රත්ගම ප්‍රාදේශීය සභාවට අයත් රත්ගම පොදු ක්‍රීඩාංගණයේ පිහිටි ක්‍රීඩාගාරයේ වහල සම්පූර්ණයෙන්ම කඩා වැටී තිබේ. රත්ගම, දොඩන්දූව, කුමාරකන්ද, බූස්ස ආදී ප්‍රදේශ රැසක පාසල් දරුවන් හා යෞවනයන් ක්‍රීඩා කටයුතු සඳහා යොදා ගන්නේ මෙම ක්‍රීඩාංගණයයි.
රත්ගම පොලීසියට උතුරු දෙසින් රත්ගම මහජනපොළට පිටුපසින් මෙම ක්‍රීඩාංගණය පිහිටා තිබේ. ක්‍රීඩාගාරයේ යට කොටසේ කාය වර්ධන පුහුණු මධ්‍යස්ථානයක් ද රත්ගම ප්‍රාදේශීය සභාව විසින් පවත්වාගෙන යනු ලබයි. ඒ වෙනුවෙන් එක් අයකුගෙන් මසකට රුපියල් 800/- ක මුදලක් අය කරනු බවද එහි සේවකයෝ ප්‍රකාශ කරති. ක්‍රීඩා පිටියද ක්‍රීඩා කටයුතු සඳහා රත්ගම ප්‍රාදේශීය සභාව මඟින් වෙන්කර ගත යුතුය. ඒ වෙනුවෙන් මුදල් ගෙවුවත් ක්‍රීඩකයින්ට කිසිදු පහසුකමක් නොලැබෙන බවද ක්‍රීඩා පුහුණුකරුවන් මෙන්ම පාසල් ගුරුවරුන් ද ප්‍රකාශ කරති.
2014 නොවැම්බර් 03 දින නාමල් රාජපක්ෂ මහතා විසින් මුල්ගල තබා මෙම ක්‍රීඩාගාරයේ ඉදි කිරීම් ආරම්භ කර තිබේ. ‘මහින්ද චින්තන ඉදිරි දැක්ම’ යටතේ ‘දොරින් දොරට ගමින් ගමට’ වැඩසටහන මඟින් මෙම ක්‍රීඩාගාරය ඉදිකරන ලද බව ඒ වෙනුවෙන් වූ සමරු ඵලකයේ සඳහන් වේ.
මෙම ක්‍රීඩාංගණයේ රාත්‍රී ක්‍රීඩා කටයුතු වෙනුවෙන් විදුලි පහන් පද්ධතියක්ද ස්ථාපිත කර ඇතත් එයද මේ වන විට නිසි පරිදි ක්‍රියාත්මක වන්නේ නැත. ඒ නිසාම රාත්‍රී ක්‍රීඩා කටයුතුද ඇන හිට තිබේ. ගෝඨාභය රාජපක්ෂ ජනාධිපතිවරයාගේ කාලයේ ‘සෞභාග්‍ය‍ෙය් දැක්ම’ සංකල්පයට අනුව 2021 ජනවාරි 30 වැනිදා දකුණු පළාත් ආණ්ඩුකාර විලී ගමගේ මහතාගේ ප්‍රධානත්වයෙන් එය විවෘත කරන ලද බවද ඒ වෙනුවෙන් වූ සමරු ඵලකයේ සඳහන් වේ.
මෙ සම්බන්ධයෙන් රත්ගම ප්‍රාදේශීය සභාවේ ලේකම් ටී.ඩී.ශ්‍යාමා පුෂ්පමාලි මහත්මියගෙන් විමසූ විට ඇය මෙසේ පැවසුවා.
“රත්ගම ක්‍රීඩාංගණයේ ක්‍රීඩාගාරයේ වහල කඩා වැටී තිබෙන බව සත්‍යයක්. මේ සම්බන්ධයෙන් හා විදුලි පහන් සම්බන්ධයෙන් පැමිණිලි රැසක් ලැබී තිබෙනවා. ක්‍රීඩාගාරය යට ප්‍රාදේශීය සභාවට අයත් කාය වර්ධන මධ්‍යස්ථානයක්ද පවත්වාගෙන යෑමත් සත්‍යයක්. ක්‍රීඩාපිටියෙන් හා කායවර්ධන මධ්‍යස්ථානයෙන් ප්‍රාදේශීය සභාවට යම් ආදායමක්ද ලැබෙනවා. මේ ක්‍රීඩාගාරය මේ තත්ත්වයෙන් තිබීම, ප්‍රාදේශීය සභාවේ අපේ පාලනයටත් අගෞරවයක්. ඒක යම් මට්ටමකට පාරට පේන්නේ නැත්තේ මහජනපොළේ ගොඩනැඟිලි නිසයි.
මේ ක්‍රීඩාගාරය අපි අලුත්වැඩියා කිරීමට පියවර ගන්නවා. 2025 වර්ෂයේ අය වැය යෝජනාවලටත් එය ඇතුළත් කරලයි තිබෙන්නේ. ඉතා ඉක්මනින්ම ඉතා අලංකාර ලෙස ක්‍රීඩාගාරයේ වහල අපි හදනවා. මේ බව අවට පාසල්වලටත් ක්‍රීඩා සමාජ හා ක්‍රීඩකයින්ටත් දැනුම් දීලයි තිබෙන්නේ.“
