බාල වයස්කාර ළමා අපචාරයකට අධිකරණයෙන් වරදකරු වූ තඹුත්තේගම කලාප අධ්‍යාපන කාර්යාලයට අනුයුක්තව සේවය කරන විදුහල්පතිවරයා සම්බන්ධ දෙපාර්තමේන්තු මූලික විමර්ශන කටයුතු ආරම්භ කරන බව උතුරු මැද පළාත් ප්‍රධාන ලේකම් රන්ජන ජයසිංහ මහතා පැවසීය.
ප්‍රධාන ලේකම් රන්ජන් ජයසිංහ මහතා සඳහන් කරන්නේ දින ගණනකට පෙර උතුරු මැද පළාත් ප්‍රධාන ලේකම් ධුරය භාරගත් තමා මේ පිළිබඳව නොදන්නා බවයි. වහාම මේ පිළිබඳව සොයා බලා අධ්‍යයනය කර අවශ්‍ය අදාළ සියලු ක්‍රියාමාර්ග ගන්නා බවද ප්‍රධාන ලේකම්වරයා අවධාරණය කළේය. ළමා අපචාරයක් සම්බන්ධයෙන් අධිකරණයේදී වරද පිළිගත් තඹුත්තේගම අධ්‍යාපන කලාපයට අයත් විදුහලක සේවය කරමින් සිටි විදුහල්පතිවරයා සම්බන්ධව ඉකුත් වසරේදී හිටපු උතුරු මැද පළාත් ප්‍රධාන ලේකම්වරයා විසින් දෙපාර්තමේන්තු මට්ටමේ මූලික විමර්ශනයක් ආරම්භ කර ඒ සඳහා නිලධාරියකු පත්කර තිබිණි.
එහෙත් නව පාලනය පැමිණීමෙන් පසු ප්‍රබල දේශපාලනික ක්‍රියාකාරිකයකු වන මේ විදුහල්පතිවරයාට එරෙහි දෙපාර්තමේන්තු විමර්ශන නැවතී පරීක්ෂණ පැවැත්වූ විමර්ශන නිලධාරියාද ඉවත්කර ඉකුත් ජනවාරි මාසයේ සිට පරීක්ෂණ කටයුතු නතර වූ බව ලංකා ගුරු සංගමය චෝදනා කළේය.
මේ පිළිබඳව පෙරේදා (17) මුද්‍රිත මාධ්‍ය මඟින් කරුණු අනාවරණය කළ අතර, කිසිදු බලපෑමකින් තොරව මේ සම්බන්ධව අධ්‍යයනය කර අවශ්‍ය පියවර ගන්නා බවට උතුරු මැද පළාත් නව ප්‍රධාන ලේකම්වරයා සහතික විය.
