ඉන්දියාවේ අදානි සමාගම මන්නාරම වෙඩි තලතිව් ප්‍රදේශයේ සුළං විදුලි බලාගාර ව්‍යාපෘතියක් ඉදි කිරීමට එරෙහිව ගොනුකර තිබූ මූලික අයිතිවාසිකම් පෙත්සම් පහක් ඊයේ (18) ශ්‍රේෂ්ඨාධිකරණයේදී පෙත්සම්කරුවන් ඉල්ලා අස්කර ගන්නා ලදී.
අදාළ ව්‍යාපෘතිය ඉවත් කරගන්නා බවට අදානි සමාගම ශ්‍රී ලංකා ආයෝජන මණ්ඩලයේ සභාපතිවරයා වෙත ලිඛිතව දැනුම් දී ඇති බවට නීතිපතිවරයා මෝසමක් මඟින් අධිකරණයට දැනුම් දීමෙන් අනතුරුව මෙම පෙත්සම් ඉල්ලා අස්කර ගැනීමට තීරණය කෙරිණ.
එස්. තුරෙයි රාජා, ශිරාන් ගුණරත්න, අචල වෙංගප්පුලි සහ මහින්ද සමයවර්ධන යන මහත්වරුන්ගෙන් සමන්විත සිවු පුද්ගල ශ්‍රේෂ්ඨාධිකරණ විනිසුරු මඬුල්ලක් හමුවේ මෙම පෙත්සම කැඳවන ලදී.
එහිදී පෙත්සම්කාර ‘ශ්‍රී ලංකා වන ජීවී හා ස්වභාවික සම්පත් ආරක්ෂණ සංගමය’ වෙනුවෙන් පෙනී සිටි ජනාධිපති නීතිඥ සංජීව ජයවර්ධන මහතා සඳහන් කර සිටියේ ඉන්දියාවේ අදානි සමාගම මන්නාරම ප්‍රදේශයේ ඉදිකිරීමට යෝජිතව තිබූ සුළං බලාගාර ව්‍යාපෘතියට අදාළව නීතිපතිවරයා විසින් ඉකුත් පෙබරවාරි මස 21වැනිදා මෝසමක් ඉදිරිපත් කර ඇති බවය.
අදාළ ව්‍යාපෘතිය ඉවත් කරගන්නා බවට දැනුම් දෙමින් ඉන්දියාවේ ‘අදානි ග්‍රීන් එනර්ජි ලිමිටඩ්’ ආයතනය ශ්‍රී ලංකා ආයෝජන මණ්ඩලයේ සභාපති අර්ජුන හේරත් මහතා වෙත ඉකුත් පෙබරිවාරි මස 12 වැනිදා ලිපියක් යොමු කර ඇති බව එම මෝසමෙහි සඳහන් වන අතර අදාළ ලිපිය මෝසම සමඟ අධිකරණයට ඉදිරිපත් කර ඇති බව ජනාධිපති නීතිඥවරයා සඳහන් කළේය.
යෝජිතව තිබූ එම සුළං බලාගාර ව්‍යාපෘතිය ඉදිකිරීමට එරෙහිව මෙම පෙත්සම් ගොනු කර තිබූ අතර අදාළ මෝසමෙහි සඳහන් කරුණු අනුව එම ව්‍යාපෘතිය තවදුරටත් ක්‍රියාත්මක නොවන හෙයින් මෙම පෙත්සම් තවදුරටත් පවත්වා ගෙන යෑමේ අවශ්‍යතාවයක් නොමැති බවට පෙත්සම්කරුවන් විසින් තීරණය කර ඇති බවද ජනාධිපති නීතිඥවරයා සඳහන් කළේය.
අනුව අදාළ පෙත්සම් ඉවත් කර ගැනීමට අපේක්ෂා කරන බැවින් ඒ සඳහා අවසර ලබාදෙන ලෙස ඔහු අධිකරණයෙන් ඉල්ලා සිටියේය .
එහිදී සෙසු පෙත්සම්කරුවන් වෙනුවෙන් පෙනී සිටි නීතිඥවරුන්ද දැනුම් දුන්නේ නීතිපතිවරයා විසින් ඉදිරිපත් කර ඇති මෝසම සැලකිල්ලට ගෙන මෙම පෙත්සම් ඉවත් කර ගන්නා බව ය.
වගඋත්තරකාර අදානි සමාගම වෙනුවෙන් පෙනී සිටි ජනාධිපති නීතිඥ රොමේෂ් ද සිල්වා මහතා සඳහන් කළේ ඒ සම්බන්ධයෙන් තමාගේ විරුද්ධත්වයක් නොමැති බවය.
සෙසු වගඋත්තරකරුවන් වෙනුවෙන් පෙනී සිටි නීතිඥවරු ද මෙම පෙත්සම් අස්කර ගැනීම සම්බන්ධයෙන් තමන්ගේ විරෝධයක් නොමැති බවට සඳහන් කළ හ.
නීතිපතිවරයා වෙනුවෙන් පෙනී සිටි අතිරේක සොලිසිටර් ජනරාල් ආචාර්ය අවන්ති පෙරේරා මහත්මිය සඳහන් කළේ ට ඉදිරිපත් වී ඇති කරුණු අනුව මෙම ව්‍යාපෘතිය ඉන්දියාවේ අදානි සමාගම සමඟ තවදුරටත් ක්‍රියාත්මක නොවන බවය.
පෙත්සම් ඉල්ලා අස් කර ගැනීම සම්බන්ධයෙන් තමන්ගේ විරුද්ධත්වයක් නොමැති බව ඇය සඳහන් කළාය.
ඒ අනුව ඉදිරිපත් වූ කරුණු සලකා බැලූ විනිසුරු මඬුල්ල අදාළ පෙත්සම් ඉල්ලා අස්කර ගැනීමට අවසර ලබා දුන්නේය.
වනජීවී සහ ස්වභාවික සම්පත් ආරක්ෂක සංගමය, සීමාසහිත පාරිසරික යුක්ති කේන්ද්‍රය ඇතුළු පාර්ශ්ව පහක් විසින් මෙම පෙත්සම් ගොනු කර තිබුණි.
අගමැති ප්‍රමුඛ කැබිනට් මණ්ඩලය, නීතිපතිවරයා ඇතුළු පිරිසක් මෙහි වගත්තරකරුවෝ වූහ.
අදාළ ව්‍යාපෘතිය හේතුවෙන් අදාළ පරිසර පද්ධතියට විශාල හානියක් සිදුවන බවට මඟින් පෙන්වා දී තිබුණි.
එසේම ඉන්දියාව ඉන්දියාවේ පෞද්ගලික සමාගමක් සමඟ ඇති කරගත් මෙම ගිවිසුම ඉන්දියානු රජයත් සමඟ ඇති කරගත් ගිවිසුමක් ලෙස සලකා කටයුතු කිරීමට ඉකුත් රජයේ කැබිනට් මණ්ඩලය විසින් ගනු ලැබූ තීරණය දෝෂ සහගත බවට ද මෙම පෙත්සම් මඟින් පෙන්වා දී තිබුණි.
එබැවින් අදාළ කැබිනට් තීරණය බලරහිත කරන ලෙසට මෙම පෙත්සම් මඟින් ඉල්ලා තිබුණි.
එසේම අදාළ ව්‍යාපෘතිය ක්‍රියාත්මක කිරීම මඟින් මෙරට ජනතාවගේ මූලික අයිතිවාසිකම් උල්ලංඝනය වන බවට ප්‍රකාශයක් කරන ලෙසද පෙත්සම් මඟින් ඉල්ලා තිබුණි.
