පොලීසියෙන් මදිපුංචිකම්
යුක්තියේ පිහිට ලබාදෙන්නැයි පියා ආයාචනා කරයි
ආබාධිත තත්ත්වයෙන් පෙළුණ තම දියණිය බලාගන්නා බවට, කොටදෙණියාව ප්‍රදේශයේ කාන්තාවක් විසින් රැගෙන ගොස්, ඇයට හිමි රක්ෂණ වන්දි මුදල සහ තවත් මුදල් තොගයක් ලබාගෙන, ඇය අබිරහස් ලෙස මියයෑමෙන් පසු කිසිදු පරීක්ෂණයක් නොකොට පැයක් ඇතුළත ආදාහනය කිරීම පිළිබඳ කොටදෙණියාව සහ අරලගංවිල පොලීසියට ලිඛිතව සහ වාචිකව දැනුම් දුන්නද ඒ පිළිබඳ කිසිදු පරීක්ෂණයක් සිදු නොවූ හෙයින් දියණියගේ අබිරහස් මරණය පිළිබඳ වහාම පරීක්ෂණයක් සිදු කර, තමන්ටත්, ඇයගේ දරුවන්ටත් සාධාරණය සිදු කරන ලෙස පොලොන්නරුව, දම්මින්න, අංක 04 ලිපිනයේ පදිංචි සිවුදරු පියෙකු වන ජී.ආර්. පුණ්‍යවර්ධන මහතා සහ ඔහුගේ බිරිය හඬා වැළපෙමින් පවසයි.
එලෙස අබිරහස් ලෙස දියණිය මියගොස් මාස පහකට ආසන්න කාලයක් ගත වුවද දියණියගේ අවසන් කටයුතුවත් දැනුම් නොදී පැයක් තුළ සිදු කළ මෙම ආදාහන කටයුත්ත පිළිබඳ තමාට බරපතළ සැකයක් පවතින බවත්, 2024 ඔක්තෝබර් 25 වැනි දින දියණිය මීරිගම රෝහලේදී මියගිය පසු කිසිවකුට නොදන්වා පැයක් ඇතුළත ආදාහන කටයුතු කිරීම ගැන තමාට බරපතළ සැකයක් පවතින බවද පුණ්‍යවර්ධන මහතා පැවැසීය.
මෙම අවාසනාවන්ත ඉරණමට මුහුණ දී ඇත්තේ පුණ්‍යවර්ධන මහතාගේ වැඩිමහල් දියණිය වන සිවුදරු මවක වන ජී.ආර්. ඉරේෂා කුමුදුනි මහත්මියයි.
ඇය අංශභාග රෝගයෙන් පෙළුණු පසු ඇයගේ ස්වාමියා ඇය හැර ගොස් ඇති අතර, දම්මින්න අංක 04 ලිපිනයේ ජීවත්ව සිටියදී තම දියණිය සහ ඇයගේ බාල දියණිය කොටදෙණියාව ප්‍රදේශයේ එන්.පී. චන්දිමා මල්කාන්ති යන අය හා තවත් කිහිපදෙනෙකු කාර් රථයකින් අරලගංවිල නගරයට රැගෙන ගොස් රක්ෂණ වන්දි මුදලද ලබාගෙන ගොස් ඇති බවට පුණ්‍යවර්ධන මහතා විසින් තොරතුරු සොයාගෙන ඇත.
මාස පහකට ආසන්න කාලයක සිට දියණියට අත් වූ ඉරණම පිළිබඳව මානසික පීඩනයට පත්ව සිටින හෙයින් රැය නොනිදා පහන් කරන පුණ්‍යවර්ධන මහතා සහ ඔහුගේ බිරිය තම දියණියට සිදුවූ අවාසනාවන්ත සිද්ධිය පිළිබඳ මෙලෙස විස්තර කළේ හැඬූ කඳුළෙනි.
‘ අනේ මහත්තයො අපේ දුව අබිරහස් ලෙස මැරිලා දැන් මාස පහකට ආසන්න කාලයක් වෙනවා. මේ ගැන අරලගංවිල පොලීසියටත් කොටදෙණියාව පොලීසියටත් පැමිණිලි කරන්න ගියා. අරලගංවිල පොලීසියෙන් කියනවා කොටදෙණියාවේ පැමිණිලි කරන්න කියලා, කොටදෙණියාව පොලීසියෙන් කියනවා අරලගංවිල පොලීසියට පැමිණිලි කරන්න කියලා. මම ලිඛිතව පැමිණිල්ල රෙජිස්ටර් තැපෑලෙන් මේ පොලීසි දෙකටම දැම්මා. ඒත් අදටත් දුවට මොකද උනේ කියලා උත්තරයක් නෑ. අපි හරි අසරණයි. අපිට මිල මුදල් නැහැ මේ ගැන දුවලා පැනලා හොයන්න. නීතිය පිහිටවෙයි කියලා හිතුවා. ඒකත් දැන් නැහැ. අපිට දැන් එකම පිහිට තමයි මේ රටේ මාධ්‍ය, මේකෙන් හෙළිදරව් වුණාට පස්සේ පොලිස්පතිතුමාවත් මේකට අවධානය යොමු කරයි කියලා අපේ ලොකු විශ්වාසයක් තියෙනවා” යැයි, පුණ්‍යවර්ධන මහතා දෑසෙන් වැටෙන කඳුළු බිඳු පිසලමින් තම දියණියට වූ ඛේදවාචකය හෙළිදරව් කළේය.
අබිරහස් ලෙස මියගිය දුවගේ දරුවන් හතර දෙනාම ඉන්නේ අපි දෙන්න ළඟ, ඒ දරුවන්ගෙන් දෙන්නෙක් පාසල් යනවා. උගන්නගන්න විදිහක් නෑ, අපට හරිහමන් ආදායමක් නැහැ, දුවගේ හැඳුනුම්පත, උප්පැන්නය, ඇඳුම් පැළඳුම්, කිසිවක් අපිට ඒ අය ලබා දුන්නෙත් නැහැ. මම අහන්නේ කවුරුන් හෝ එහෙම මැරුණට පස්සේ ඥාතීන්, දරුවන්, දෙමාපියන් දැනුම්වත් කරන්නේ නැතිව පැයක් ඇතුළත ආදාහනය කරන්න නීතියක් තියෙනවද? ඉතින් අපිට දුවගේ මරණය අබිරහසක්” යැයි පුණ්‍යවර්ධන මහතා පැවැසුවේය.
