පුත්තලම තුනේ කණුව ප්‍රදේශයේ සත්ව ගොවිපළක සේවය කරමින් සිටි තරුණයකු විදුලිසර වැදිමෙන් ඊයේ (18) මරණයට පත්ව ඇත.
මෙලෙස මරණයට පත්ව ඇත්තේ කොට්ටුකච්චිය පළුගස්වැව පදිංචි 19 හැවිරිදි සත්සර මිහිරංග නමැති තරුණයෙකි.
සහෝදර සහෝදරියන් තිදෙනකුගෙන් යුත් පවුලක ඔහු දෙවැනි දරුවාය.
මෙම තරුණයා පළුගස්වැව ගම්මානයේ කා අතරත් හිත දිනා ගනිමින් සිටි අයෙකි.
මෙම තරුණයා කොට්ටුකච්චිය නවෝද්‍යා විද්‍යාලයේ අධ්‍යාපනය ලබා ඉන්පසුව වැඩිදුර අධ්‍යාපන කටයුත්තක නිරත වී සිට ඇති අයෙකි. සුළු කාලයකට මෙම සත්ත්ව ගොවිපළට රැකියාවකට ගොස් සිටියදි මෙම අවාසනාවන්ත ඉරණමට ඔහු මුහුණ දී ඇති බවට වාර්තා වෙයි.
පොලිස් පරීක්ෂණවලදි හෙළිව ඇත්තේ අක්කර 70කට ආසන්න ගොවිපළ වටා විදුලි අලි වැටක් ඉදිකරමින් සිටි කාර්මිකයකුගේ අත් උදව්කරුවකු ලෙස මෙම තරුණයා කටයුතු කරමින් සිටියදි ප්‍රධාන විදුලි පද්ධතියෙන් ලබා දී තිබූ විදුලි වයරයකින් විදුලි සර වැදී මෙම අනතුර සිදුව ඇති බවය.
විදුලි සරට ලක්වූ තරුණයා ප්‍රධාන විදුලි කාර්මිකයා ඇතුළු පිරිසක් කඩිනමින් පුත්තලම රෝහලට ඇතුළත් කර ඇති නමුත් ප්‍රතිකාර ලබමින් සිටියදී මරණයට පත්ව ඇති බව පොලීසිය කියයි.
මරණයට පත් තරුණයාගේ පියා සුළු රැකියාවක නිරත වන අතර මව විදේශගතව රැකියාවක නිරත වන බව පොලීසිය කියයි.
මේ සම්බන්ධයෙන් පුත්තලම මූලස්ථාන පොලීසිය විමර්ශනයක් ආරම්භ කර ඇති අතර මරණයට පත් තරුණයාගේ පශ්චාත් මරණ පරීක්ෂණය පුත්තලම මූලික රෝහලේදී ඊයේ (18) පැවැත්වීමට නියමිතව තිබිණි.
