පසුගිය මහකන්නයේ ඇතිවූ ගංවතුර තත්ත්වය නිසා වගා හානි වූ ගොවීන්ට රුපියල් මිලියන 952ක වන්දි ගෙවා අවසන් බවත්, වගා හානි වන්දි දීම සම්බන්ධයෙන් ගැටලුවේ නම් 1918 හදිසි දුරකතන ඇමැතුම් අංකය වෙත දැනුම් දෙන ලෙසත් කෘෂිකාර්මික හා ගොවිජන රක්ෂණ මණ්ඩලයේ සභාපති පේමසිරි ජාසිංආරච්චි මහතා පැවැසීය.
ඒ මහතා මේ බව පැවැසුවේ ඊයේ (18) කෘෂිකර්ම අමාත්‍යාංශයේ පැවැති මාධ්‍ය හමුවකට එක්වෙමිනි.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“මේ වන විට දිනකට විමසීම් 10ක් පමණ මේ හදිසි දුරකතන ඇමැතුම් අංකයට ලැබෙනවා. එම ගැටලු වැඩි වශයෙන් වාර්තා වන්නේ මඩකළපුව, පුත්තලම සහ අනුරාධපුර දිස්ත්‍රික්කවලින්. පසුගිය සතිය නිම වන විට ගොවීන් 53,511 දෙනකුගේ වගා අක්කර 61,071කට රුපියල් මිලියන 952ක් ගිණුම්වලට බැර කළා.
පැවැති ගංවතුර හේතුවෙන් වැඩිම හානි වාර්තා වූ දිස්ත්‍රික්ක ලෙස මඩකළපුව, අම්පාර, පොළොන්නරුව අනුරාධපුරය, ත්‍රිකුණාමලය, මුලතිව්, මන්නාරම, යාපනය, කුරුණෑගල සහ වවුනියාව හඳුනාගෙන තිබුණා. එම වගා හානි වූ ගොවීන් සඳහා වන වන්දි මුදල් අදාළ ගොවි ගිණුම්වලටම බැර කිරීම සිදු කළා. මේ කටයුතු සියල්ල විනිවිදභාවයෙන් යුතුව සිදු කළා. වගා හානි වූ බවට වාර්තා කළ ගොවි බිම්වලට ගොස් සියැසින්ම ඒ හානි දැක බලාගෙන මේ වගා හානි තක්සේරු මුදල් දුන්නා. ගොවිජන සේවා මධ්‍යස්ථානවලින් නිර්දේශ වූ වගා හානි සඳහා පමණක් අදාළ වන්දි මුදල් ගෙව්වා. ගොවීන් හඳුනාගැනී‌ම් ගැටලු, ජාතික හැඳුනුම්පත් අංකවල පරස්පරතා, බැංකු ගිණුම්වල විස්තර නිවැරදි නොවීම්, තක්සේරු කමිටු නිර්දේශ සම්පූර්ණ නොවීම, හානි වාර්තා කිරීම නිසි ලෙස සිදු නොකිරීම ඇතුළු අඩුපාඩුකම් සහිත ලේඛන සඳහා වන්දි ගෙවීම අත්හිටුවීමට සිදු වුණා. පසුගිය නොවැම්බර් මාසයේදී ගංවතුර ඇති වුණා. මහකන්නය නිමවීමටත් ප්‍රථම මාර්තු මුල් සතිය පමණ වන විටම වන්දි ගෙවා අවසන් කළා. මෙය මෙරට ඉතිහාසයේ ඉතාම කෙටි කලකින් වගා හානි වන්දි ගෙවූ අවස්ථාවක්.”
ඡායාරූපය – මාලන් කරුණාරත්න
