ආනයනික ඔසුවලට යන වියදමත් අඩු කරයි
ආදිවාසීන්ගේ ආර්ථිකයටත් ශක්තියක්
ආදිවාසී ගම්මානය හා අවට ගම්මානවලින් දේශීය ඖෂධ නිෂ්පාදනයට ඖෂධ වර්ග මිලදී ගැනීමෙන් ආදිවාසීන්ගේ ආර්ථිකය ශක්තිමත් කිරීමේ වැඩසටහනක් හා රට තුළ ප්‍රමිතියෙන් යුතු ඖෂධ නිෂ්පාදන වැඩසටහනක් සඳහා මුලපිරීම පසුගියදා සිදු කෙරිණි.
මෙරට ආයුර්වේද ඔසු නිෂ්පාදනය සඳහා පිටරටින් මෙරටට ගෙන්වන ඔසු ප්‍රමාණය අවම කරමින්, විදේශයන් වෙත ඇදී යන මුදල් අවම කර, ග්‍රාමීය ජනතාවගේ ආර්ථිකය ශක්තිමත් කිරීම සඳහා එම මුදල් යොදවා ගැනීමේ අරමුණ ඇතිව හා ප්‍රමිතියෙන් යුතු ආයුර්වේද ඖෂධ නිෂ්පාදනය අරමුණු කර ගනිමින් ජාතික ජන බලවේගය ප්‍රමුඛ රජය හා රාජ්‍ය ආයුර්වේද ඖෂධ නිෂ්පාදන සංස්ථාව ඒකාබද්ධව මේ වන විට දියත් කර තිබෙන ඔසු එකතු කිරීමේ ජාතික වැඩසටහනේ එක් අදියරයක් ලෙස මහියංගණය, දඹාන ආදිවාසී ගම්මානයේදී එකතු කරන ලද ඖෂධ මිලදී ගැනීම පෙරේදා (17) ආරම්භ කර තිබේ.
දඹාන ආදිවාසී නායක විශ්වකිර්ති වනස්පති ඌරුවරිගේ වන්නිලැ ඇත්තන් විසින් එහි ප්‍රථම ඖෂධ තොගය රාජ්‍ය ආයුර්වේද ඖෂධ නිෂ්පාදන සංස්ථාවේ කළමනාකාර අධ්‍යක්ෂ වෛද්‍ය එම්.ජී. මාරසිංහ මහතාට ඌව පළාත් ආයුර්වේද දෙපාර්තමේන්තුවේ ආයුර්වේද කොමසාරිස් ශ්‍රීයා කරුණාරත්න මහත්මිය ඉදිරියේ භාර දෙනු ලැබිණි.
දඹාන ආදීවාසි ගම්මානය හා ඒ අවට පවතින ඉතාමත් වටිනා දුර්ලභ ඖෂධ හා පැළෑටි ආරක්ෂා කර ගනිමින්, මෙම ශාක හා ශාක කොටස් ආයුර්වේද ඖෂධ නිෂ්පාදනය සඳහා යොදා ගැනීම තුළින් ආදිවාසී ජනතාවගේ ආර්ථිකය ශක්තිමත් කිරීමට ද පියවර ගෙන ඇත. විදේශයෙන් ගෙන්වන ප්‍රමිතියෙන් තොර බාල ඖෂධ වෙනුවට ප්‍රමිතියෙන් යුතු දේශීය ඖෂධ ආයුර්වේදයෙහි ඖෂධ නිෂ්පාදනය සඳහා යොදා ගැනීම මෙහි මූලික අරමුණ වී තිබේ. ආදිවාසී ගම්මානය අවට ගම්මාන වන වේවත්ත, කුකුළාපොළ, කඳුබැද්ද, එබ්බාහැර හා බුලුපිටිය යන ගම්මානවලින් එකතු කරන ලද ඖෂධ නිෂ්පාදනය සඳහා මිලදී ගැනීම මෙහිදී සිදු කෙරිණි.
මෙම අවස්ථාව සඳහා ජාතික ජන බලවේගයේ බදුල්ල දිස්ත්‍රික් පාර්ලිමේන්තු මන්ත්‍රී දිනිදු හෙන්නායක, ජාතික ජන බලවේගයේ විධායක සභික නීතිඥ උපේක්ෂා විජේතුංග, රාජ්‍ය ආයුර්වේද ඖෂධ නිෂ්පාදන සංස්ථාවේ කළමනාකාර අධ්‍යක්ෂ වෛද්‍ය එම්.ජී. මාරසිංහ, ඌව පළාත් ආයුර්වේද දෙපාර්තමේන්තුවේ ආයුර්වේද කොමසාරිස් ශ්‍රියා කරුණාරත්න ඇතුළු නාවින්න ආයුර්වේද මධ්‍යස්ථානයේ නිලධාරීන් හා ආයුර්වේද ඖෂධ නිෂ්පාදන ආයතනයේ වෛද්‍යවරුන් ඇතුළු මහත්ම මහත්මීන් රැසක් ද මෙම අවස්ථාවට සහභාගී වූහ.
