ශ්‍රී ලංකා ජාතික ක්‍රිකට් කණ්ඩායමේ ක්‍රීඩකයන් ශ්‍රී ලංකා ක්‍රිකට් ආයතනයේ සේවකයන් ලෙස සලකා, ඔවුන්ගෙන් රඳවා ගැනීමේ බද්දක් අය කිරීමට දේශීය ආදායම් දෙපාර්තමේන්තුව ගෙන ඇති තීරණය බලරහිත කිරීමේ රිට් ආඥාවක් නිකුත් කරන ලෙස ඉල්ලා ගොනු කර ඇති පෙත්සමක් ලබන 28 වැනිදා සලකා බැලීමට අභියාචනාධිකරණය ඊයේ (18) දින නියම කළේය.
ශ්‍රී ලංකා එක්දින ක්‍රිකට් කණ්ඩායමේ නායක චරිත් අසලංක සහ ශ්‍රී ලංකා ටෙස්ට් ක්‍රිකට් කණ්ඩායමේ නායක ධනංජය ද සිල්වා ගොනු කළ එම පෙත්සම අභියාචනාධිකරණ වැඩ බලන සභාපති විනිසුරු මොහොමඩ් ලෆාර් තාහීර් සහ අභියාචනාධිකරණ විනිසුරු කේ.පී. ප්‍රනාන්දු යන මහත්වරු හමුවේ කැඳවූ අවස්ථාවේ දී මේ බව තීරණය කරණ ලදි.
දේශීය ආදායම් කොමසාරිස් ජෙනරාල්, එහි නියෝජ්‍ය කොමසාරිස්වරයා, ශ්‍රී ලංකා ක්‍රිකට් ආයතනයේ සභාපති ඇතුළු එහි විධායක කමිටු සාමාජිකයන්, විගණකාධිපතිවරයා ඇතුළු පිරිසක් මෙම පෙත්සමෙහි වගඋත්තරකරුවන් ලෙස නම් කර සිටිති.
ශ්‍රී ලංකා ක්‍රිකට් ආයතනය සමඟ ක්‍රිකට් ක්‍රීඩා කරන ජාතික ක්‍රීඩකයන් සමග ලිඛිත ගිවිසුම් අත්සන් කිරීම 1996 වසරේ ලෝක කුසලානය ජයග්‍රහණය කිරීමෙන් පසුව සිදු වූ බව පෙත්සමෙහි සඳහන් වේ.
ශ්‍රී ලංකා ක්‍රිකට් ආයතනය සමග ගිවිසුම්ගතව සිටින ජාතික කණ්ඩායමේ ක්‍රීඩකයන් එම ආයතනයේ කොන්ත්‍රාත් පදනම යටතේ සේවය කරන සේවකයන් ලෙස වර්ගීකරණය කිරීමට ඉකුත් ජනවාරි මස 17 වැනි දා රැස්වූ ශ්‍රී ලංකා ක්‍රිකට් ආයතනයේ විධායක කමිටුව තීරණය කළ බව පෙත්සමෙහි දැක්වේ.
එම තීරණය හේතුවෙන් තමන් ඇතුළු ජාතික තලයේ ක්‍රීඩකයන්ගෙන් රඳවා ගැනීමේ බදු අය කිරීමට දේශීය ආදායම් දෙපාර්තමේන්තුව තීරණය කර ඇති බව ද පෙත්සම් කරුවෝ පෙන්වා දෙති.
තමන් ඇතුළු ජාතික තලයේ ක්‍රීඩකයන් සේවක අර්ථසාධක අරමුදලේ හෝ සේවා නියුක්තිකයන්ගේ භාර අරමුදල ඇතුළු අරමුදල්වල සාමාජිකයන් නොවන අතර ඔවුන්ගේ අනාගතය අවිනිශ්චිත බව පෙත්සම්කරුවන් පෙන්වා දී ඇත.
මේ පිළිබඳව කළ කරුණු විමසීමකදී තමන් ශ්‍රී ලංකා ක්‍රිකට් ආයතනයට ස්වාධීනව සේවා සපයන්නන් වන අතර එහි සේවකයන් නොවන බවට තමන්ට නීති උපදෙස් ලැබුණු බවත් පෙත්සම්කරුවෝ කියා සිටිති.
එබැවින් ජාතික කණ්ඩායමේ ක්‍රීඩකයන් එම ආයතනයේ කොන්ත්‍රාත් පදනම යටතේ සේවය කරන සේවකයන් ලෙස සැලකීමට ගත් තීරණය සම්පූර්ණයෙන්ම නීතියට පටහැනි බවට පෙත්සමෙහි සඳහන් වේ.
එසේම ජාතික තලයේ ක්‍රිකට් ක්‍රීඩකයන්ගෙන් රඳවා ගැනීමේ බදු අය කිරීමට දේශීය ආදායම් දෙපාර්තමේන්තුව තීරණය කර ඇති අතර එමඟින් විශාල අගතියක් සිදුවී ඇති බව පෙත්සමෙහි සඳහන් වේ.
ඒ අනුව දේශීය ආදායම් දෙපාර්තමේන්තුවේ තීරණය ක්‍රියාත්මක කිරීම වළක්වාලන අතුරු තහනම් නියෝගයක් නිකුත් කරන ලෙසත් පෙත්සම්කරුවෝ ඉල්ලා සිටිති.
ජාතික තලයේ ක්‍රීඩකයන් ශ්‍රී ලංකා ක්‍රිකට් ආයතනයේ සේවකයන් සේ වර්ගීකරණය කිරීමට ශ්‍රී ලංකා ක්‍රිකට් ආයතනය ගත් තීරණය හා ඒ මත ඔවුන්ගෙන් රඳවා ගැනීමේ බදු අය කිරීමට දේශීය ආදායම් දෙපාර්තමේන්තුව ගෙන තිබෙන තීරණය බලරහිත කිරීමේ රිට් ආඥා නිකුත් කරන ලෙස පෙත්සම් මඟින් ඉල්ලා ඇත.
