මහජන ආරක්ෂක සහ පාර්ලිමේන්තු කටයුතු ඇමැති ආනන්ද විජේපාල මහතාගේ පාර්ලිමේන්තු මන්ත්‍රී ධුරය බලරහිත කරන රිට් ආඥාවක් නිකුත් කරන ලෙස ඉල්ලා ගොනු කර ඇති රිට් පෙත්සමට එරෙහිව ඉදිරිපත් කර ඇති මූලික විරෝධතා පිළිබඳ නියෝගය ලබන මැයි මස 05 ප්‍රකාශයට පත් කිරීමට අභියාචනාධිකරණය ඊයේ (18) තීරණය කළේය .
අභියාචනාධිකරණ වැඩබලන සභාපති විනිසුරු මොහොමඩ් ලෆාර් තාහීර් සහ අභියාචනාධිකරණ විනිසුරු කේ. පී. ප්‍රනාන්දු යන මහත්වරු හමුවේ කැඳවනු ලැබූ අවස්ථාවේදී මේ බව තීරණය කරන ලදි.
ඊට අදාළ ලිඛිත දේශන සතියකදී ඉදිරිපත් කරන ලෙස පාර්ශ්වකරුවන්ට නියම කෙරිණ.
ශ්‍රී ලංකා පොදු ජන පෙරමුණේ පාලක ලේකම් රේණුක පෙරේරා මහතා විසින් ගොනු කළ මෙම පෙත්සමෙහි වග උත්තරකරු ලෙස අමාත්‍ය ආනන්ද විජේපාල මහතා, පාර්ලිමේන්තු මහලේකම් සහ නීතිපතිවරයා නම් කර සිටිති.
වගඋත්තරකාර ආනන්ද විජේපාල මහතා වත්මන් රජයේ මහජන ආරක්ෂක
ඇමැතිවරයා සහ පාර්ලිමේන්තු කටයුතු ඇමැතිවරයා ලෙස ඉකුත් නොවැම්බර් මස 18 වැනිදා පත් කර ඇති බව පෙත්සමෙහි සඳහන් වේ.
අනතුරුව ඔහු ඉකුත් දෙසැම්බර් මස 19 වැනි දින ජනාධිපති කාර්ය මණ්ඩල ප්‍රධානියා ලෙස පත් කර ඇති බවට මාධ්‍ය වාර්තා පළ වූ බව ද පෙත්සමෙහි දැක්වෙයි.
ජනාධිපතිවරයාගේ කාර්යය මණ්ඩල ප්‍රධානී තනතුර රාජ්‍ය තනතුරක් වන බැවින් ආනන්ද විජේපාල ඇමැතිවරයා පාර්ලිමේන්තු මන්ත්‍රී ධුරයක් දැරීමට සුදුසු නොමැති බවට තීන්දුකොට ඔහුගේ මන්ත්‍රී ධුරය බලරහිත කරන නියෝගයක් ලබා දෙන ලෙස පෙත්සම මඟින් ඉල්ලා ඇත.
එසේම මෙම පෙත්සම සම්බන්ධයෙන් අවසන් තීන්දුවක් ලබා දෙන තෙක් ආනන්ද විජේපාල මහතා පාර්ලිමේන්තු මන්ත්‍රීවරයකු වශයෙන් අසුන් ගැනීම හා පාර්ලිමේන්තුවේ ඡන්දය ප්‍රකාශ කිරීම වළක්වාලමින් අතුරු තහනම් නියෝගයක් නිකුත් කරන ලෙසත් පෙත්සම මඟින් ඉල්ලා ඇත .
වගඋත්තරකාර ආනන්ද විජේපාල මහතා මහජන ආරක්ෂක ඇමැතිවරයා ලෙස කටයුතු කිරීම වළක්වන අතුරු තහනම් නියෝගයක් නිකුත් කරන ලෙසද
පෙත්සම්කරු අධිකරණයෙන් ඉල්ලා සිටියි.
නීතිඥ විශ්ව පෙරේරා මහතා පෙත්සම්කරු වෙනුවෙන් පෙනී සිටි අතර නීතිඥ චාමර නානායක්කාරවසම් මහතා වගඋත්තරකාර ආනන්ද විජේපාල මහතා වෙනුවෙන් පෙනී සිටියේය.
