යතුරුපැදි සහ ත්‍රිරෝද රථ අනතුරුවලින් මේ වසරේ දිනකට පුද්ගලයන් 06 දෙනකුවත් මිය යන තත්ත්වයක් ඇතිවී තිබේ. රිය අනතුරුවලින් සිදුවන මරණ සම්බන්ධයෙන් පොලීසියේ දෛනික සංඛ්‍යා දත්ත වලට අනුව ජනවාරි මාසයේදී රිය අනතුරුවලින් සිදුව ඇති මරණ ගණන 170ක් වන අතර පෙබරවාරි මාසයේදී එම ගණන 176කි. මාර්තු මාසයේ 16 වැනිදා දක්වා වාර්තා වී ඇති මරණ ගණන 139කි. කිසිදු මාරක රිය අනතුරක් පෙබරවාරි 28 වෙනිදා සිදුව නැත.
මාර්තු 09 වැනිදා මාරක රිය අනතුරු 13ක් වාර්තා වී ඇති අතර මෙම වර්ෂයේ මෙතෙක් වැඩිම ජීවිත ගණනක් රිය අනතුරුවලින් අහිමිවූ දිනය ලෙස සැලකෙන්නේද මාර්තු 09 වැනිදාය. මේ අතර පෙර දිනයේ සිදුවූ අනතුරකින් මිය යාම් දෙකක්ද සටහන් වී තිබේ.
මෙම වසරේ ජනවාරි 01 වැනිදා සිට මාර්තු 16 වෙනිදා දක්වා වාර්තා වී ඇති මාරක රිය අනතුරුවලින් පුද්ගලයන් 485 දෙනෙක් මියගොස් ඇත. මේ අය අතරින් වැඩි දෙනා පදිකයන් බව වාර්තා වේ.
මෙම මරණ වාර්තා වී ඇත්තේ මෙම වසරේ ගෙවී ගිය දින 75ක කාලයක් තුළදීය. ඒ අනුව සැලකීමේදී පුද්ගලයන් 06 දෙනෙකුට වැඩි පිරිසක් දෛනිකව මේ වන විට මාරක රිය අනතුරුවලින් මිය යමින් පවතින බවය.
රිය අනතුරුවලින් සිදුවන මරණ ගණන අඩු කිරීමට පොලීසිය මෑතකදී විශේෂ වැඩසටහනක් ද ආරම්භ කර තිබුණි.
