රටේ නිෂ්පාදන ආර්ථිකයක් ස්ථාපිත කිරීමට ව්‍යවසායකත්ව උන්මාදයක් නිර්මාණය කළ යුතුයි
ඇමැති සුනිල් හඳුන්නෙත්ති
නිෂ්පාදන ආර්ථිකයක් රට තුළ ස්ථාපිත කිරීම සඳහා ව්‍යවසායකත්ව උන්මාදයක් නිර්මාණය කළ යුතු බව කර්මාන්ත සහ ව්‍යවසායකත්ව සංවර්ධන ඇමැති සුනිල් හඳුන්නෙත්ති මහතා පාර්ලිමේන්තුවේ දී ඊයේ (18) පැවසීය.
වත්මන් ආණ්ඩුව යටතේ නව ව්‍යවසායකයන් ආර්ථිකය කැඳවීමට අපේක්ෂා කරන බවද ඇමැතිවරයා පැවසුවේය.
අයවැය තෙවැනි වර කියවීමේ විවාදයට එක්වෙමින් ඇමැතිවරයා මේ බව කියා සිටියේය.
ඇමැතිවරයා මෙසේද පැවසුවේය.
ජාතික ජන බලවේගය ප්‍රතිපත්ති ප්‍රකාශය අනුව නිෂ්පාදන ආර්ථිකයක් පණ ගැන්වීම, නිෂ්පාදන ආර්ථිකයට ජනතාව සහභාගි කරවා ගැනීම සහ ජනතාවට සාධාරණ ලෙස ප්‍රතිලාභ බෙදී යාම ගැන සහතික වීම මූලික අරමුණ වෙනවා. පසුගිය වසර 76ක කාලය තුළදී අසමතුලිත සංවර්ධන වැඩසටහන්වල ප්‍රතිඵලය වී තිබෙන්නේ ඍණ ආර්ථිකයකට කඩා වැටුණා, ණය බර වැඩි වුණා. කර්මාන්ත ක්ෂේත්‍රයෙන් වැඩි දායකත්වයක් සපයා ගැනීමට අපි කටයුතු කරනවා. අපනයනය සඳහා අවශ්‍ය පියවර ගන්නවා. ඩොලර් බිලියන 16ක අපනයන ආර්ථිකයක් මේ වන විට අපට තිබෙනවා. මේ වසර තුළදී ඩොලර් බිලියන 19ක ඉලක්කයට යාම සඳහා අපි අපේක්ෂා කරනවා. 2030 වසර වන විට ඩොලර් බිලියන 28ක කර්මාන්ත දායකත්වයක් අපනයන ක්ෂේත්‍රයට ලබාදෙනවා. කර්මාන්ත හා ව්‍යවසායකත්වය වෙනුවෙන් වෙන්වෙලා තිබෙන භූමිය සීමිතයි. බස්නාහිර, වයඹ වැනි පළාත්වල කර්මාන්ත ක්ෂේත්‍රයට තිබෙන භූමියේ දායකත්වය ඉතා සීමිතයි. ව්‍යවසායකත්වය වෙනුවෙන් අපට තිබෙන්නේ 0.01ක ඉඩම් දායකත්වයක්. 2030 වසර වන විට එම ඉඩම් දායකත්වය අඩුම තරමේ සියයට 1ක් දක්වා ඉහළ නැංවීමට අපි උත්සාහ කරනවා. ජාත්‍යන්තර ප්‍රමිතිය අනුව සියයට 3ක භූමි දායකත්වයක් තිබිය යුතුයි. මේ ගැන අපි ජනාධිපතිතුමා එක්කත් කතා කළා. කෘෂිකර්මාන්තයට යෙදවීමට තිබෙන ඉඩම් වැඩිපුරම කර්මාන්ත ව්‍යවසායකයන්ට ලබාදීමට අපේක්ෂා කරනවා. ව්‍යවසායකත්ව උන්මාදයක් ඇති කළ යුතුයි. වාහන කෑලි කපලා මෙහෙට ගෙනැවිත් බට් කරනවා කියලා සමහරු කියනවා. බට් කරන එක නොව වාහන උපාංග නිෂ්පාදනයයි එතැන සිදු වන්නේ. යකඩ ආශ්‍රිත කර්මාන්තය තිබෙනවා. ලෙදර් නිෂ්පාදනත් තිබෙනවා. ඇපරල් ඉන්ඩස්ට්‍රි එකට විශාල ඉල්ලුමක් අපට තිබෙනවා. මැණික් හා ස්වර්ණාභරණ මඟින් විශාල ආදායමක් අපට ලැබෙනවා. විද්‍යාත්මක පදනමක් යටතේ අපේ අමාත්‍යාංශය හදලා තිබෙනවා. ගමේ රැකියා විරහිත තරුණයෙක් ප්‍රාදේශීය ලේකම් කාර්යාලයට පැමිණ ව්‍යවසායකයෙක් වීමට කැමැත්තක් පළ කළොත් ඒ සඳහා අද අවස්ථාව තිබෙනවා. කුඩා ව්‍යාපාර අංශය, ජාතික ව්‍යවසායකත්ව අධිකාරිය, කාර්මික