සත්ත්ව පෝෂණය වැඩිදියුණු කිරීමේ අරමුණින් මහවැලි කලාපවල අක්කර 2,802ක තෘණ වගා කිරීමේ ව්‍යාපෘතියකට මහවැලි අධිකාරිය රුපියල් 6,571,882ක මුදලක් වැය කර ඇතත් කිසිදු ඉඩමක තෘණ වගා කර නැතැයි ජාතික විගණන කාර්යාලය නිකුත් කළ වාර්තාවක සඳහන් වේ.
ශ්‍රී ලංකා මහවැලි සංවර්ධන අධිකාරිය මඟින් කිරිගව පාලනයේ නියුතු ගොවීන්ට මහවැලි බී, සී, ඩී, එල් සහ උඩවලව කලාපවල අක්කර 2,802ක තෘණ වගා කිරීමේ මෙම ව්‍යාපෘතිය ඇරඹීමට සැලසුම් කර ඇත්තේ සත්ත්ව පෝෂණය වැඩිදියුණු කිරීමේ අරමුණිනි. මෙම වැඩසටහන 2020 දෙසැම්බර් 31 වැනි දින වනවිට නිම කිරීමට ද සැලසුම් කර තිබී ඇත. ඒ සඳහා පාරිසරික පරීක්ෂණ, පුරාවිද්‍යා ඇගැයීම් පරීක්ෂණ හා මැනුම් කටයුතු සඳහා රුපියල් 6,571,882ක මුදලක් ද වැය කර ඇතත් විගණිත දින වූ 2024 මැයි 10 වැනිදා වනවිටත් කිසිදු ඉඩමක් තෘණ වගාකරුවන් වෙත බෙදා දී නොතිබුණු බව එම වාර්තාවෙන් පෙන්වා දී තිබේ.
මේ සම්බන්ධයෙන් විගණනයට අදහස් දැක්වූ කළමනාකාරීත්වය පෙන්වා දී ඇත්තේ මහවැලි එල් කලාපයේ යෝජිත තෘණ භූමි සංවර්ධනය සඳහා මූලික පාරිසරක පරීක්ෂණය වෙනුවෙන් ශ්‍රී ලංකා රජරට විශ්වවිද්‍යාලයට රුපියල් 1,551,958ක මුදලක් ද, පුරාවිද්‍යා ඇගැයීම් පරීක්ෂණයට පුරාවිද්‍යා දෙපාර්තමේන්තුවට රුපියල් 140,099ක මුදලක් ද, තෘණ වගා භූමිය මැනුම් කටයුතු වෙනුවෙන් ශ්‍රී ලංකා මිනින්දෝරු දෙපාර්තමේන්තුවට රුපියල් 4,879,825 මුදලක් ද වශයෙන් රුපියල් 6,571,882ක මුදලක් වැය කර ඇති බවයි.
තෘණ භූමිවල තෘණ වගා කිරීම සඳහා ඉඩම් කච්චේරියක් පවත්වා සුදුසුකම්ලත් කිරි ගොවීන් පවා තෝරාගෙන තිබුණු අවස්ථාවක ජනාධිපති ලේකම්වරයා විසින් නිකුත් කළ 2022.11.11 වැනි දිනැති ලිපිය මඟින් මහවැලි අධිකාරිය වෙතින් නව ඉඩම් බැහැර කිරීම් අත්හිටුවන ලෙස නියෝග කර තිබේ. මේ නිසා යෝජිත සංවර්ධන කාර්යය සැලසුම් කළ ආකාරයෙන් ආරම්භ කිරීමට නොහැකි වූ බව ද කළමනාකාරීත්වය වැඩිදුරටත් සඳහන් කර තිබේ.
