කෝට්ටේ ශ්‍රී ජයවර්ධනපුර විද්‍යාලය හා කෝට්ටේ සාන්ත තෝමස් විදුහල් අතර පවත්වනු ලබන ‘කෝට්ටේ හටන’ මහ ක්‍රිකට් තරගය මේ මස 28, 29 හා 30 දිනවල කෝල්ට්ස් ක්‍රීඩාංගණයේදී නව මුහුණුවරකින් පැවැත්වීමට සියලු කටයුතු සූදානම් වේ. මෙතෙක් මේ මහ තරගය දින දෙකක් පැවැතියද ශ්‍රී ලංකා ක්‍රිකට් ආයතනය පාසල් ක්‍රිකට් සංගමය හරහා මූල්‍ය ප්‍රතිපාදන ලබාදීම හේතුවෙන් දින තුනක තරගයක් ලෙස පැවැත්වේ.1919දී ශ්‍රී ජයවර්ධනපුර විද්‍යාල ක්‍රිකට් පිලේ නායකයා වූ කේ.ජේ. රණසිංහ මහතා අනුස්මරණය කරමින් ‘රණසිංහ අනුස්මරණ කුසලානය’ වෙනුවෙන් මේ තරගය පැවැත්වේ.
මෙතෙක් පැවති මහ තරග ඉතිහාසයේදී කෝට්ටේ ශ්‍රී ජයවර්ධනපුර විදුහල තරග 9ක් දිනා ඇති අතර, කෝට්ටේ සාන්ත තෝමස් විදුහල තරග 5ක ජය වාර්තා කළේය. ඉතිරි තරග සියල්ලම නිම වූයේ ජය පරාජයෙන් තොරවය. පසුගිය වසරේ පී. සරා ඕවල් පිටියේ පැවති 45 වැනි ‘කෝට්ටේ හටන’ වාර්ෂික මහා ක්‍රිකට් තරගය ජය පරාජයෙන් තොරව අවසන් විය.