සංවර්ධන මණ්ඩලය, අපනයන සංවර්ධන මණ්ඩලය, පේෂකර්ම ආයතනය, ශිල්ප සභාව, ලක්සල වැනි ආයතන හැම එකකම ප්‍රාදේශීය නිලධාරීන් සිටිනවා. මීට කලින් ඔවුන් වැඩ කළේ වෙන වෙනම. දැන් ඔවුන් ඒකාබද්ධව ගමට ගොස් සිටිනවා. අපනයන සඳහා වන අමාත්‍ය සභාව ස්ථාපිත කර තිබෙනවා. අවුරුදු 28කට පසුව මේ මාස 4 තුළ අපි එය පිහිටෙව්වා. අපනයනට අදාළ සියලු කර්මාන්ත ඒකාබද්ධ කළා. වැවිලි කර්මාන්ත අමාත්‍යාංශය, කෘෂිකර්ම අමාත්‍යාංශය, මාර්ග හා ප්‍රවාහන අමාත්‍යාංශය, මුදල් අමාත්‍යාංශය මූලිකව අමාත්‍යවරු කමිටුවක් අපි හැදුවා. අපනයන ක්ෂේත්‍රයේ සියලු ප්‍රශ්න එතැනින් විසඳා ගන්න පුළුවන්. හැම දිස්ත්‍රික්කයකට සම්බන්ධීකරණ කමිටුව, දිස්ත්‍රික් කෘෂිකර්ම කමිටුව යනාදිය තිබෙනවා. දිස්ත්‍රික් කර්මාන්ත ප්‍රවර්ධන සභාවක් පිහිටුවීමට පුළුවන්. රත්නපුරය, හම්බන්තොට, මාතර, ගාල්ල යනාදී දිස්ත්‍රික්කවල සක්‍රිය කර තිබෙනවා. වාණිජ මණ්ඩල, බැංකු යනාදිය දිස්ත්‍රික් කර්මාන්ත සභාවට කැඳවන්න පුළුවන්. ඉඩම් අමාත්‍යාංශයත් කැඳවන්න පුළුවන්. අලුත් කර්මාන්ත පිහිටුවීමට එය වැදගත් වෙනවා. චිත්‍රපට සංස්ථාව වෙනම කර්මාන්තයක්. ඒවා හඳුනාගත යුතුයි. අගය එකතු කරන කර්මාන්ත ගණනාවක් අපි හඳුනාගෙන තිබෙනවා. නව ආයෝජන කලාප ස්ථාපිත කරනවා. සෑම පළාතකම කර්මාන්ත ප්‍රවර්ධනයක් අපි සිදු කරනවා. කර්මාන්තයක් ආරම්භ කිරීමට විදේශීය ආයෝජකයෙක් ආවොත් අඩු තරමේ අවුරුදු එකහමාරවක්වත් යනවා අනුමත කර ගැනීම් සඳහා. සෑම පළාතකටම සත්කාර සපයන මධ්‍යස්ථාන ඉදි කරනවා. ස්ටාර්ටප් ක්ලස්ටර් හදන්න අපි තීරණය කළා. හැම ප්‍රාදේශීය ලේකම් කොට්ඨාසයකටම එක ක්ලස්ටර් එක බැඟින් 15,000ක් පමණ අලුතින් රැකියා උත්පාදන කරන්න කටයුතු කරනවා. ස්ටාර්ටප් ක්ලස්ටර් 331ක් අපි හඳුනාගෙන තිබෙනවා. ඉන්දියාව, චීනය, දකුණු කොරියාව, වියට්නාමය දැවැන්ත ලෙස ව්‍යවසායකයන් ආර්ථිකයට කැඳවන ක්‍රියාවලියක් බවට පත්ව තිබෙනවා.
විරැකියාවට තිරසර විසදුමකට සරසවි, පාසල් අධ්‍යාපනයේ ද ප්‍රතිසංස්කරණ අවශ්‍යයි
අගමැති ආචාර්ය හරිනි අමරසූරිය
රැකියා විරහිතභාවයට තිරසර පිළිතුරක් සෙවීම සඳහා විශ්වවිද්‍යාල අධ්‍යාපනය තුළ පමණක් නොව පාසල් පද්ධතියේ සාමාන්‍ය අධ්‍යාපනය තුළ ද ප්‍රතිසංස්කරණ අවශ්‍ය බව අග්‍රාමාත්‍ය, අධ්‍යාපන, උසස් අධ්‍යාපන හා වෘත්තීය අධ්‍යාපන ඇමැති ආචාර්ය හරිනි අමරසූරිය මෙණෙවිය පාර්ලිමේන්තුවේ දී ඊයේ (18) පැවසුවාය.
රජයේ පුරප්පාඩුවලට උපාධිධාරීන් 35,000ක් බඳවා ගැනීමට වෙන් වූ ප්‍රතිපාදනයන්ට අමතරව උපාධිධාරීන්ට රැකියා ලබාදීම සඳහා තවත් රුපියල් මිලියන 10,000ක අතිරේක ප්‍රතිපාදනයක් වෙන් කර ඇති බවත් අග්‍රාමාත්‍යවරිය ප්‍රකාශ කළාය.
