ඉන්දීය ප්‍රිමියර් ලීග් ක්‍රිකට් තරගාවලියට මෙවර සහභාගිවන ශ්‍රී ලංකා ක්‍රිකට් ක්‍රීඩකයන් පිරිස 8ක් දක්වා ඉහළ යයි. දිල්ලි කැපිටල්ස් සමඟ ඇති කරගත් ගිවිසුමෙන් ඉවත් වූ එංගලන්ත ක්‍රීඩක හැරී බෲක්ට වසර දෙකක අයිපීඑල් තහනමක් පැනවී‍මෙන් පසු ශ්‍රී ලංකා හිටපු විස්සයි20 නායක දසුන් ශානකට එම පිලෙන් හදිසි ආරාධනාවක් ලැබිණි. ඒ සමඟ ඉන්දිය ප්‍රිමියර් ලීග් ක්‍රිකට් තරගාවලියේ ශ්‍රී ලංකා නියෝජනය ඉහළ ගියේය.
මෙවර ඉන්දීය ප්‍රිමියර් ලීග් ක්‍රිකට් තරගාවලියට මතීෂ පතිරණ, වනිඳු හසරංග, මහීෂ් තීක්ෂණ, නුවන් තුෂාර, ඒෂාන් මාංලිංග, කමිඳු මෙන්ඩිස් හා දුෂ්මන්ත චමීර යන ක්‍රීඩකයන් හත්දෙනා ඉන්දියාව බලා පිටත්ව ගොස් සිටි අතර, මෙයට දින දෙකකට පෙර දසුන් ශානක ද දිල්ලි කැපිටල්ස් කණ්ඩායමේ පුහුණුවීම්වලට එක් වූහ.
මේ මස 22 වැනිදා ආරම්භවන ඉන්දීය ප්‍රීමියර් ලීග් ක්‍රිකට් තරගාවලියට සහභාගිවන සියලු ක්‍රීඩකයන් මේ වන විට පුහුණුවීම් ආරම්භ කොට ඇති අතර, පළමු තරගයට ශ්‍රී ලංකාවේ නුවන් තුෂාර ඇතුළත් රෝයල් චැලෙන්ජර්ස් බැංගලෝර් පිල හා අජන්කයා රහ්නේ නායකත්වය දරන කොල්කටා නයිට් රයිඩර්ස් අතර තරගය කොල්කටා ඊඩ්න් ගාඩ්න් ක්‍රීඩාංගණ‍යේදී පැවැත්වේ. මේ 23 වැනිදා හද්‍රාබාද්හි පැවැත්වෙන දෙවැනි තරගයේදී වනිඳු හසරංග හා මහීෂ් තීක්ෂණ නියෝජනය කරන රාජස්ථාන් රෝයල් සමඟ පැට් කමින්ස්ගේ නායකත්වයෙන් යුත් සන්රයිස් හයිද්‍රාබාද් තරගය පැවැත්වේ.
අයිපීඑල් තරගාවලියට සහභාගිවන මතීෂ පතිරණ ඉන්දීය රුපියල් කෝටි 13කට (ශ්‍රී ලංකා රුපියල් කෝටි 44ක්) චෙන්නායි සුපර් කිංග්ස් පිල මිලදී ගත් අතර, එය මෙවර ශ්‍රී ලංකා ක්‍රීඩකයකුගේ වැඩිම ගෙවීම වේ. වනිඳු හසරංග ඉන්දීය රුපියල් කෝටි 5.25කට (ශ්‍රී ලංකා රුපියල් කෝටි 18ක්) හා මහීෂ් තීක්ෂණ ඉන්දීය රුපියල් කෝටි 4.4කට (ශ්‍රී ලංකා රුපියල් කෝටි 15ක්) රාජස්ථාන් රෝයල් මිලදී ගත්හ.
වේග පන්දු යවන නුවන් තුෂාර ඉන්දීය රුපියල් කෝටි 1.6කට (ශ්‍රී ලංකා රුපියල් කෝටි 5.5ක්) රෝයල් චැලෙන්ජර්ස් බැංගලෝර් පිල, ඒෂාන් මාංලිංග ඉන්දීය රුපියල් කෝටි 1.2කට (ශ්‍රී ලංකා රුපියල් කෝටි 3.5ක්) හා කමිඳු මෙන්ඩිස් ඉන්දීය රුපියල් ලක්ෂ 75කට (ශ්‍රී ලංකා රුපියල් කෝටි 2.5ක්) සන්රයිස් හයිද්‍රාබාද් කණ්ඩායම මිලදී ගත්තේය. වේග පන්දු යවන දුෂ්මන්ත චමීර දිල්ලි කැපිටල්ස් පිල ඉන්දීය රුපියල් ලක්ෂ 75කට (ශ්‍රී ලංකා රුපියල් කෝටි 2.5ක්) තක්සේරු කළේය.
අලුතෙන්ම එක්වූ දසුන් ශානකට ඉන්දීය ප්‍රිමියර් ලීග් ක්‍රිකට් වෙන්දේසියේදී ඉන්දීය රුපියල් ලක්ෂ 75ක් (ශ්‍රී ලංකා රුපියල් කෝටි 2.5ක්) තක්සේරු මුදලක් ඉදිරිපත් කොට තිබිණි. එක්සත් අරාබි එමීර් රාජ්‍යයේ පැවති ඉන්ටර්නැෂනල් ලීග් විස්සයි20 තරගාවලියේ ශූරතාව දිනූ ඩුබායි කැපිටල්ස් කණ්ඩායමේ ප්‍රබල සාමාජිකයකුවූ දසුන් එම තරගාවලියේදි දැක් වූ දක්ෂතා හේතුවෙන් මෙවර දිල්ලි කැපිටල්ස් කණ්ඩායමට කැඳවා ඇත.
