පොලිස්පති දේශබන්දු තෙන්නකෝන් මහතාව පමණක් නොව මේ වනවිට තවත් සැකකරුවන් කිහිප දෙනකු අත්අඩංගුවට ගැනීම සඳහා පොලිස් කණ්ඩායම් යොදවා ඇතැයි කැබිනට් ප්‍රකාශක, ඇමැති, වෛද්‍ය නලින්ද ජයතිස්ස මහතා පැවැසීය.
දේශබන්දු තෙන්නකෝන් මහතාව අත්අඩංගුවට නොගන්නේ රජය සමඟ ඇති වෙනත් ගනුදෙනුවක් නිසාවෙන් ද යන්න මාධ්‍යවේදියකු ඊයේ (18) පැවති කැබිනට් තීරණ දැනුම්දීමේ මාධ්‍ය හමුවේදී ඇසූ ප්‍රශ්නයකට පිළිතුරු දෙමින් ඇමැතිවරයා මේ බව සඳහන් කළේය. දේශබන්දු තෙන්නකෝන් මහතාගේ වැඩ තහනම් කිරීම සම්බන්ධයෙන් මේ වනවිට රජය ගනු ලබන තීරණය කුමක් ද යන්න ද මාධ්‍යවේදීන් ඇසූ ප්‍රශ්නයකට පිළිතුරු දෙමින් ඇමැතිවරයා කියා සිටියේ ඉදිරියේ දී ඒ පිළිබඳව පොලීසිය භාර ඇමැතිවරයා විසින් දැනුම් දෙනු ඇති බවයි.
ඇමැතිවරයා වැඩිදුරටත් මෙසේ ද පැවසීය.
“දේශබන්දු තෙන්නකෝන් මහතා පමණක් නොව තවත් කිහිපදෙනෙක්ම ඉන්නවා පොලිස් කණ්ඩායම් යොදවලා අත්අඩංගුවට ගන්න. ඔබ අපිට කියන්නේ නෑනේ ප්‍රසන්න රණවීරත් එක්ක මොකක් හරි ඩීල් එකක් තියෙනවා කියලා. අපි එයාවත් හොයනවා. සෙව්වන්දිවත් හොයනවා. තවනම් ප්‍රසිද්ධ නැති කිහිප දෙනෙක්ම හොයන්න පොලිස් කණ්ඩායම් යොදවලා තියෙන්නේ. ගණේමුල්ල සංජීව ඝාතනයේ 13ක් මේ වෙද්දි අත්අඩංගුවට ගෙන තියෙනවා. නඩු පැවරීම ආරම්භ කරනවා. ඒ අතර පොලිස් නිලධාරීන් දෙදෙනකු සහ බන්ධනාගාර ජේලර්වරයකුත් ඉන්නවා. මේ පරීක්ෂණ කරගෙන යනකොට රාජ්‍ය යන්ත්‍රණය තුළටත් නිලධාරීන් අත්අඩංගුවට ගැනීම දක්වා විහිදිලා තියෙන්නේ. පොලීසිය උපරිමය කටයුතු කරමින් ඉන්නවා කියන්න පුළුවන්. ඒ නිසා ගැලවෙන්න බෑ.
අපි නොදන්න, පොලීසිය නොදන්න කරුණු ඔබ දන්නවා නම් ඉදිරිපත් කරන එක තමා හොඳ. අනිවාර්යයෙන්ම නීතිය ක්‍රියාත්මක වෙන බවට සහතික වෙන්න පුළුවන්.”