අමාත්‍යාංශය නිවේදන ඉදිරිපත් කරමින් අග්‍රාමාත්‍යවරිය මේ බව කියා සිටියාය.
අගමැතිවරිය මෙසේද පැවසුවාය.
ප්‍රාථමික හා ද්විතීය මට්ටම සාමාන්‍ය අධ්‍යාපනය සම්බන්ධයෙන් වෙන් කළ දත්ත නොමැති අතර සමස්ත ලෙස එම අවධි දෙකටම පොදුවේ එක් සිසුවෙකු සඳහා වෙන් කළ මුදල් තිබෙනවා. වසර ගණනාවක තොරතුරු තිබෙනවා. 2022 වසරේදී රුපියල් 75096යි. 2023 වසරේදී රුපියල් 87594යි. 2024 වසරේදී රුපියල් 97784යි. 2025 ඇස්තමේන්තුගත රුපියල් මිලියන 1 යි 15,715යි.
තෘතියික මට්ටම එක් එක් විෂය ධාරාව අනුව වෙනස් වෙනවා. ඒ තොරතුරු සභාගත කරනවා. තෘතියික මට්ටමෙන් ලක්ෂ 405313යි. පුනරාවර්තන වියදමෙන් ගත් තොරතුරු තමයි ඒ. විවිධ ක්ෂේත්‍රවලින් අධ්‍යාපනය හදාරා අවසන් කර උපාධි ගෙන රැකියා සොයා ගැනීමට ගතවන කාලය ගැන විශ්වවිද්‍යාවලින් අධ්‍යයනය කර තිබෙනවා. ඒ තොරතුරු අසම්පූර්ණයි. රැකියා ලබා ගැනීමේදී සමාජ ගනුදෙනු ද බලපානවා. විශේෂයෙන්ම පෞද්ගලික අංශයට එය බලපානවා. එය සංකීර්ණයි. කෙටියෙන් පිළිතුරු දීමට නොහැකියි. කෘෂිකර්ම ක්ෂේත්‍රයේ උපාධි රැකියා නියුක්ති 60.3යි. ඉංජිනේරු විද්‍යාවේ 73.5යි. එලෙස එක් එක් ක්ෂේත්‍රයෙන් විවිධ ප්‍රතිශතවලින් රැකියා නියුක්ත වෙලා තිබෙනවා.
විශ්වවිද්‍යාල ප්‍රතිපාදන කොමිෂන් සභාව නවක උපාධි අපේක්ෂකයන්ට වෘත්තීය වැඩසටහන් සැලසුම් කිරීම සහ ක්‍රියාත්මක කිරීම සඳහා වෘත්තීය මාර්ගෝපදේශනය පිළිබඳ ස්ථාවර කමිටුවක් පවත්වාගෙන යනවා. මෙම කමිටුව විශ්වවිද්‍යාල ප්‍රතිපාදන කොමිෂන් සභාව යටතේ ඇති සියලුම විශ්වවිද්‍යාලවල වෘත්තීය මාර්ගෝපදේශන ඒකකවල අධ්‍යක්ෂවරුන් ඇතුළත් වේ.
ප්‍රධාන රැකියා වෙ‍ෙළඳපොළේ අවශ්‍යතා අනුව අවධානය යොමු කරමින් සියලුම විශ්වවිද්‍යාල වෘත්තීය මාර්ගෝපදේශන වැඩසටහන් ක්‍රියාත්මක කරනවා. උපාධි අපේක්ෂකයින් සහ කර්මාන්ත ඉල්ලීම් අතර පරතරය පියවීම සඳහා රැකියා වෙ‍ෙළඳපොළ සංවිධානය කරනු ලබන අතර නවක උපාධිධාරීන් සහ පෞද්ගලික අංශයේ ව්‍යාපාර අතර සහයෝගිතාව වර්ධනය කිරීමට ව්‍යාපාරික සම්බන්ධතා ස්ථාපිත කර තිබෙනවා. මෙම මුල් පිරීම් උපාධිධාරීන්ගේ නවෝත්පාදන දිරිමත් කරන අතර කර්මාන්ත වෘත්තිකයන් අතර සම්බන්ධ වීමට ඔවුන්ට අවස්ථා නිර්මාණය කරනවා. විශ්වවිද්‍යාල වෘත්තීය මාර්ගෝපදේශ ඒකකය හරහා සිසුන්ට නායකත්වය, මෘදු කුසලතා සහ අනෙකුත් අත්‍යවශ්‍ය නිපුණතා පිළිබඳ පුහුණුව ලැබෙනවා. මීට අමතරව කර්මාන්ත විශේෂඥයින් සහභාගී වන වැඩමුළු, සිසුන්ට සම්මුඛ පරීක්ෂණ සඳහා සූදානම් වීමට විශ්වාසය ගොඩනැඟීමට සහ සිහිකල්පනාව වැඩිදියුණු කිරීමට උපකාරී වෙනවා. තවද විශ්වවිද්‍යාල ප්‍රතිපාදන කොමිෂන් සභාව මඟින් සෑම විශ්වවිද්‍යාලයකම වෘත්තීය මාර්ගෝපදේශන ඒකක සඳහා ව්‍යූහගත රාමුවක් සහ ප්‍රතිපත්ති ස්ථාපිත කිරීම සඳහා චක්‍ර ලේඛනයක් ද නිකුත් කර තිබෙනවා. මෙම මුල් පිරීම අරමුණු කරන්නේ නවක උපාධිධාරීන්ට සහාය වීමෙන් විරැකියාව අඩු කිරීම සහ ලංකාවේ තිරසර මට්ටමකින් උපාධිධාරී රැකියා පවත්වා ගැනීමටයි.
