කරවල ප්‍රෝටීන් බහුල ආහාරයක්, බොහෝ දෙනා කරවල පරිභෝජනයට දැඩි රුචිකත්වයක් දක්වති, කරවල ඉතා රසවත්. එහෙත් කරවල නිෂ්පාදනය කරන අයගේ ජීවිතනම් රසවත් නොමැති බවයි අප කළ විමසීමකදී අනාවරණය වූයේ. ශ්‍රී ලංකවේ ධීවර කර්මාන්තයේ ව්‍යාප්තියට සාපේක්ෂව කරවල නිෂ්පාදනය සඳහා යොමුවී ඇති ප්‍රදේශ අවම මට්ටමකයි පවතින්නේ. මීගමුව, මන්නාරම, පුත්තලම සහ කල්පිටිය කරවල කර්මාන්තයට යොමුව ඇති ප්‍රදේශ ලෙස හැඳින්විය හැකිය.
කෙසේ වෙතත් දේශීය ඉල්ලුමට සරිලන ප්‍රමාණයට අප රටේ කරවල නිෂ්පාදනය නොමැති අතර කරවල සහ උම්බලකඩ ආනයනය සඳහා විශාල ආනයන වියදමක් වර්තමානයේ දැරීමට සිදුව තිබෙනවා.
අද කරවල කර්මාන්තයට බලපා ඇති ගැටලු රැසක් හේතුවෙන් කර්මාන්තය පවත්වාගෙන යන්නන් දැඩි පීඩාවට පත්ව ඇති බවයි දක්නට ලැබෙන්නේ.
ඉන්ධන මිල ඉහළයාම නිසා කරවල සඳහා මසුන් අල්ලා ගැනීමේදී ඉහළ පිරිවැයක් දැරීමට සිදුවීම, ලුණු විශාල ප්‍රමාණයක් කරවල නිෂ්පාදනය සඳහා අවශ්‍ය වන අතර ලුණු සඳහා අධික පිරිවැයක් දැරීමට සිදුවීම, මසුන් අඩු දිනවලදී සහ වැසි කාලවලදී මසුන්ගේ මිල වැඩි මට්ටමක තීරණය වීම වැනි කරුණු ඉන් ප්‍රධානයි.
කරවල නිෂ්පාදනයේදී පුරුෂ පක්ෂයට වඩා කාන්තා පාර්ශ්වය පෙරමුණ ගෙන ඇති බවක් දක්නට ලැබේ. කරවල නිෂ්පාදනයට ප්‍රසිද්ධියක් උසුලන කල්පිටිය අර්ධද්වීපයේ, බත්තලංගුන්ඩුව දූපතේ කරවල නිෂ්පාදනයේ යෙදෙන කේ.ඒ.කමලාවතී අදහස් දක්වමින්
“අපි මේ දූපතට ඇවිල්ලා අවුරුදු ගාණක් වෙනවා. ඒ දවස්වල කරවල හදන්න ලොකු වියදමක් ගියෙ නෑ. ඒ වගේම මාළුවල හිඟයක් තිබුනෙත් නෑ. අද හැමදේම හිඟයිනේ. ඒවගේම මිල අධිකයි. කරවල වේළන්න ලුණු නැතුව බැහැනෙ. ඒව ඕනමයි. දැන් ලුණුවල මිල ඉතා අධිකයි. ඒත් අපිට කරවලවල ගාණ වැඩි කරන්න බැහැ. අපේ මහන්සිය දිහා බලපුවම අපිට මේකේ ලොකු වාසියක් නෑ. ගිනි කාශ්ටකේ කරවල වේලෙන්නෙ. අපිත් කරවල වගේ ඒ කාෂ්ටකයටම වේළෙනවා. ඒත් අද හොඳ මිලක් ලැබෙන්නෙ නැහැ. අපිට ලුණුවලට සාධාරණව මිලක් ලබා දෙන්න. එතකොට අපිට මීට වඩා අඩු මිලකට කරවල ජනතාවට ලබා දෙන්න පුළුවන්. රහ කර කර කරවල කෑවට අපේ ජීවිතවල කිසිම රහක් නෑ මහත්තයෝ.”
වයඹ වෙරළ තීරයේ වෙන්නප්පුව, උල්හිටියාව මුහුදු සීමාවේ ජනතාවගේද ප්‍රධාන ජීවනෝපාය වන්නේ ධීවර කර්මාන්තයයි. එහි කරවල නිෂ්පාදනයද යහමින් පවත්වාගෙන යයි. අව් කාෂ්ඨකය, වැස්ස මේ සියලු බාධකයන් හමුවේ ඔවුන්ගේ දුක් අඳෝනාවයි මේ….
“අපි මේ කරවල හදන්න ගත්තේ අද ඊයෙක නොවෙයි. දැන් අවුරුදු ගාණක් වෙනවා. මේ ලුණු ප්‍රශ්නෙ තමා අපිට විශාල ලෙස දැනිලා තියෙන්නේ. වෙනදා ලුණු මිටියක් අපි රුපියල් හයසීය ගාණේ ගත්තෙ. අද රුපියල් 5000කට වැඩිවෙලා තියෙනවා. ඉතින් කොහොමද කරවල වේළන්නේ. ලුණුවල මිල වැඩි වුණාට අපිට කරවලවල මිල වැඩි කරන්න බෑ. එහෙම වුණොත් මේ කරවල ටික විකුණ ගන්ඩත් බැරිවෙනවා.“ ඩෙන්සිල් ජෝශප් පෙරේරා එසේ පවසන්නට විය.
“වැහි කාලවලදී අපි අපා දුකක් විඳින්නෙ. සමහරදාට වේළගන්න බැරි වෙලා මාළු ටික අපතේ යනවා. මේ වගේ දුක් විඳල තමයි අපි වෙළෙඳපොළට කරවල දාන්නේ. කාටත් තේරෙන්නෙ නෑ. අපි කරවල වේලන්න ගන්න මහන්සිය. මේ ලුණුවල ගාණ අඩුකරල දෙන්න කියල තමයි අපි ඉල්ලන්නේ.“ ප්‍රින්සි මේබල් ජසින්තා පවසා සිටියා.
“ඇත්තටම ගොඩක් අය කරවල කන්න ආසයි. කරවල සඳහා හොඳ ඉල්ලුමකුත් ති‍ෙයනවා. හැබැයි කරවල සකස් කරන්න අපි විඳින දුක දන්නේ අපි විතරයි. ඒක කරවල කන අයට, කරවල වෙළෙඳාම දිහා බලා ඉන්න අයට තේරෙන්නේ නෑ.
ඇවිල්ල බැලුවොත් තේරෙයි කරවලත් එක්ක කොච්චර කරවල නිෂ්පාදකයෝ ඔට්ටු වෙනවද කියලා. සමහර වෙලාවට මිනිසුන් ගාණ වැඩියි කියනවා. හැබැයි මාළු ගෙනල්ලා කරවල කරනකන් මොනතරම් කට්ටක් කනවද ඒක කාටවත් තේරෙන්නේ නැහැ. මේ කරවල රහවුණාට කරවල නිෂ්පාදනය කරන අපගේ. ජීවිත සුන්දර නැහැ.” අයේශා නන්දනී මෙසේ පවසන්නට විය.
රටේ ආර්ථිකයට සුවිශාල දායකත්වයක් ලබා දෙන කරවල නිෂ්පාදනය සම්බන්ධයෙන් අවධානය යොමු කිරීම කාලීන අවශ්‍යතාවක් බවයි මේ අයගේ මැසිවිලිවලින් කියවෙන්නේ.
