කුරුණෑගල ඉබ්බාගමුව හරහා මඩගල්ල මාර්ගයේ කුඹුක්ගැටේ නගරය හරහා ධාවනය වන බස් සේවා විධිමත් තත්ත්වයකට පත්කිරීමේ අරමුණ ඇතිව එම නගරයේ ලංගම බස් නැවතුම්පොළක් ඉදිකිරීම සඳහා මුල්ගල් තබා සිහිවටන පුවරු නිරාවරණය කොට වසර 25ක් ගතවී ගියද බස් නැවතුම්පොළ මෙතෙක් ඉදිවී නැති බව නගරවාසීහු පවසති.
වාරියපොළ, ගනේවත්ත, වැල්ලව, නෙල්ලිය, වෙල්ගාල, පොල්පිතිගම, මහව, රගොල්ලාගම, ගල්ගමුව, ඉරුදෙණියාය, තළාකොළවැව ආදී නගරවලට බස් රථ ධාවනය වන ප්‍රධාන මංසන්ධිය වන්නේද කුඹුක්ගැටේ නගරයයි. එවකට කෘෂිකර්ම හා ඉඩම් නියෝජ්‍ය අමාත්‍ය සාලින්ද දිසානායක මහතාගේ ආරාධනයෙන් එවකට ප්‍රවාහන හා මහාමාර්ග ඇමැතිව සිටි ඒ.එච්.එම්.පවුසි මහතා විසින් 2000-07-28 වැනිදා උත්සවශ්‍රීයෙන් මුල්ගල් තබා ඇත. එහෙත් තවමත් බස් නැවතුම්පොළ ඉදිවූයේ නැති බව මහජනතාව පවසති. එම මුල්ගලද අද එම ස්ථානයේ නැත. ඇත්තේ අප වාර්තාකරු විසින් මෙයට වසර 20කට පෙර එනම් 2005 වසරේදී ගත් මෙම ඡායාරූපය පමණි.
“මුල්ගල් තබනවිට අපි හිතුවා මාසෙන් දෙකෙන් බස් නැවතුම්පොළ හදයි කියලා. මේක අවශ්‍යම දෙයක් නිසා කසාගල විහාරස්ථානයේ නායක හිමියන් තමයි ඉඩම ලබා දුන්නේ. මුල්ගල වසර හතක් අටක් තිස්සේ කැලයට යටවෙලා තිබුණා. මේ වන විට මුල්ගල් තිබූ බවට එක ගඩොල් කෑල්ලක්වත් නෑ. බස් නැවතුම්පොළ ඉදි නොවුණ නිසා එතැන ඒ ඉඩමේ කුඹුක්ගැටේ පොලිස් ස්ථානය ඉදිකරලා තිබෙනවා. දැනට වසර දහයකට ඉස්සෙල්ලා නගරය මැද පාර දෙපැත්තේ වයඹ මාර්ස්ථ මගී ප්‍රවාහන අධිකාරිය මඟින් කුඩා බස් මගී ආවරණ දෙකක් හදලා තිබුණා. නගරය පුළුල් කිරීමට ඒවා කඩලා දැම්මා. ආයේ ඒවා කවුරුවත් ඉදිකළේ නැහැ. දැන් මහජනතාව පාසල් දරුවන් බස් රථ එනතුරු මහපාරේ අව්වේ වැස්සේ ඉන්නවා.“ යැයි මේ පිළිබඳව අදහස් දැක්වූ හිටපු ඉබ්බාගමුව ප්‍රාදේශීය සභා මන්ත්‍රී ඩබ්ලිව්.එල්. ආරියදාස මහතා පැවසීය.