විශ්වවිද්‍යාලවලට පමණක් මේ ප්‍රශ්නය විසඳන්න බැහැ. රැකියා උත්පාදනයත් අවශ්‍ය වෙනවා. ඒ වගේම සාමාන්‍ය අධ්‍යාපනය තුළත් වෙනස්වීම් අවශ්‍ය වෙනවා.
දැනට රජයේ පවතින පුරප්පාඩු අනුව උපාධිය සුදුසුකම් තනතුරු සඳහා උපාධිධාරීන් 35,000ක් බඳවා ගැනීමට කටයුතු කරනවා. ඒ සඳහා එක් එක් අමාත්‍යාංශය සඳහා වෙන් වූ ප්‍රතිපාදනයන්ට අමතරව රුපියල් මිලියන 10,000ක අතිරේක ප්‍රතිපාදන ද වෙන් කර තිබෙනවා. මේ බඳවා ගැනීම් අතරින් වැඩි පිරිසක් ගුරු වෘත්තිය සඳහා බඳවා ගැනීමට නියමිත අතර දැනට ශ්‍රේෂ්ඨාධිකරණයේ පවතින නඩුව අවසන් වූ පසුව එහි තීරණය ප්‍රකාරව ඉදිරි කටයුතු සිදු කරනවා. ඉතිරි අනෙකුත් ඒ ඒ තනතුරු සඳහා බඳවා ගැනීම් පටිපාටිය ප්‍රකාරව කුසලතා පදනම් මත හෝ විවෘත තරග විභාගවලින් බඳවා ගැනීමේ කටයුතු සිදු කරනවා.
ජාතික ක්‍රීඩා පනත සංශෝධනය කඩිනමින්
ඇමැති සුනිල් කුමාර ගමගේ
ක්‍රීඩා 73ක් ඉලක්ක කර ගත් ජාතික ක්‍රීඩා පනත සංශෝධනයේ වැඩ කටයුතු බොහෝ ප්‍රමාණයක් මේ වන විට අවසන් කර ඇතැයි තරුණ කටයුතු සහ ක්‍රීඩා ඇමැති සුනිල් කුමාර ගමගේ මහතා පාර්ලිමේන්තුවේ දී ඊයේ (18) පැවසීය.
පුද්ගලයෙක් හෝ කණ්ඩායමක් ඉලක්ක කර පනතක් නිර්මාණය කළ නොහැකි බවත් සමස්ත ක්‍රීඩාවන්ම නියෝජනය කරමින් මෙම පනත ගෙන එන බවත් ඇමැතිවරයා පැවසුවේය.
අය වැය තෙවැනි වර කියවීමේ විවාදයට එක්වෙමින් ඇමැතිවරයා මේ බව කියා සිටියේය. ඇමැතිවරයා මෙසේද පැවසුවේය. පොහොසත් රටක් ලස්සන ජීවිතයක් යන කාරණාවේදී ක්‍රීඩාව සහ තාරුණ්‍ය ඉතාම වැදගත්. ඒ තුළින් ජව සම්පන්න තරුණයෙක් ගොඩනැඟීමට කටයුතු කරනවා. දශක ගණනාවක් පැරදුණු ජනතාව ජයග්‍රාහී කිරීමට අපට පැවරී තිබෙනවා. දියුණු සංස්කෘතියක් සහිත නිවුණු චින්තනයකින් හෙබි තෘප්තිමත් තාරුණ්‍යයක් නිර්මාණය කිරීමත් අපේ අමාත්‍යාංශයේ වගකීමක්. මේ අරමුණ ඉටු කර ගැනීමට පුනරාවර්තන වියදම් සඳහා රුපියල් මිලියන 7100ක් ප්‍රාග්ධන වියදම් සඳහා රුපියල් මිලියන 5500ක් අය වැයෙන් වෙන් කර තිබෙනවා. මිලියන 8486කුත් තරුණ කටයුතු වෙනුවෙන් මිලියන 4114කුත් අය වැයෙන් වෙන් කර තිබෙනවා. පසුගිය වසරවල අය වැයෙන් වෙන් කළ මුදල් සම්පූර්ණයෙන් වියදම් කර නැහැ. පසුගිය අය වැයවල තිබූ කතා කතාම පමණයි. අයවැයේ වෙන් කරන මුදල යථාර්ථයක් බවට පත්කිරීමට අපි කටයුතු කරනවා. ජාතික ක්‍රීඩා පනත වෙනස් කරනවා. එම කාර්ය බොහෝ දුරට අවසන්.
