්තා ආසන ගණනාවක් ජයග්‍රහණය කළා. ඉන්පසු මහමැතිවරණයේදී අඩියටම වැටිලා සිටියදී පවා ආසන හතළිහක් දිනුවා. විපක්ෂයේ ප්‍රධානම කණ්ඩායම තමයි සමගි ජන බලවේගය. මේ තත්ත්වය තුළ ඉදිරි පළාත් පාලන මැතිවරණයේදී සමගි ජන බලවේගයට එක්සත් ජාතික පක්ෂයට වඩා විශාල ජයග්‍රහණයක් ලබා ගැනීමට පුළුවන්කම තිබෙනවා. මේ වෙද්දි ජාතික ජන බලවේග ආණ්ඩුව පිළිබඳව තිබූ ප්‍රසාදය කඩාවැටෙමින් තිබෙන්නේ. මේ නිසා එහි වාසිය ඍජුවම ලැබෙන්නේ සමගි ජන බලවේගයටයි.
ආණ්ඩුවට අභියෝග කළ හැකි මැතිවරණ ප්‍රතිඵලයක් ඉදිරි මැතිවරණයේදී අනිවාර්යෙන්ම ලැබෙනවා. අද ගමට ගියොත් පැහැදිලිවම ජනතාව කියනවා සමගි ජන බලවේගයටත් යම් බලයක් ලැබෙන්න ඕනෑ කියලා.
ඔබ කියන්නේ පළාත් පාලන මැතිවරණයකින් ආණ්ඩුවට බලපෑමක් කරන්න පුළුවන් කියලද?
ඇත්ත, පළාත් පාලන මැතිවරණයකින් ආණ්ඩුව වෙනස් කරන්න බැහැ. ඒත් ආණ්ඩුවට බලපෑමක් කරන්න ආණ්ඩුව යන දිශාව වැරැදි නම් හරි දිශාවට යන්න කියලා සංඥාවක් දෙන්න පළාත් පාලන මැතිවරණයෙන් හැකියාව තිබෙනවා. අනිවාර්යෙන්ම ජනතාව මෙවර පළාත් පාලන මැතිවරණයෙන් ආණ්ඩුවට පැහැදිලි සංඥාවක් ලබා දීමට සූදානම් බව දේශපාලනය පිළිබඳව අත්දැකීම් ඇති මට පැහැදිලිවම පෙනෙනවා. ආණ්ඩුව ජනතාව වෙත ලොකු බලාපොරොත්තු ලබා දුන්නා. ඒත් අද වෙනකම් ඒ බලාපොරොත්තු සැබෑ කිරීමට ආණ්ඩුව සමත් වෙලා නැහැ. ඒ සියලු දේවල් පිළිබඳ තක්සේරුවක් තමයි ඉදිරි පළාත් පාලන මැතිවරණයෙන් ලැබෙන්නේ.
උදිත ගුණවර්ධන
ජායාරූපය – ශාන් රඹුක්වැල්ල
