සංවිධානාත්මක අපරාධ ක්‍රියාකාරකම් හා මත්ද්‍රව්‍ය ව්‍යසනය පිටුදැකීමට අවශ්‍ය පහසුකම් සැලසීමට මෙන්ම නව නීති සම්පාදනයට පියවර ගන්නා බව ජනාධිපති අනුර කුමාර දිසානායක මහතා පැවසීය.
බස්නාහිර සහ දකුණු පළාත් පොලිස් ප්‍රධානීන් සමඟ ජනාධිපති ලේකම් කාර්යාලයේ ඊයේ (18) පැවති සාකච්ඡාවකදී ජනාධිපතිවරයා එසේ සඳහන් කළේය.
කිසිදු බලපෑමකට යටත් නොවී තම රාජකාරිය ඉටු කරන ලෙස මෙහිදී පොලිස් ප්‍රධානීන්ට අවධාරණය කළ ජනාධිපතිවරයා නීතියේ විධානයේ ආධිපත්‍යය සුරැකීම පොලිස් දෙපාර්තමේන්තුව සතු වගකීමක් බව ද පෙන්වා දුන්නේය. බලපෑම්වලින් තොරව නීතිය හා සාමය ආරක්ෂා කිරීමේ ක්‍රියාවලිය ශක්තිමත් කරන ලෙස ද ජනාධිපති අනුර කුමාර දිසානායක මහතා මෙහිදී අදාළ නිලධාරීන්ට දැනුම් දුන්නේය.
අපරාධ මර්දනයට අදාළව ගතහැකි සියලු ක්‍රියාමාර්ග කඩිනමින් ගන්නා ලෙස එහිදී ජනාධිපතිවරයා නිලධාරීන්ට දැනුම් දුන්නේය. ඒ සඳහා දේශපාලන අධිකාරිය ලෙස පහසුකම් සැපයීමට තම රජය කටයුතු කරන බව ද ජනාධිපතිවරයා එහිදී ප්‍රකාශ කළේය.
මෙරට තුළ නීතියේ විධානයේ ආධිපත්‍යය තහවුරු නොකර යහපත් සමාජයක් බිහි කළ නොහැකි බව ද මෙහිදී ජනාධිපතිවරයා ප්‍රකාශ කළේය.
සංවිධානාත්මක අපරාධ ක්‍රියාකාරකම් හා මත්ද්‍රව්‍ය ව්‍යවසනය පිටුදැකීමට නවීන තාක්ෂණය භාවිතයට සැලසුම් කර ඇති බව ද මෙහිදී සඳහන් විය.
මහජන ආරක්ෂක සහ පාර්ලිමේන්තු කටයුතු ඇමැති ආනන්ද විජේපාල, මහජන ආරක්ෂක සහ පාර්ලිමේන්තු කටයුතු නියෝජ්‍ය ඇමැති නීතීඥ සුනිල් වටගල, මහජන ආරක්ෂක අමාත්‍යාංශයේ ලේකම් විශ්‍රාමික ජ්‍යෙෂ්ඨ නියෝජ්‍ය පොලිස්පති රවී සෙනෙවිරත්න, වැඩබලන පොලිස්පති නීතිඥ ප්‍රියන්ත විරසූරිය මහත්වරු ද බස්නාහිර පළාත් පොලිස් ප්‍රධානීහු පිරිසක් ද මෙම අවස්ථාවට එක්ව සිටියහ.