අපනයන ප්‍රමුඛ නිෂ්පාදන ආර්ථිකයක් බිහි කර ගැනීමට ඉදිරිපත් කළ අය වැයක්
නියෝජ්‍ය ඇමැති චතුරංග අබේසිංහ
අපනයන ප්‍රමුඛ නිෂ්පාදන ආර්ථිකයක් බිහි කර ගැනීමට නිර්මාණය කළ පළමු අය වැය මෙම අය වැය බව කර්මාන්ත සහ ව්‍යවසායකත්ව සංවර්ධන නියෝජ්‍ය ඇමැති චතුරංග අබේසිංහ මහතා පාර්ලිමේන්තුවේදී ඊයේ (18) පැවසීය. කර්මාන්ත හා ව්‍යවසායකත්ව සංවර්ධන අමාත්‍යාංශයට රුපියල් බිලියන 13ක මුදලක් වෙන් කළත්, නිෂ්පාදන ආර්ථිකයක් බිහි කරගැනීම සඳහා සමස්ත අමාත්‍යාංශ සඳහා මේ අය වැයෙන් රුපියල් බිලියන 100ක් පමණ සමස්තයක් ලෙස වෙන් කර ඇතැයි ද නියෝජ්‍ය ඇමැතිවරයා පැවසුවේය. අය වැය තෙවැනි වර කියවීමේ විවාදයට එක්වෙමින් නියෝජ්‍ය ඇමැතිවරයා මේ බව කියා සිටියේය.
නියෝජ්‍ය ඇමැතිවරයා මෙසේද පැවසුවේය.
තාක්ෂණික කාරණා සම්බන්ධයෙන් දෛනිකව ව්‍යවසායකයන් සමඟ කතාබහ කරනවා. කොපමණ තාක්ෂණික කාරණා කතා කළත් කර්මාන්ත හා ව්‍යවසායකත්ව දත්තවලින් තමයි බලන්න වෙන්නේ. 2017 වන විටත් අපනයනය බිලියන 17යි. ලෝකයේ තිබෙන අර්බුද හැම කාලයකම එනවා. න්‍යායාත්මක දැනුම හා භූමියේ භාවිතය ගැන ගැටලු තිබෙනවා. රටක් ව්‍යවසායකත්ව විදියට ලෝක වෙළෙඳපොළෙන් උකහා ගන්නේ කෙසේද කියලා විමසිය යුතුයි. ලෝකයේ අගයදාමයන් තුළට එකතු වන්නේ කෙසේද යන්න ගැන අපි විමසා බලන්න ඕන. ඒ තුළ තමයි නිෂ්පාදන ආර්ථිකය ගැන කතා කරන්න වෙන්නේ. පසුගිය මාස 4 තුළ සැලසුම් සකස් කර ගැනීමට සහාය දුන් අමාත්‍යාංශයේ ලේකම්වරිය ඇතුළු කාර්ය මණ්ඩලයටත්, අපේ පෞද්ගලික කාර්ය මණ්ඩලයටත් ස්තූතිවන්ත වෙනවා. ඉඩම් ගැටලු විසඳීමට, ප්‍රාග්ධන ගැටලු, වෙළෙඳපොළ ලබාගැනීමට පැවැති ගැටලු, අවශ්‍ය තාක්ෂණ හා දත්ත, සහතිකකරණය යනාදිය සම්බන්ධයෙන් පවතින ගැටලු විසඳීමට අපි අවධානය යොමු කර තිබෙනවා. රුපියල් බිලියන 16ක් ඒ සඳහා වෙන් කර තිබෙනවා. වැවිලි, කෘෂි, ධීවර යනාදි අමාත්‍යාංශ, රාජ්‍ය නොවන සංවිධාන, බැංකු, විශ්වවිද්‍යාල සමඟ එක්ව ව්‍යවසායකත්වය නැංවීමට පොදු රාමුවක් සකස් කරනවා. වාහන එකලස් කිරීමේ කර්මාන්තය මුහුණ දී ඇති ගැටලුව නිරාකරණයට අපි කටයුතු කර තිබෙනවා. මැණික් හා ස්වර්ණාභරණ කර්මාන්තය බිඳ වැටී තිබෙනවා. ඊට අදාළ ගැටලු විසඳීමට අපි පියවර ගන්නවා. අපනයන නිෂ්පාදනවල යෙදවුම් සඳහා ටැරිෆ් පොලිසි එකක් එනවා. ඉදි කිරීමේ කර්මාන්තය ඉදිරියට ගොස් තිබෙනවා. දේශීයව නිෂ්පාදනය කරන භාණ්ඩවලට රජයේ මිලදී ගැනීම් කළ යුතුයි කියලා තිබුණාට පසුගිය කාලයේ ඒවා ක්‍රියාත්මක වුණේ නැහැ. ජාතික උපදේශන කමිටුවක් පත් කර තිබෙනවා. පරාටේ නීතිය හරහා අර්බුදයට ලක් වූ දේශීය සුළු හා මධ්‍ය පරිමාණ නිෂ්පාදකයන්ට තවත් සහන ක්‍රියාවලියක් ඉදිරි සති දෙක තුළ ඉදිරිපත් කරනවා. දැනට ගැටලුවට ලක්ව සිටින 20,000ක් පමණ සුළු හා මධ්‍ය පරිමාණ ව්‍යාපාරිකයන් එකිනෙකා ගෙන බැංකු සමඟ සාකච්ඡා කර ඔවුන්ට සහාය වීමට පියවර ගන්නවා.
