ආණ්ඩුව පත් වී මාස 4ක් වැනි කාලයක් ඇතුළත සෞඛ්‍ය සේවකයන්ට දැනෙන මූලික වැටුප් වැඩි කිරීමක් ලබා දී තිබියදී සෞඛ්‍ය සේවාව අඩපණ වෙන ආකාරයට තීරණ ගැනීම සුදුසු නොවන බව කැබිනට් ප්‍රකාශක, ඇමැති, වෛද්‍ය නලින්ද ජයතිස්ස මහතා පැවැසීය.
රජයේ ප්‍රවෘත්ති දෙපාර්තමේන්තුවේ ඊයේ (18) පැවැති කැබිනට් තීරණ දැනුම්දීමේ මාධ්‍ය හමුවේ දී ඇමැතිවරයා මේ බව සඳහන් කළේය.
ආණ්ඩුව අපහසුතාවට පත්වන ආකාරයට, දේශපාලන මත අනුව මෙසේ ක්‍රියාකරන ආකාරය සුදුසු නොවන බවත් මෙයින් අපහසුතාවට පත්වන්නේ ජනතාව බවත් ඒ මහතා කියා සිටියේය.
ඇමැතිවරයා වැඩිදුරටත් මෙසේද පැවැසීය. “ඇමැතිවරයා විදියට ඔවුන් සමඟ සාකච්ඡා කිහිපයක් පැවැත්වූවා. ඔවුන් සෞඛ්‍ය අමාත්‍යාංශයේ වැය ශීර්ෂය දවසේ වර්ජනයක් කරන්න සූදානම් කරලා තිබුණා. ඊට පෙර දින තිබුණ සාකච්ඡාවේ දී මුදල් අමාත්‍යාංශයත් සමඟ සාකච්ඡාවක් අරන් දෙන්න මම පොරොන්දු වුණා. පෙරේදා එම සාකච්ඡාව ලබාදුන්නා. හැබැයි සාකච්ඡාවට යනකොටත් වර්ජනය පිළිබඳ ඔවුන් තීරණයක් අරගෙන තමයි ගිහින් තිබෙන්නේ. පසුගිය මාස හතරේදී දැනෙන මූලික වැටුප් වැඩි කිරීමක් කරලා තිබෙනවා. ඒ මූලික වැටුප් මත පදනම්ව මේ අප්‍රේල් මාසයේ ඉඳන් ඕටී, පීඑච් එක, ණය ලබා ගැනීමේ පහසුකම් වැඩිකරගන්න පුළුවන්. එහෙම තිබියදී සෞඛ්‍ය සේවාව අඩපන වන ආකාරයට මෙහෙම වර්ජන ක්‍රියාමාර්ග ගන්න එක සුදුසු නැහැ.
අපි මේ වැටුප් වැඩි කිරීම ලබාදී තිබෙන්නේ රටේ පවතින ආර්ථිකයට සරිලන ආකාරයටයි. අපිට වියදම් සීමාවන් තිබෙනවා. මෙවර අය-වැයෙන් අපි රුපියල් බිලියන 110ක් වෙන් කරනවා වැටුප් වැඩිවීම සඳහා පමණක්.
2027 ජනවාරි මාසයේ ඉඳලා තව මාස දාහතකින් රුපියල් බිලියන 330ක් අමතර වශයෙන් වැටුප් වැඩිවීමට භාණ්ඩාගාරයෙන් වෙන් කරන්න වෙනවා. මේ සියල්ල සලකා බලමින් තමයි වැටුප් වැඩිවීම කරලා තිබෙන්නේ. මේ වෘත්තිකයන් තමන්ට ලැබෙන අවසාන රුපියල දක්වා ගණනය කරලා සමහර අසාධාරණ ඉල්ලීම් කරන කොට ඒ අයට මේ රුපියල ලබා දෙන්නට බදු ගෙවන මිනිස්සු කොච්චර බදු ගෙවලා තිබෙනවාද කියලා දන්නෙවත් නැහැ.
