මුදල් හා රන් භාණ්ඩ සමඟ මෝටර් රථයක් කොල්ලකා පලා යද්දී අත්අඩංගුවට ගත් සැකකරුවන් දෙදෙනකු ලබන 25 වැනිදා දක්වා රක්ෂිත බන්ධනාගාරගත කරන ලෙස නියම කළ ත්රිකුණාමලය අතිරේක මහේස්ත්‍රාත් ඒ. අර්ජුන් වෙල්ටන් මහතා, පැන ගොස් සිටින සෙසු සැකකරුද අත්අඩංගුවට ගෙන අධිකරණයට ඉදිරිපත් කරන ලෙස පෙරේදා (17) ත්රිකුණාමලය පොලීසියට නියෝග කළේය.
මෙසේ රක්ෂිත බන්ධනාගාරගත වූයේ ත්රිකුණාමලය, ඕර්ස්හිල්, තුන්වැනි පටුමගේ පදිංචි රූබරාජා ජනෝජ් (34) සහ ත්රිකුණාමලය, කේනිඅඩි පදිංචි උදයකුමාර් මනෝජ් (35) නමැති අයයි. ත්රිකුණාමලය කොටුව පාරේදී මුව රංචුවක් නරඹමින් සිටියදී මෝටර් රථයෙන් පැමිණි යුවළක් බිය ගන්වා මෝටර් රථයේ තිබූ රුපියල් ලක්ෂ දෙකක මුදලක් සහ රුපියල් 585,000ක් වටිනා රන් භාණ්ඩ සමඟ මෝටර් රථය කොල්ලකා පලා ගිය බවට පොලීසියට ලද පැමිණිල්ලක් අනුව මඩකලපුව දෙසට පලා ගිය රතු පැහැති මෝටර් රථය අත්අඩංගුවට ගත් බවත්, සැකකරුවන් පැමිණි සුදු පැහැති මෝටර් රථය ද මේ සමඟ අත්අඩංගුවට ගෙන ඇති බවත් පොලීසිය අධිකරණය හමුවේ පැවසීය.
පැහැරගත් මෝටර් රථය කුලී පදනම මත ලබාගත් එකක් බව අනාවරණය වී තිබේ. සිද්ධිය සම්බන්ධයෙන් ත්රිකුණාමලය මූලස්ථාන පොලීසිය වැඩිදුර පරීක්ෂණ පවත්වයි.