අමෙරිකා විබව තීරු බදු කාරණයෙන් විය හැකි බලපෑම් අධ්‍යයනය කරනවා
ඇමැති ආචාර්ය අනිල් ජයන්ත
අමෙරිකා එක්සත් ජනපදය විසින් ඉදිරිපත් කරන ලද සාධාරණ වෙළෙඳාම පිළිබඳ මතු කරගත් විබව තීරු බදු කාරණය තුළින් ශ්‍රී ලංකාවේ අපනයන ක්ෂේත්‍රයට ඇති විය හැකි බලපෑම් පිළිබඳ අධ්‍යනය කරමින් සිටින බව කම්කරු ඇමැති සහ ආර්ථික සංවර්ධන නියෝජ්‍ය ඇමැති ආචාර්ය අනිල් ජයන්ත මහතා පාර්ලිමේන්තුවේදී ඊයේ (18) ප්‍රකාශ කළේය.
2025 අප්‍රේල් මාසයේදී මේ සම්බන්ධයෙන් ප්‍රකාශ කරන බවට වාර්තාවන බවත් ඇමැතිවරයා පැවසීය.
නියෝජ්‍ය ඇමැති අනිල් ජයන්ත මහතා මේ බව සඳහන් කළේ පාර්ලිමේන්තු මන්ත්‍රී රවී කරුණානායක මහතා ස්ථාවර නියෝග 27/2 යටතේ මතු කරන ලද කරුණකට පිළිතුරු දෙමිනි.
එහිදී වැඩිදුරටත් අදහස් දැක්වූ ඇමැතිවරයා මෙසේද පැවසීය.
කම්කරු ඇමැති සහ ආර්ථික සංවර්ධන නියෝජ්‍ය ඇමැති ආචාර්ය අනිල් ජයන්ත –
මෙම ප්‍රශ්නවලට පාදක වන අමෙරිකා එක්සත් ජනපදය විසින් ඉදිරිපත් කරන ලද සාධාරණ වෙළෙඳාම පිළිබඳ මතු කරගත්ත මේ විබව තීරු බදු කාරණය ගැට ගැසී තිබෙනවා. එහිදී ඒ ප්‍රතිපත්තිය ඉදිරිපත් කරන්න නියමිත වෙන්නේ අප්‍රේල් මාසයේදී කියලා වාර්තා වෙනවා. කෙසේ වෙතත් අපි දැනට පැන නැඟී තිබෙන තත්ත්වයට අදාළ කරුණුත්, භූ දේශපාලන කරුණු සහ අනෙකුත් කාරණා පිළිබඳ විශේෂ සැලකිල්ලක් දක්වමින් ශ්‍රී ලංකාවේ අපනයන ක්ෂේත්‍රයට ඇති විය හැකි බලපෑම් පිළිබඳ අධ්‍යයනය කරමින් සිටිනවා.
2025 අප්‍රේල් මාසයේදී තමයි මේ පිළිබඳ ප්‍රකාශ කරන බව මාධ්‍ය මඟින් දැනගන්න තිබෙන්නේ. විබව තීරු බදු සහ සාධාරණ වෙළෙඳාම පිළිබඳ ප්‍රතිපත්තියේදී සැලකිල්ලට ගැනීමට ඉඩකඩ තිබෙන කරුණු වන්නේ ඒ ඒ රටවල් අතර තිබෙන වෙළෙඳ පරතරය, විනිමය අනුපාතය ප්‍රබලතාවය හා දුබලතාවය, තීරු බදු අනුපාත සහ වැට් ඇතුළු වෙනත් බදු සැලකිල්ලට ගන්න ඉඩ තිබෙනවා. ශ්‍රී ලංකාව පිළිබඳ සැලකීමේදී අමෙරිකාව සමඟ තිබෙන වෙළෙඳ පරතරය අපිට වාසිදායක තත්ත්වයක් තියෙන බව සැබෑව. කෙසේ නමුත් අපි ඩොලරයට සාපේක්ෂව දුර්වල මට්ටමක තිබෙන්නේ , ස්ට්‍රෝන්ග් කරන්සි එකක් නොවන නිසා එතනින් ඇති වෙන බලපෑමත් අපිට අඩු බලපෑමක් තිබෙන්නේ. අනිත් පැත්තෙන් රාජ්‍ය තාන්ත්‍රිකව අපි ඉතාමත් හොඳ සම්බන්ධතා පවත්වාගෙන යනවා. ඒ නිසා ඒ තත්ත්වයෙන් ඇතිවිය හැකි නෙගටිව් බලපෑම් අඩුයි. කෙසේ වෙතත් සාධාරණ වෙළෙඳාම හා විබව තීරු බදු සම්බන්ධ කරුණු අපි අධ්‍යනය කරමින් ඉන්නවා. එහිදී මුදල් අමාත්‍යාංශය, වෙළෙඳ අමාත්‍යාංශය වගේ අපනයන සංවර්ධන මණ්ඩලය ඇතුළු රාජ්‍ය ආයතන සහ ඒ කණ්ඩායම් අධ්‍යන කටයුතු කරලා තියෙනවා.
