පාර්ලිමේන්තු මන්ත්‍රී ඉම්තියාස් බාකීර් මාකාර් මහතා සමගි ජන බලවේගයේ සභාපති ධුරයෙන්, කෘත්‍යාධිකාරි මණ්ඩලයෙන් සහ අනෙකුත් සියලු තනතුරුවලින් ඊයේ (18) ඉල්ලා අස් විය.
සමගි ජන බලවේගයේ නායක, සජිත් ප්‍රේමදාස මහතාට ලිපියක් යොමු කරමින් ඒ මහතා සිය ඉල්ලා අස් වීම සම්බන්ධයෙන් දැනුම්දී ඇති අතර පක්ෂයේ මහලේකම් රංජිත් මද්දුම බණ්ඩාර, ජාතික සංවිධායක තිස්ස අත්තනායක, භාණ්ඩාගාරික හර්ෂ ද සිල්වා මහත්වරුන්ට එම ලිපියේ පිටපත් යොමු කර තිබේ.
මේ සම්බන්ධයෙන් ‘දිනමිණ’ කළ විමසුමකට පිළිතුරු දෙමින් ඉම්තියාස් බාකීර් මාකාර් මහතා පැවසුවේ තමන් පක්ෂ සාමාජිකත්වයෙන් හැර අනෙකුත් සියලු තනතුරුවලින් ඉවත් වූ බවයි.
සමගි ජන බලවේගයේ සභාපති ධුරයට පත් කිරීම සම්බන්ධයෙන් විපක්ෂ නායක සජිත් ප්‍රේමදාස මහතාට ස්තූතිය පළ කරන බවත් පක්ෂය නිර්මාණය කිරීමේ ප්‍රයත්නයේ සිට පක්ෂයේ කටයුතු කරගෙන යෑමේදී පක්ෂ නායකත්වයේ සිට අවසන් සාමාජිකයා දක්වා තමා කෙරෙහි තැබූ විශ්වාසය සම්බන්ධයෙන් කෘතඥතාව පිරිනමන බවත් ඉම්තියාස් බාකීර් මාකාර් මහතා විපක්ෂ නායකවරයාට යැවූ ලිපියේ සඳහන් කර ඇත.
අද දින පටන් තමා පක්ෂයේ සභාපති හා අනෙකුත් සියලු වගකීම්වලින් නිදහස් වීමට තීරණය කළ බවත් සියලු ශ්‍රී ලාංකිකයන්ගේ සහ පාක්ෂිකයන්ගේ අභිලාෂයන් පණ ගන්වමින් පක්ෂයේ ඉදිරි කටයුතු සර්වප්‍රකාරයෙන්ම සාර්ථක වන්නට ප්‍රාර්ථනා කරන බවත් මාකාර් මහතා සිය ලිපියේ දක්වා ඇත.
