මිද්දෙණිය ප්‍රදේශයේ පවුලේ සාමාජිකයන් තිදෙනකු ඝාතනය කිරීම සැලසුම් කළ බවට චෝදනා එල්ල වී ඇති සැකකරුවන් දෙදෙනෙකුට වලස්මුල්ල මහේස්ත්‍රාත් අධිකරණය විවෘත වරෙන්තු නිකුත් කර ඇති බව වාර්තා වේ.
ලහිරු මධුෂාන් නොහොත් ‘තම්බිලි ලහිරු’ සහ නිර්මල සංජීව නොහොත් ‘බැකෝ සමන්’ ලෙස හඳුනාගෙන ඇති සැකකරුවන් ඩුබායි හි සැඟවී සිටින බවට තොරතුරු වාර්තා වේ.
මිද්දෙනිය පොලිසියේ ඉල්ලීමකට අනුව මහේස්ත්‍රාත් සහ අතිරේක දිසා විනිසුරු විසින් මෙම වරෙන්තු නිකුත් කරන ලදී.
පෙබරවාරි 18 වැනි දින මිද්දෙනිය, ගල්පොත්තයාය, කඩේවත්ත හන්දියේදී මෙම ත්‍රිත්ව ඝාතනය සිදු වු අතර එහිදී මිද්දෙනියේ කජ්ජා, ඔහුගේ පුත්‍රයා සහ දියණිය යතුරුපැදියකින් ගමන් කරමින් සිටියදී වෙඩි තබා තිබුණි.
කෙසේ නමුත් ඉහත සැකකරුවන් දෙදෙනාගේ මඟපෙන්වීම යටතේ ප්‍රහාරය සැලසුම් කර ක්‍රියාත්මක කර ඇති බව විමර්ශනවලින් අනාවරණය වී ඇති අතර ලහිරු සහ සංජීව මත්ද්‍රව්‍ය ජාවාරමට සම්බන්ධ බවත්, ඔවුන්ට එරෙහිව බහුවිධ අපරාධ චෝදනා ඇති බවත් පොලිසිය පවසයි.
මේ අතර, සිද්ධිය සම්බන්ධයෙන් සැකකෙරෙන පුද්ගලයන් 11 දෙනෙකු මෙ වන විට අත්අඩංගුවට ගෙන ඇත.