අමෙරිකාවත් සමඟ සිදු කරන විදේශ වෙ‍ෙළඳාමේදී වැඩිම බලපෑමට ලක්විය හැකි ක්ෂේත්‍ර විදියට හඳුනාගෙන තිබෙන්නේ ඇඟලුම් සහ රෙදිපිළි, රබර් සහ රබර් ආශ්‍රිත නිෂ්පාදන, පොල් සහ පොල් ආශ්‍රිත නිෂ්පාදන, ප්ලාස්ටික් නිෂ්පාදන. ඒවගේ සමස්තයක් ලෙස ගත්තම අපේ අපනයන ආදායමෙන් සියයට අසූ හයක් පමණ සම්බන්ධ වෙනවා. මේකට ගන්න ක්‍රියාමාර්ග සහා ඒ උපක්‍රමවලට අමතරව අමෙරිකාවේ පිහිටි ශ්‍රී ලංකා තානාපති කාර්යාලය හරහා තානාපතිතුමා දැනටමත් මූලික සාකච්ඡා සහ අවබෝධතාවයන් හදමින් තිබෙනවා.
අමෙරිකාවත් සමඟ අවුරුදු 10-15ක විශේෂ තීරුබදු ගිවිසුමකට යායුතුයි
මන්ත්‍රී රවී කරුණානායක
අද සී.එන්.එන්. එකේ දාලා තිබුණා ඔවුන් කාන්තා ඇඳුම් සියල්ල නැවත අමෙරිකාවට ගෙනියන්න හදනවා කියලා. අප්‍රේල් මාසයේ අපනයනය ගත්තොත් ලංකාවෙන් අමෙරිකාවට සියයට දහඅටයි දශම එකකින් ගිය අවුරුද්දට වඩා වැඩිවෙලා තිබෙනවා. ඔබතුමා කිව්වා අප්‍රේල් මාසයේ සිට වැඩි කරන්න යනවා කියලා. සමස්තයක් ලෙස ලෝකයටම වැඩි වුණොත් ප්‍රශ්නයක් නෑ. නමුත් ලංකාව වශයෙන් හරි වැඩි කළොත් ඒක තමයි බලපාන්නේ. රට මේ බංකොලොත් භාවයෙන් එළියට එන අවස්ථාවේදී අපිට බැරිද අමෙරිකාවත් සමඟ කතා කරලා අපිට අවුරුදු 10-15ක විශේෂ තීරුබදු ගිවිසුමක් ලබා ගන්න. බංග්ලාදේශය ඒක සාර්ථක කරගෙන තියෙනවා. මොකද ලක්ෂ දොළහහමාරක ඍජු රැකී රක්ෂා ප්‍රමාණයක් මේ ඇඟලුම් කර්මාන්තයෙන් යොමු වෙලා තියෙනවා.
තහනම් උත්තේජක භාවිතය පිළිබඳ ඉදිරියේදී දැඩිව කටයුතු කරනවා
නියෝජ්‍ය ඇමැති හිටපු ඔලිම්පික් ක්‍රීඩක සුගත් තිලකරත්න
ක්‍රීඩකයින්ගේ අසාමාන්‍ය දක්ෂතා හේතුවෙන් තහනම් උත්තේජක භාවිතය පිළිබඳ ඉදිරියේදී දැඩිව කටයුතු කිරීමට සිදුවෙන බව ක්‍රීඩා නියෝජ්‍ය ඇමැති හිටපු ඔලිම්පික් ක්‍රීඩක සුගත් තිලකරත්න මහතා පැවසීය.
(18) පාර්ලිමේන්තුවේදී අය වැය විවාදයට එක්වෙමින් ඔහු වැඩිදුරටත් සඳහන් කළේ,
Òඅපේ ක්‍රීඩක ක්‍රීඩිකාවෝ ගොඩක් වෙලාවට පුරුදුවෙලා තියෙනවා තහනම් උත්තේජක භාවිතයෙන් ක්‍රීඩාවේ ජයග්‍රහණ කරා යන්න. තහනම් උත්තේජක මර්දන ආයතනය මඟින් අපි මේ ගැන විශේෂයෙන් කටයුතු කරනවා. විශේෂයෙන් පාසල් ක්‍රීඩා මට්ටම තුළත් තහනම් උත්තේජක භාවිතය සීඝ්‍ර ලෙස වර්ධනය වෙලා තියෙනවා. ඒ නිසා ඉදිරියේදී මේ සඳහාත් මැදිහත්ව කටයුතු කරනවා. තහනම් උත්තේජක මර්දන ඒකකය හරහා ක්‍රීඩකයින් අනිවාර්යයෙන්ම පරීක්ෂණ සඳහා යොමු කරනවා. මුත්‍රා සාම්පල විතරක් නෙමෙයි දැන් රුධිරය තුළිනුත් මේ පරීක්ෂණ කරන්න පුළුවන්. අපි මෙම පරීක්ෂණ සඳහා වැඩි අවධානයක් නොඳුන්නොත් ඉදිරියේදී අපේ රටේ ක්‍රීඩා අභිමානය අහිමි වෙයි. ක්‍රීඩකයින්ගේ අනාගතයත් නැති වෙයි. ක්‍රීඩකයින්ගේ අසාමාන්‍ය දක්ෂතා හේතුවෙන් තහනම් උත්තේජක භාවිතය ගැන දැඩි තීරණය ගන්න වෙලා තිබෙනවා. අපේ පුහුණුකරුවන්ගේ දැනුමත් මදි. ඒ නිසා විදේශ පුහුණුකරුවන්ගේ දැනුම අපේ පුහුණුකරුවන්ට ලබාදෙන්න අපි කටයුතු කරනවා.
