හෙරොයින් සන්තකයේ තබා ගැනීම සම්බන්ධයෙන් 2020 වසරේදී අත්අඩංගුවට ගනු ලැබූ කාන්තාවක ත්‍රස්තවාදය වළක්වා ගැනීමේ පනත යටතේ රඳවා තබා ගැනීම සඳහා හිටපු ජනාධිපති ගෝඨාභය රාජපක්ෂ මහතා විසින් නිකුත් කරන ලද රැඳවුම් නියෝගය නීති විරෝධී බවට ශ්‍රේෂ්ඨාධිකරණය ඊයේ (18) තීරණය කළේය.
ගෝඨාභය රාජපක්ෂ මහතා ජනාධිපතිවරයා ලෙස එම රැඳවුම් නියෝගය නිකුත් කිරීම මඟින් එම කාන්තාවගේ මූලික අයිතිවාසිකම් උල්ලංඝනය කර ඇති බවට තීන්දු කරමින් මේ බව ප්‍රකාශ කරන ලදි.
ඒ වෙනුවෙන් රුපියල් ලක්ෂයක වන්දි මුදලක් එම කාන්තාවට ගෙවන ලෙස රජයට නියම කෙරිණි.
පෑලියගොඩ විශේෂ විමර්ශන ඒකකයේ නිලධාරීන් විසින් අත්අඩංගුවට ගනු ලැබූ හේනේගම, පොකුණුවිට ප්‍රදේශයේ පදිංචිකාරියක වූ එම්.කේ. ප්‍රියදර්ශනී මදුරප්පෙරුම නමැති කාන්තාවක විසින් ගොනු කළ පෙත්සමක් විභාග කර එහි තීන්දුව ප්‍රකාශ කරමින් ශ්‍රේෂ්ඨාධිකරණය මෙම නියෝගය කළේය.
ඒ.එච්.එම්.ඩී. නවාස් සහ මහින්ද සමයවර්ධන ශ්‍රේෂ්ඨාධිකරණ විනිසුරුවරුන්ගේ එකඟත්වයෙන් යුතු නඩු තීන්දුව එම විනිසුරු මඬුල්ලේ සභාපති විනිසුරු එස්. තුරෙයිරාජා මහතා විසින් විවෘත අධිකරණයේදී කියවන ලදි.
හෙරොයින් මත්ද්‍රව්‍ය සන්තකයේ තබා ගැනීම සම්බන්ධයෙන් පෙත්සම්කාර කාන්තාව සහ ඇගේ සහෝදරයා 2020 ජනවාරි මස 03 වැනි දින බණ්ඩාරගම ප්‍රදේශයේදී පෑලියගොඩ විශේෂ විමර්ශන ඒකකයේ නිලධාරීන් විසින් අත්අඩංගුවට ගෙන තිබිණි.
විෂ වර්ග සහ අන්තරායකර ඖෂධ පනතේ 82(3) වගන්තිය යටතේ ඇය දින හතක් රඳවා තබා ගැනීම සඳහා රැඳවුම් නියෝගයක් මුලදී ලබාගෙන තිබූ අතර එම රැඳවුම් නියෝගය අවසන් වීමෙන් අනතුරුව ඇය තවදුරටත් ත්‍රස්තවාදය වැළැක්වීම පනත යටතේ රඳවා තබා ගැනීම සඳහා 2020 පෙබරවාරි මස 06 වැනිදා රැඳවුම් නියෝගයක් ලබාගෙන තිබිණි.
එවකට ජනාධිපතිවරයා ලෙස කටයුතු කළ ගෝඨාභය රාජපක්ෂ මහතා විසින් අදාළ රැඳවුම් නියෝගය නිකුත් කර තිබූ බව නඩු තීන්දුවෙහි සඳහන් වේ.
