අප්‍රේල් මස පළමු වැනිදා සිට ක්‍රියාත්මක වන පරිදි ආනයනික කිරිපිටි ග්‍රෑම් 400 පැකට්ටුවක මිල රුපියල් 50කින් සහ කිලෝග්‍රෑම් 1ක පැකට්ටුවක මිල රුපියල් 125කින් ඉහළ නැංවීමට කිරිපිටි ආනයනකරුවන්ගේ සංසදය තීරණය කර තිබේ.
ඒ අනුව දැනට වෙළෙඳපොළේ රුපියල් 1050කට අලෙවි වන ග්‍රෑම් 400 කිරිපිටි පැකට්ටුවක් අප්‍රේල් 1 වැනිදා සිට රුපියල් 1100ක් දක්වා වැඩි කෙරේ. වෙළෙඳපොළේ රුපියල් 2625ක් වන කිලෝ එකක කිරිපිටි පැකට්ටුවක මිල 2750ක් ලෙස ඉහළ යනු ඇත. මේ අනුව ආනයනික කිරිපිටි මිල සියයට 4.7කින් ඉහළ යන අතර කිරිපිටි ආනයනකරුවන්ගේ සංසදයේ ප්‍රකාශකයෙක් පැවසුවේ ලෝක වෙළෙඳපොළේ කිරිපිටි මිල වසරක පමණ කාලයක සිට ඉතා ශීඝ්‍රයෙන් වැඩි වෙමින් පැවති බවයි.
නමුත් වසරක කාලයක් මිල වැඩි නොකර පාරිභෝගිකයන්ට සහනයක් දීමට කටයුතු කළ බව කී එම ප්‍රකාශකයා, තවදුරටත් කිරිපිටි මිල වැඩි වීම දරාගත නොහැකි බැවින් ලෝක වෙළෙඳපොළේ මිල ඉහළ යෑමට සාපේක්ෂව ඉතා සුළු මුදලකින් කිරිපිටි මිල ඉහළ දැමීමට තීරණය කළ බව ද කීවේය.
