යාපනයේ වෙත්තිලකේණී විනයාගපුරම් ප්‍රදේශයේ ධීවරයන් දෙපිරිසක් අතර ඇති වූ ගැටුමකින් පෙරේදා (17) එක් ධීවරයෙකු බරපතළ ලෙස තුවාල ලබා තිබේ.
ධීවර වරායට පැමිණි එක් ධීවරයෙකු ලණු 150කටත් වඩා වැඩි ප්‍රමාණයක් භාවිත කරණ නීති විරෝධී දැලක් යොදා ගෙන මසුන් මැරීමට සූදානම් වීම නිසා මතු වූ ආරවුලක් මත දැනට දින කිහිපයක් තිස්සේ වෙත්තිලකේණී ධීවර තොටුපළේ ධීවරයන් අතර ඉතා උණුසුම්කාරී වාතාවරණයක් ගොඩනැඟී තිබේ.
නීති විරෝධී දැල භාවිත කොට ට්‍රැක්ටර් හා ටිපර් රථ භාවිත කරමින් එම දැල ඇදීමේ ක්‍රියාවට ධීවර සංගමයේ සෙසු ධීවරයින් විරෝධය පළ කරමින් වෙත්තිලකේණී ධීවර තොටුපොළ අසල විරෝධතාවක් ආරම්භ කොට තිබේ. නීති විරෝධී දැලේ හිමිකරු තවත් පිරිසක්ද කැටුව බලහත්කාරයෙන් එම දැල මුහුදට දැමීමට යාමේදී ගැටුම හටගෙන තිබේ. පහර කෑමට ලක්ව ඇත්තේ නීති විරෝධී දැල මුහුදට දැමූ ධීවරයාගේ සේවකයෙකි.
තුවාල ලැබූ පුද්ගලයා රැගෙන එම ධීවරයා අදාළ ස්ථානයෙන් ඉවත්ව ගොස් ඇතත් ඔහුට එරෙහීව නීතිය ක්‍රියාත්මක නොවීමට විරෝධය පළ කරමින් ධීවරයෝ මුහුදු යාමෙන් වැළකී වෙත්තිලකේණී තොටුපොළ අසල විරෝධතාවක් ආරම්භ කොට තිබේ.
යාපනය සහකාර ධීවර අධ්‍යක්ෂ කාර්යාලය හා පේදුරුතුඩුව පොලීසිය පරීක්ෂණ ආරම්භ කොට තිබේ.
