පාණදුර නගරයේ හඳුන්කූරු අලෙවි කරන 57 හැවිරිදි කාන්තාවකට රුපියල් 10,000ක් දෙන බව පවසා කාමරයකට රැගෙන ගොස් පසුම්බියේ තිබූ රුපියල් 25,000ක් සොරකම් කර ඇති පුවතක් පාණදුර පොලීසියෙන් වාර්තා වේ.
පාණදුර ප්‍රදේශයේ පදිංචි හඳුන්කූරු වෙළෙන්දියක විසින් කරන ලද පැමිණිල්ලක් මත මෙසේ පරීක්ෂණ ආරම්භ කර තිබේ. සැකකරු පැමිණිලිකාර කාන්තාව පාණදුර මුහුදු වෙරළ ආසන්නයේ හෝටලයකට කැටුව ගොස් කාමරයක් මිලට ගෙන නාන කාමරයට ගොස් පිරිසුදු වී පැමිණෙන ලෙස දන්වා ඇති අතර, ඇය නාන කාමරයට ගොස් නැවත පැමිණෙන විට සැකකරු දක්නට නොලැබුණු බව ඇය ලබාදුන් ප්‍රකාශයේ සඳහන් බව පොලීසිය කීය. ඇය තවදුරටත් අත්බෑගය පරීක්ෂා කිරීමේදී පසුම්බියේ තිබූ හඳුන්කූරු අලෙවි කළ රුපියල් 25,000ක මුදල නොතිබූ බව ද ඇය සඳහන් කර තිබේ. පොලීසිය හෝටලයේ ආරක්ෂක කැමරා පරීක්ෂාවේදී හෙළිව ඇත්තේ සැකකරු පසුගිය මාසයේ 64 හැවිරිදි කාන්තාවක ද මේ අයුරින්ම කැටුව විත් රන්මාලය සහ ජංගම දුරකතනයක් සොරාගෙන රක්ෂිත බන්ධනාගරගතව සිට ඇප ලබා පැමිණි 42 හැවිරිදි පුද්ගලයාම බවයි.
