ජපන් ශ්‍රී ලංකා සංස්කෘතික උත්සවය පසුගිය 15 වැනිදා ජාතික තරුණ සේවා සභාවේ අනුග්‍රහයෙන් මීරිගම යොවුන් නිකේතන රංග ශාලාවේදී උත්කර්ෂවත් අන්දමින් පැවැත්විණි.
දෙරටේ නර්තන, ගායන වාදන අංග රැසකින් සමන්විත වූ මෙම සංස්කෘතික උත්සවය සඳහා ජයිකා ආයතනික ස්වේච්ඡා නිලධාරීන්, ජපන් ජාතිකයන්
සමඟ මීරිගම යොවුන් නිකේතන පාඨමාලා හදාරන දරු දැරියන් මෙන්ම ප්‍රදේශයේ කලායතන රැසක නර්තන ශිල්පීන් ද එක්ව සිටීම විශේෂත්වයක් විය. ජයවර්ධනපුර විශ්වවිද්‍යාලයේ සහ සබරගමුව විශ්වවිද්‍යාලයේ ජපන් භාෂා අධ්‍යයන අංශයන්හි ඉගෙනුම ලබන සිසුන්ගේ නර්තන ගායනා ද මේ සඳහා එක් කර තිබිණි. තරුණ සේවා සභාවේ ගම්පහ දිස්ත්‍රික් සහකාර අධ්‍යක්ෂ මේනක බාලසූරිය මහතා උත්සවයේ අරමුණු පැහැදිලි කළ අතර, මීරිගම පුහුණු මධ්‍යස්ථානයේ ජයිකා ස්වේච්ඡා සේවිකා තෝ කෝ කුරාතා මහත්මිය විශේෂ පිළිගැනීමේ කතාවක් සිංහල භාෂාවෙන් පැවැත්වූවාය. ජපන් හා ශ්‍රී ලංකා සංස්කෘතිය පිළිබඳ කරුණු අවබෝධ කර ගැනීමේ වැදගත්කම, අත්දැකීම් හුවමාරු කර ගැනීම සම්බන්ධයෙන් කුරාතා මහත්මිය මෙහිදී කරුණු දැක්වූවාය. ජයිකා ආයතනයේ ජ්‍යෙෂ්ඨ නියෝජිත තකුමා නොගුචි මහතා මෙහිදී අදහස් දක්වමින්, 1951 වසරේ ජේ.ආර්. ජයවර්ධන මහතා විසින් ශ්‍රී ලංකාව නියෝජනය කරමින් ජපානය වෙනුවෙන් කරන ලද මෙහෙය අගය කරන බව සඳහන් කළේය.
