රජය මඟින් දුන් පොහොර සහනාධාර මුදල් ඇතැම් ගොවීන්ට ලැබී නොමැති බවත් එම මුදල් සොරාගෙන ඇති බවට මේ වන විට අනාවරණය වී ඇති බවත් කෘෂිකර්ම නියෝජ්‍ය අමාත්‍ය නාමල් කරුණාරත්න මහතා පාර්ලිමේන්තුවේදී ඊයේ (18) ප්‍රකාශ කළේය. ඒ අනුව අනුරාධපුර දිස්ත්‍රික්කයේ පමණක් ගොවීන් 155 දෙනකුට ලබාදුන් පොහොර සහනාධාර මුදල් රුපියල් 2,934,310ක් සොරගෙන ඇති බවට අනාවරණය වී ඇති බව ද නියෝජ්‍ය ඇමැතිවරයා පැවසීය.
ජාතික ජන බලවේගයේ පාර්ලිමේන්තු මන්ත්‍රී සුසන්ත කුමාර නවරත්න මහතා යොමු කළ ප්‍රශ්නයකට පිළිතුරු දෙමින් කෘෂිකර්ම නියෝජ්‍ය අමාත්‍යවරයා මේ බව අනාවරණය කළේය. මෙම සිද්ධිය සම්බන්ධයෙන් එක් නිලධාරිනියක මේ වන විට අත්අඩංගුවට ගෙන ඇති බව ද නියෝජ්‍ය අමාත්‍යවරයා සඳහන් කළේය. මෙම සිද්ධිය සම්බන්ධයෙන් විමර්ශන දිගින් දිගටම සිදු කරන අතර මීට සම්බන්ධ සියලු දෙනාට නීතිය ක්‍රියාත්මක කරන බව ද නියෝජ්‍ය ඇමැතිවරයා වැඩිදුරටත් පැවසීය.