එම රැඳවුම් නියෝගය නිකුත් කරන අවස්ථාව වන විට මෙරට ආරක්ෂක ඇමැතිවරයකු නොසිටි අතර ත්‍රස්තවාදය වැළැක්වීමේ පනතෙහි 9(1) වගන්තිය යටතේ රැඳවුම් නියෝග නිකුත් කිරීමේ බලය ආරක්ෂක ඇමැතිවරයා පමණක් සතු වන බව ද තීන්දුව මඟින් පෙන්වා දී තිබේ. ඒ වන විට මෙරට දහනව වැනි ආණ්ඩුක්‍රම ව්‍යවස්ථා සංශෝධනය මෙරට ක්‍රියාත්මක වෙමින් පැවති අතර එවැනි රැඳවුම් නියෝගයක් නිකුත් කිරීමේ බලය ජනාධිපතිවරයා සතුව නොතිබූ බව ද නඩු තීන්දුවෙහි සඳහන් වේ.
20 වැනි ආණ්ඩුක්‍රම ව්‍යවස්ථා සංශෝධනය යටතේ ජනාධිපතිවරයාට ආරක්ෂක ඇමැතිවරයා ලෙස කටයුතු කිරීමේ බලය ලබාදුන් අතර එම ව්‍යවස්ථා සංශෝධනය 2020 ඔක්තෝබර් මස 09 වැනිදා සිට ක්‍රියාත්මක වූ බව ද අදාළ තීන්දුව මඟින් පෙන්වා දී ඇත.
ඒ අනුව පෙත්සම්කාරිය රඳවා තබා ගැනීම සඳහා ත්‍රස්තවාදය වැළැක්වීමේ පනත යටතේ රැඳවුම් නියෝග නිකුත් කරන අවස්ථාව වන විට ආරක්ෂක ඇමැතිවරයා ලෙස කටයුතු කිරීමට එවක ජනාධිපතිවරයාට නොහැකි අතර එවැනි රැඳවුම් නියෝගයක් නිකුත් කිරීමට ජනාධිපතිවරයා ලෙස ගෝඨාභය රාජපක්ෂ මහතාට කිසිදු බලයක් නොතිබූ බවට විනිසුරු මඬුල්ල මඟින් තීරණය කර තිබේ.
එබැවින් අදාළ රැඳවුම් නියෝගය නීති විරෝධී බවට ශ්‍රේෂ්ඨාධිකරණය මඟින් තීරණය කර ඇත.
එම රැඳවුම් නියෝගය නිකුත් කිරීම මඟින් ආණ්ඩුක්‍රම ව්‍යවස්ථාවේ 12(1),13(1),13(2) යන විධිවිධාන මඟින් සහතික කර ඇති පෙත්සම්කාරියගේ මූලික අයිතිවාසිකම් උල්ලංඝනය කර ඇති බවට ශ්‍රේෂ්ඨාධිකරණ විනිසුරු මඬුල්ල මඟින් තීරණය කර තිබේ.
කෙසේ වුවද මෙම පෙත්සම් මඟින් හිටපු ජනාධිපති ගෝඨාභය රාජපක්ෂ මහතා වගඋත්තරකරුවකු ලෙස නම් කර නොතිබීම නිසා අදාළ මූලික අයිතිවාසිකම් උල්ලංඝනය කිරීම වෙනුවෙන් ඔහුගෙන් වන්දි මුදලක් අය කිරීමට නොහැකි බව ද අදාළ නඩු තීන්දුවේ සඳහන් වේ.
එබැවින් එවකට ජනාධිපති ගෝඨාභය රාජපක්ෂ මහතා විසින් සිදු කළ එම මූලික අයිතිවාසිකම් උල්ලංඝනය කිරීම වෙනුවෙන් වන්දි ලෙස රුපියල් ලක්ෂයක මුදලක් පෙත්සම්කාරියට රජය මඟින් ගෙවිය යුතු බවට ශ්‍රේෂ්ඨාධිකරණය මඟින් තීන්දු කෙරිණි.
පෑලියගොඩ විශේෂ විමර්ශන ඒකකයේ නිලධාරීන් පිරිසක්, ඒ වන විට බස්නාහිර භාර ජ්‍යෙෂ්ඨ නියෝජ්‍ය පොලිස්පතිවරයාව සිටි දේශබන්දු තෙන්නකෝන්, පොලිස්පතිවරයා ලෙස සිටි සී.ඩී. වික්‍රමරත්න මහතා ඇතුළු 15 දෙනකු පෙත්සමෙහි වගඋත්තරකරුවන් ලෙස නම් කරන ලදි.