පාසල් මට්ටමේදී ක්‍රීඩක ක්‍රීඩිකාවන්ගේ දක්ෂතා ඉතා ඉහළ මට්ටමක පැවතියත් ඔවුන් ජාතික මට්ටමට එද්දී ඔවුන්ගේ ක්‍රීඩා දක්ෂතා නැතිවෙලා යනවා. ඒකට හේතුව පුහුණුවීම්වල තිබෙන දුර්වලතා. ඔලිම්පික්ලාභියෙක් පාර්ලිමේන්තුව අමතන ප්‍රථම අවස්ථාව මෙයයි. ඇත්තටම එය මගේ ජීවිතයේ ලද භාග්‍යයක්. මම පැමිණියේද දුෂ්කර ගමනක්. නුවරඑළිය විදුලිපුර විද්‍යාලයෙන් අධ්‍යාපනය ලැබූ මගේ ක්‍රීඩා මාවත දුෂ්කර ගමනක්. ඒ වගේම අපේ රටේ ක්‍රීඩකයින් 107 දෙනකු පමණයි ඔලිම්පික් නියෝජනය කර තිබෙන්නේ. සියලු සංගම් සමඟ අපි සාකච්ඡා කරනවා.
ක්‍රීඩා සංගම් හා ආණ්ඩුව ගැටුණොත් එයින් තැළෙන්නේ ක්‍රීඩකයින්
මන්ත්‍රී නාමල් රාජපක්ෂ
ක්‍රීඩා සංගම් හා ආණ්ඩුව ගැටුනහොත් එයින් තැළෙන්නේ ක්‍රීඩකයින් බව පොදු ජන පෙරමුණේ පාර්ලිමේන්තු මන්ත්‍රී නාමල් රාජපක්ෂ මහතා පාර්ලිමේන්තුවේදී ඊයේ (18) ප්‍රකාශ කළේය.
එමෙන්ම ශ්‍රී ලංකා ක්‍රිකට් ආයතනය හා රජය ගැටුනොත් පීඩාවට පත්වන්නේ මෙරට ක්‍රීඩකයින් මිස විනාශ වන්නේ රටේ ක්‍රීඩාවන් බවද සිහිපත් කළ නාමල් රාජපක්ෂ මහතා එයින් දේශපාලනඥයින්ට කිසිදු බලපෑමක් සිදු නොවන බව ද පැවසීය.
නාමල් රාජපක්ෂ මහතා මේ බව සඳහන් කළේ අය වැය කාරක සභා අවස්ථාවේ විවාදයට එක් වෙමිනි.
ශ්‍රී ලංකා පොදු ජන පෙරමුණේ පාර්ලිමේන්තු මන්ත්‍රී නාමල් රාජපක්ෂ
හුදෙක් ක්‍රීඩා භාණ්ඩ බෙදීම, අපි සාම්ප්‍රදායිකව විශ්වාස කරන ක්‍රීඩාවට පමණක් ලඝු කරන්න එපා කියලා මම ඉල්ලනවා. 2026 ලෝක කුසලානය ලංකාවේ සෙල්ලම් කරනවා. 05 වැනි ක්‍රීඩා පිට්ටනිය ලංකාවේ තිබුණා නම් බී.සී.සී.අයි. එක නැතිව තනිවම ලෝක කුසලානයක් අපේ රටේ පවත්වන්න පුළුවන් හැකියාව අපිට තියෙනවා. ඒත් අවාසනාවකට පිට්ටනි 04යි තියෙන්නේ. ඒ වගේම ලෝකය ස්පෝට්ස් ඉන්ඩස්ට්‍රියක් බවට පත්වෙමින් පවතිනවා. කර්මාන්ත අමාත්‍යාංශයටත් වැදගත්.
ඒ වගේම තමයි මේ ක්‍රීඩා පනත. 1973 හදපු ක්‍රීඩා පනතක් තියෙන්නේ. විවෘත ආර්ථිකයටත් කලින්. ඒක ඇතුළේ ක්‍රීඩාව තිබෙන්නේ යැපෙන්නන්ගේ සංගමයක් විදියට. ආණ්ඩුවෙන් යැපෙන්න ඕනි. ලෝකයේ ක්‍රීඩා ආර්ථිකය ඩොලර් ට්‍රිලියන 2.3ක් තියෙනවා. රටේ සල්ලි උත්පාදනය කළහැකි ක්‍රීඩා සංගම් කිහිපයක් තිබෙනවා. ඔවුන්ද සම්බන්ධ කරගත යුතුයි. දැන් තිබෙන්නේ විවෘත ආර්ථිකයටත් පෙර හදපු ක්‍රීඩා පනතක්.
